بىلەك كۇشىنەن بۇرىن جۇرەك كۇشى قاجەت. ونسىز سەركە قولعا ىلىنبەيدى, كومبە دە كوڭىلدەن الىس. كوك ەتى جىرىلعانشا كوزسىز باتىرلىققا بارۋ ويىن الاڭىنداعى وعلاندارعا سەرت. نامىس تەڭىزىندە سالى سۋعا كەتسە جاي عانا ايىپتى سانامايدى ءوزىن, ەرتەڭ ەل بەتىنە قاراۋعا باتپايدى. سوندىقتان ومىلدىرىگىن ۇزەردەي القىنعان اتتار مەن ۇزەڭگىسىنە شىرەنە وتىرىپ قيقۋعا قيقۋ قوسقان قازاق ازاماتتارىنىڭ بۇل شابىسى بولەك. بۇل – نەشە مىڭجىلدىقتان بەرى جالعاسقان ۇلتتىق ويىن – كوكپاردى بىلەكتى دە جۇرەكتى جىگىتتەردىڭ تارتقان ءساتىنىڭ كورىنىسى.
كوڭىلگە وي سالعان «كوكپار» كارتيناسى. شىعارمانىڭ يەسى قازاقستان سۋرەتشىلەر وداعىنىڭ مۇشەسى اباي چۋنچالينوۆ. قىلقالام شەبەرى ات جارىسى, تارتىس پەن دودا بىرىگىپ كەتكەن قازاق حالقىنىڭ ۇلتتىق ويىنى كوكپاردى بەينەلەۋگە تىرىسقان.
كوشپەندىلەر مىڭداعان جىلدار بويى كوكپار تارتۋ ارقىلى مىنەزدەرىن شىڭداعان جانە قايسار جاۋىنگەر ءارى شەبەر شاباندوز رەتىندە ءوز داعدىلارىن جەتىلدىرگەن. باعزى زورواستريزم زامانىنان بەلگىلى بۇل ات ويىنى قازاقتاردىڭ عانا ەمەس, قىرعىز, تاجىك, وزبەك جانە ورتالىق ازيانىڭ وزگە دە حالىقتارىنىڭ اراسىندا دا كەڭ تارالعان.
ءبىز كارتينادان ءاربىر ادام شوعىرلانعان ەنەرگيانىڭ جيىنتىعى رەتىندە كورىنەتىن جارتىلاي جالاڭاش شاباندوزداردى كورەمىز. ولاردىڭ اتتارى ايقىش-ۇيقىش بىرلەسىپ كەتكەن. كۇردەلى بۇرىلىستار قيسايىپ كەتكەن بەت-الپەتى, ويىنشىلاردىڭ شيرىققان بۇلشىق ەتتەرى, اتتاردىڭ ۇيپا-تۇيپا بولعان جال-قۇيرىعى, ادىرايعان كوزدەرى, ولاردىڭ قوزعالىسىنداعى جانكەشتىلىك, مىنە, وسىلاردىڭ بارلىعى باستى سىي «سەركە» ءۇشىن كۇرەستە كەرى شەگىنۋدىڭ مۇمكىن ەمەستىگىن دالەلدەيدى. شەڭبەرگە تۇيىقتالعان كومپوزيتسيا شاباندوزداردى بىرىكتىرەدى.
ولاردىڭ قوزعالىسى سەركەنىڭ اينالاسىنا قۇرىلعان. ءبىرىنشى پلانداعى قارا تۇلپارعا مىنگەن شاباندوز شەڭبەر كومپوزيتسياسىن ازداپ بۇزىپ تۇر, الايدا ونىڭ ءوزى كومپوزيتسياعا قوزعالىس قوسىپ تۇر. ەركىن بەينەلى تۇستەر ماڭىزدى ەلەمەنت سانالادى. بوياۋلاردىڭ جالپاق, شيراق جاعىلۋى الدى-ارتىن وراپ الاتىن قوزعالىستىڭ اجىراماس بولىگىنە اينالادى. تۋىندى شاپشاڭ قوزعالىستى, مۇنى دوڭەس جازىق پەن قالىقتاپ ۇشىپ بارا جاتقان اق بۇلتتار دا بىلدىرەدى.
كوكپار – ۇلتتىڭ مىنەزى. اۆتور شىعارماسى ارقىلى وسىنى دالەلدەيدى. ءۇي ىرگەسىنەن دۇبىرلەتىپ اتتار وتسە قانى تۋلاپ, كەرمەدەگى تۇلپارىنا تۇرمان سالاتىن قازاقتىڭ ءبىتىم-بولمىسى, مىنەز-قالپى وسى ويىندا جاتىر. كارتينا سونى ايعاقتاپ تۇرعانداي.