رۋبيك كۋبيگىن ساناۋلى سەكۋندتا قۇراستىراتىن تالاي شەبەر بار. جەلىدەن ۆيدەوسىن دا كورىپ, تاڭ-تاماشا بولىپ جاتامىز. الماتىنىڭ 12 جاستاعى تۇرعىنى تيمۋر وماروۆ بولسا, ءدال وسى كۋبيكتەردىڭ ءتۇسىن پايدالانىپ, ايگىلى ادامداردىڭ بەينەسىن, ءتۇرلى كومپانيالاردىڭ لوگوتيپىن بەينەلەپ شىعا الادى. ونەر يەسى بۇل ىسكە جىل باسىنان بەرى ماشىقتانىپ, ونەر تۋىندىلارىن كوپشىلىك نازارىنا ۇسىنا باستاعان.
تيمۋر قۇراستىرعان بەينەلەر ىشىندە ديماش قۇدايبەرگەن, فرەددي مەركيۋري, يلون ماسك, يمانبەك زەيكەنوۆ, توم كرۋز, ليونەل مەسسي, سكريپتونيت, گەننادي گولوۆكين, حابيب نۇرماگومەدوۆ, تاعى دا باسقا تانىمال تۇلعالار بار.
– العاش رەت 7 جاسىمدا رۋبيك كۋبيگىن قۇراستىرۋعا قىزىعا باستادىم. ينتەرنەتتەن ۆيدەولاردى قاراپ وتىرىپ ۇيرەندىم. ال كۋبيكتەردەن پورترەت جاساۋدى وسى جىلدىڭ باسىندا مەڭگەردىم. ينتەرنەتتەن ۋكراينالىق بالانىڭ ءدال وسىلاي پورترەت جاساعانىن كورىپ, قىزىعۋشىلىعىم وياندى. مەن دە سولاي ىستەپ كورگىم كەلدى. بۇل ماعان ەش قيىندىق تۋدىرعان جوق, – دەيدى تيمۋر.
پورترەتتىڭ ءبىر قىرىن قۇراستىرىپ شىعۋعا 10-14 سەكۋند جۇمساسا, تولىق پورترەتتى قۇراستىرۋعا ەكى ساعات ۋاقىت جۇمسايدى ەكەن. «باستاپقىدا فوتونى Photoshop باعدارلاماسىنا سالىپ, ونى بەلگىلى ءبىر پيكسەلدە رەتتەپ, سوسىن بارىپ قۇراستىرامىن» دەيدى.
قازىرگە دەيىن كۋبيكتەن جينالعان سۋرەتتەردى كورگەن يمانبەك, ديماش قۇدايبەرگەننىڭ اناسى سۆەتا ايتباەۆا, «Halyk Bank» اق ۇجىمى حابارلاسىپ, كوممەنتاري جازىپ, العىستارىن بىلدىرگەن.
تيمۋردىڭ اتا-اناسى فوتوگراف بولىپ جۇمىس ىستەيدى. بۇل دا ونىڭ شىعارماشىلىق تۇرعىدان دامي تۇسۋىنە ىقپال ەتكەنى ءسوزسىز. ءوزى كەلەشەكتە باعدارلامالاۋشى بولعىسى كەلەدى. سول ارمانىنا جەتۋ ءۇشىن ارنايى كۋرسقا دا قاتىسىپ ءجۇر. ودان بولەك دزيۋدو سەكتسياسى مەن اعىلشىن ءتىلى كۋرسىنىڭ دا تۇراقتى شاكىرتى.
– رۋبيك كۋبيگىنەن پورترەت قۇراستىرۋ – مەن ءۇشىن حوببي. وسى جۇمىستى ىستەپ, ينستاگرامدا كوپشىلىك كوڭىلىنەن شىعىپ جاتقانىما قۋانامىن. قانشاما ادامنىڭ العىسى مەن تىلەگى مەنى شابىتتاندىرا تۇسەدى, – دەيدى جاس تالانت.