نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ەلوردانىڭ شەتكى ايماقتارىنىڭ اباتتاندىرىلۋى جايلى ءمالىم ەتتى, دەپ حابارلايدى Egemen.kz.
«بۇگىن قالانىڭ شەتكەرى ايماقتارىنا باردىم. قالادا بارلىعى 280 مىڭ ادام تۇراتىن 16 ەلدى مەكەن بار. بۇل - ەلوردا حالقىنىڭ تورتتەن ءبىرى. ءاربىر ەلدى مەكەن بويىنشا قادامدىق ءىس-شارالار جوسپارى ازىرلەندى.
مىسالى, بىلتىر ەلدى مەكەندەردە 100-دەن استام كوشە اسفالتتالدى, 40-تان استام قوعامدىق كەڭىستىك (ساياباقتار, سكۆەرلەر, بۋلۆارلار) جانە اۋلالار اباتتاندىرىلدى. بىرقاتار الەۋمەتتىك نىساندار, سونىڭ ىشىندە مەكتەپتەر مەن ء"ۇي ماڭىنداعى دارىگەر" نىساندارى جانە ت. ب. سالىندى.
13,5 كم ينجەنەرلىك جەلىلەر, 5 كم-دەن استام كارىز جانە سۋ قۇبىرى, 3 كم-دەن استام نوسەر كارىزى سالىندى. بۇل جۇمىستاردىڭ بارلىعىن جۇيەلى تۇردە جۇرگىزەمىز. ەلدى مەكەندەردى ارالاۋ بارىسىندا تۇرعىندارمەن وسى جىلعا ارنالعان جوسپارلار تالقىلاندى. ءاربىر ەلدى مەكەنگە بارىپ, ءىس-شارالار جوسپارىنا تۇرعىنداردىڭ قاجەتتىلىگىن ەنگىزەمىز.
بۇگىن سونداي-اق دەنە شىنىقتىرۋ-ساۋىقتىرۋ كەشەندەرى قۇرىلىسىنىڭ بارىسىمەن تانىستىم. ەگدە جاستاعى ادامدارعا ارنالعان كلۋبتار, حقكو, پوليتسيا پۋنكتتەرى, پوشتا بولىمشەلەرى ورنالاساتىن سپورت مەكەمەلەرى ءتورت ەلدى مەكەندە پايدا بولادى. تۇرعىندار سپورت كەشەندەرىنە تەگىن بارا الادى.
سونىمەن قاتار, مەملەكەت باسشىسىنىڭ تاپسىرماسىنا سايكەس بيىلعى جىلىتۋ ماۋسىمىندا بىرقاتار ەلدى مەكەن گازعا قوسىلدى. كوكتال-1 ەلدى مەكەنىندە جۇرگىزىلىپ جاتقان گاز تاراتۋ جەلىلەرىنىڭ قۇرىلىسى بارىسىمەن تانىستىم. بۇگىندە جۇمىستاردىڭ 90%-دان استامى ورىندالدى.
بۇعان دەيىن جەلەزنودوروجنىي, كوكتال-2, اگروقالاشىقتىڭ ء(بىر بولىگى) ەلدى مەكەندەرىنىڭ تۇرعىندارى گازعا قوسىلدى. سونداي-اق, 1-جەو جانە 2-جەو بىرقاتار سۋ جىلىتۋ قازاندىقتارى گازعا اۋىستىرىلدى.
2021 جىلدىڭ سوڭىنا دەيىن وڭتۇستىك-شىعىس (وڭ جانە سول جاعى), پرومىشلەننىي, كوكتال-1, اگروقالاشىق ەلدى مەكەندەرى گازبەن قامتاماسىز ەتىلەدى. سونداي-اق, "قازترانسگاز ايماق " اق
كۇيگەنجار, ينتەرناتسيونالنىي, ميچۋرينو ەلدى مەكەندەرىندە وسى جىلدىڭ سوڭىنا دەيىن گاز وتكىزۋدى جوسپارلاپ وتىر.
گازداندىرۋ پروتسەسى ءۇش كەزەڭنەن تۇرادى. گازداندىرۋ قالانىڭ ەكولوگياسىن جاقسارتىپ قانا قويماي, جەكە سەكتور تۇرعىندارىنىڭ ءومىر ءسۇرۋ جاعدايىن جەڭىلدەتۋگە مۇمكىندىك بەرەدى», — دەپ جازدى ەلوردا اكىمى.