بالالاردىڭ قۇقىقتارىن قورعاۋ كوميتەتى, بۇۇ بالالار قورى (يۋنيسەف) جانە ەكونوميكالىق زەرتتەۋلەر ينستيتۋتى بالالارعا ارنالعان بيۋدجەت ءادىسناماسى مەن بالالار ءال-اۋقاتىنىڭ قازاقستاندىق يندەكسىن ەنگىزۋ جونىندەگى بىرلەسكەن ءىس-شارالار جوسپارىنا قول قويدى, دەپ حابارلايدى Egemen.kz.
ۇلتتىق قوعامدىق سەنىم كەڭەسىنىڭ ءتورتىنشى وتىرىسىنداعى مەملەكەت باسشىسىنىڭ تاپسىرماسىنا سايكەس ءبىلىم جانە عىلىم مينيسترلىگى بالالار ءال-اۋقاتىنىڭ يندەكسىن ازىرلەپ جاتىر.
«يندەكستىڭ ماقساتى – ءار ءتۇرلى سالادا بالالاردىڭ جاعدايىن جاقسارتۋ. يندەكس ەلىمىزدەگى بالالار ءال-اۋقاتىنىڭ جالپى جانە جەكە باعىتتار بويىنشا قانشالىقتى جاقسى ەكەنىن انىقتاۋعا مۇمكىندىك بەرەدى. سونداي-اق وڭىرلەردەگى ۇلتتىق ساياساتتىڭ تيىمدىلىگىن باقىلاۋعا نەگىز بولادى. يندەكستى ازىرلەۋ ءۇشىن ەلىمىزدەگى ەڭ وزەكتى كورسەتكىشتەر ىرىكتەلەدى. يندەكس وبەكتيۆتى جانە سۋبەكتيۆتى دەرەكتەردەن تۇرادى. دەرەكتەر قر رەسمي ستاتيستيكاسىنىڭ حالىققا جۇرگىزگەن ساۋالناما ناتيجەلەرى بويىنشا الىنادى.
ءۇش جاقتى ءىس-شارالار جوسپارىنا قول قويۋ – بىرلەسكەن جوبانى باستاۋعا مۇمكىندىك تۋعىزادى دەپ ويلايمىن. ءبىزدىڭ ورتاق مىندەتىمىز – يۋنيسەف يننوچەنتي زەرتتەۋ كەڭسەسىنىڭ جاھاندىق ءادىسناماسىنا نەگىزدەلگەن يندەكستىڭ بەيىمدەلگەن مودەلىن ازىرلەۋ. سونىمەن قاتار قازاقستان رەسپۋبليكاسىنداعى بالالاردىڭ ءومىرىن جاقسارتۋ ماقساتىندا مەملەكەتتىك ساياسات شەڭبەرىندە شەشىم قابىلداۋ», - دەدى قر بعم بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ.
ءوز كەزەگىندە قازاقستانداعى بۇۇ بالالار قورىنىڭ (يۋنيسەف) وكىلى ارتۋر ۆان ديزەن بالالارعا تەڭ مۇمكىندىكتەردى قامتاماسىز ەتۋ – يۋنيسەف-ءتىڭ ەڭ ماڭىزدى مىندەتتەرىنىڭ ءبىرى ەكەنىن ايتتى.
«2022 جىلعا قاراي بالالار ءال-اۋقاتى يندەكسىنىڭ ىسكە قوسىلۋى ەلىمىزدەگى بالالاردىڭ جاعدايىن تۇراقتى تۇردە باقىلاۋعا جانە وبەكتيۆتى كورسەتكىشتەرگە نەگىزدەلگەن شەشىمدەر قابىلداۋعا مۇمكىندىك بەرەدى. بالالاردىڭ ءال-اۋقاتىن ۇلتتىق مونيتورينگ جۇيەسى – بۇل قازاقستان ءۇشىن ماڭىزدى جوبا. يندەكس ۋاقىت وتە كەلە بالالاردىڭ ءومىر ءسۇرۋ ساپاسى قالاي وزگەرەتىنىن جانە ولاردىڭ ءال – اۋقاتىنداعى ماسەلەلەردى كورسەتە الادى», دەپ اتاپ ءوتتى يۋنيسەف-ءتىڭ قازاقستانداعى وكىلى ارتۋر ۆان ديزەن.