مەملەكەت باسشىسى قاسىم-جومارت توقاەۆ تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىندە: ء«بىز باۋىرلاس ەلدەردىڭ جاستارىنا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە باكالاۆريات باعدارلاماسى بويىنشا وقۋ ءۇشىن 50 گرانت بولۋگە دايىنبىز (ياساۋي اتىنداعى ستيپەنديا)», دەدى.
بۇل – ارينە ەڭ الدىمەن تۇركى جۇرتىنا ورتاق باباعا كورسەتىلگەن قۇرمەت. ال ەكىنشىدەن, مەملەكەت تاراپىنان پرەزيدەنتتىڭ ستۋدەنت جاستاردى قولداۋى دەپ قابىلدايمىز. شىنىندا بۇل ۋنيۆەرسيتەتتىڭ ءوزى – ىرگەتاسى ەل ەگەمەندىگىمەن قاتار قالانىپ, وركەندەپ كەلە جاتقان تاۋەلسىزدىكتىڭ تارتۋى. مۇندا قانشاما تۇركىتىلدەس ەلدەردەن كەلگەن باۋىرلارىمىز ءبىلىم الىپ ءجۇر. سول سەبەپتى بۇل – باۋىرمالدىقتىڭ ءبىر بەلگىسى.
كوپ سىنىپتاستارىم ەلورداعا, الىپ الماتىعا قاراي ۇمتىلعاندا مەن تۇركىستانداي شاعىن قالاداعى وسى ۋنيۆەرسيتەتتى تاڭدادىم. قازىر سول شەشىمىمە شىن قۋانامىن. ويتكەنى «جىل ستۋدەنتى» رەتىندە ەلىمىزدەگى 8 مەديتسينالىق جوعارى وقۋ ورنىندا بولىپ, تانىسىپ كوردىم. سوندا مەن ءدال ءبىزدىڭ ۋنيۆەرسيتەتتەگىدەي قورى باي كىتاپحانانىڭ باسقا ەشبىر جوو-دا جوق ەكەنىنە كوز جەتكىزدىم. قازىر تۇركىستان تانىماستاي وزگەردى, مىنە, اتالعان ستيپەنديا تۇركىستاننىڭ ستۋدەنتتەر قالاسىنا اينالۋىنا سەپتىگىن تيگىزەدى دەگەن ويدامىن.
ال مۇنداي مول مۇمكىندىكتى, زور موتيۆاتسيا بەرەر ستيپەنديانى تەك ساباق وقۋمەن عانا شەكتەلمەيتىن, قوعامدىق ومىرگە دە بەلسەندى ءبىلىم الۋشىلارعا بەرگەن دۇرىس. سەبەبى سونداي ىزدەنۋشىدەن عانا بولاشاقتا ەلدەگى ماڭىزدى وقيعالاردىڭ بەل ورتاسىندا جۇرەتىن, قوعامداعى وزەكتى ماسەلەلەردى شەشۋگە قابىلەتتى, كاسىبي مامان شىعادى.
شامسۋددين قايرات ۇلى,
ق.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى