مۇنداي كورمە بۇرىن-سوڭدى شىعىستا بولماعان. بۇگىن 1 ءساۋىر – كۇلكى كۇنىنە وراي وسكەمەندەگى ا. پۋشكين اتىنداعى كىتاپحانادا «ەزۋ تارتار» اتتى شارج, كاريكاتۋرا كورمەسى ءوتتى.
كاريكاتۋرا – جاۋىنگەر جانر. بۇل جانر قوعامداعى تۇيىتكىلدى ماسەلەلەردى, حالىق پىكىرىن سۋرەت ارقىلى بيلىككە جەتكىزۋدىڭ ءبىر جولى. بيلىك دەيمىز, وكىنىشتىسى كورمەدە اكىمدىكتەگى باسشىلاردىڭ ءبىرى دە باس كورسەتپەدى. كەلسە, وزدەرىنە قاتىستى بىرقاتار ماسەلەلەردى ءتۇرتىپ الۋلارىنا بولار ەدى. جەمقورلىق, پاراقورلىق, اكىم-قارالاردىڭ جۇمىستارىنا دەگەن سالعىرتتىعى كاريكاتۋرالاردا ايقىن بەينەلەنىپتى. كورەرمەندى ءبىر كۇلدىرىپ, ءبىر جىلاتاتىنداي-اق سۋرەتتەر. سونىمەن قاتار, دوستىق شارجدار دا توپتاستىرىلدى.
شارا باسىندا شارج شەبەرى ەركىن نۇرازحان ەكران ارقىلى جەرلەس سۋرەتشىلەرىنە جۇرەكجاردى لەبىزىن ءبىلدىردى.
– بۇگىنگى اقپارات زامانىندا كاريكاتۋرا ونەرى قوعامعا اۋاداي قاجەت. كاريكاتۋرا, ساتيرا, شارج جانرىنداعى سۋرەتتەر ءتىلدى قاجەت ەتپەيدى. كەنجە قالعان ونەردى قولعا الىپ, كورمە وتكىزىپ جاتقان جەرلەستەرىمە ساتتىلىك تىلەيمىن, – دەدى ەركىن نۇرازحان.
ءيا, قىلقالامدارى جۇيرىك, ويلارى ۇشقىر سۋرەتشىلەردىڭ جۇمىستارى كورمەدە كوزگە بىردەن ءتۇستى. شىعىستاعى كاسىبي, اۋەسقوي سۋرەتشىلەردىڭ باسىن قوسىپ, «جاڭعىرۋ» بىرلەستىگىن قۇرعان قۇداش نۇرسادىقوۆ كاريكاتۋرانىڭ قيىن جانر ەكەنىن ءسوز ەتتى.
– سۋرەت سالۋ ءبىر باسقا دا, سويلەپ تۇرعان كاريكاتۋرا سالۋ مۇلدەم باسقا ەكەن. العاشىندا جۇرەكسىنگەنىمىزبەن, ءبىراز ماسەلەنى كوتەرەتىندەي كاريكاتۋرا سالىپ جىبەردىك. بۇل العاش رەت ءوتىپ وتىرعاندىقتان كەم-كەتىكتەر بار شىعار. ونىڭ ءبارى الداعى ۋاقىتتا تۇزەلەدى. بۇيىرسا, كاريكاتۋرا كورمەسىن جىلدا 1 ساۋىردە ءداستۇرلى تۇردە وتكىزەمىز, – دەدى سۋرەتشىلەر وداعىنىڭ مۇشەسى قۇداش نۇرسادىقوۆ.
شارا سوڭىندا قىلقالام شەبەرلەرى كەلگەن كورەرمەندەرگە ارناپ شەبەرلىك ساباقتارىن وتكىزدى.