كەشە دەنساۋلىق ساقتاۋ ءمينيسترى الەكسەي تسوي ەلىمىزدەگى كوروناۆيرۋس ينفەكتسياسىنىڭ تارالۋ جاعدايىنا قاتىستى پىكىر ءبىلدىردى.
«قازاقستان رەسپۋبليكاسىندا 30 ناۋرىزداعى جاعداي بويىنشا 243 318 ناۋقاستان Covid-19 انىقتالدى جانە 50 433 ادامعا كۆي- (مينۋس) دياگنوزى قويىلدى. 218 031 ادام كۆي+ جانە 47 837 ازامات كۆي- (مينۋستان) جازىلىپ شىقتى. سوڭعى 2 اپتادا الماتى, نۇر-سۇلتان, شىمكەنت قالالارىندا, اقتوبە, الماتى وبلىستارىندا ناۋقاس سانى ارتىپ, جالپى كۆي جۇقتىرعاندار 1,5 ەسە ءوستى», دەدى مينيستر.
ونىڭ ايتۋىنشا, جالپى ىندەت جۇقتىرۋدىڭ 56 پايىزى الماتى قالاسى تۇرعىندارىنا تيەسىلى. قالادا اقپاندا تاۋلىگىنە 100 جاعداي, ناۋرىزدا تاۋلىگىنە 500 جاعداي تىركەلدى. نۇر-سۇلتان قالاسىندا اقپاندا تاۋلىگىنە 100 جاعداي, ناۋرىزدا تاۋلىگىنە 350 جاعدايعا جەتتى.
«ناقتىراق ايتساق, 4 ءوڭىر قاۋىپتى ايماقتا (قىزىل ايماقتا) تۇر. بۇلار – الماتى, نۇر-سۇلتان قالالارى, باتىس قازاقستان جانە اتىراۋ وبلىستارى. 3 ءوڭىر (اقتوبە, الماتى جانە قاراعاندى وبلىستارى) – سارى ايماقتا. قالعان 10 ءوڭىر – جاسىل ايماقتا. ەپيدەميالىق جاعداي ناشارلاعان «سارى» جانە «قىزىل ايماققا» اۋىسقان وڭىرلەردە قوسىمشا شەكتەۋ شارالارى ەنگىزىلدى», دەدى ول.
سونىمەن قاتار ول ۇلتتىق قوعامدىق دەنساۋلىق ساقتاۋ ورتالىعى فيليالىنىڭ رەفەرەنس-زەرتحاناسى جۇرگىزگەن زەرتتەۋلەردىڭ قورىتىندىسى بويىنشا قازاقستان رەسپۋبليكاسىندا «بريتاندىق», «وڭتۇستىك افريكالىق», «برازيليالىق» شتامعا ءتان ىقتيمال مۋتاتسيا انىقتالعانىن العا تارتتى.
«زەرتتەۋ قورىتىندىسى بويىنشا شىعىس قازاقستان, قوستاناي, پاۆلودار جانە سولتۇستىك قازاقستان وبلىسىنان وزگە وڭىرلەردە «بريتاندىق», «وڭتۇستىك افريكالىق», «برازيليالىق» شتامعا ءتان ىقتيمال مۋتاتسيا انىقتالدى. الماتى قالاسىندا ناۋقاستاردان الىنعان دنك-نىڭ سەكۆەنيرلەۋ ناتيجەسى بويىنشا «بريتاندىق» جانە «وڭتۇستىك افريكالىق» شتامىنىڭ اينالىمى بەلگىلەنگەن», دەدى ا.تسوي.
ونىڭ سوزىنشە, دۇنيەجۇزىلىك دەنساۋلىق ساقتاۋ ۇيىمىنىڭ 2021 جىلعى 30 ناۋرىزداعى دەرەكتەرى بويىنشا «بريتاندىق شتامم» – 125 ەلدە, «وڭتۇستىك افريكالىق» – 75 ەلدە, ال «برازيليالىق» – 41 ەلدە انىقتالدى. كوروناۆيرۋستىڭ جاڭا شتامدارى مەن العاشقى شتامنىڭ بەلگىلەرى بىردەي – دەنە تەمپەراتۋراسى كوتەرىلەدى, جوتەل جانە ادام ءدام مەن ءيىس سەزبەي قالادى. ددۇ مالىمەتتەرى بويىنشا ۆيرۋستىڭ ىقتيمال مۋتاتسياسى ادامداردىڭ ىندەتتى جۇقتىرۋ جيىلىگىنە قاراي ارتادى.
«جاڭا ۆيرۋس كوپ تاراعان ەلدەردىڭ تاجىريبەسىنە قاراساق, الەۋمەتتىك اراقاشىقتىق ساقتاۋ ناتيجەسىندە جانە دەنساۋلىق ساقتاۋ ۇيىمدارىندا ينفەكتسيانىڭ الدىن الۋ جانە باقىلاۋ شارالارىن قولدانۋ ارقىلى COVID-19 اۋرۋى تومەندەگەن», دەدى مينيستر.
سونداي-اق ۆەدومستۆو باسشىسى كۆي-گە قارسى ۆاكتسينانى ەلدە قانشا ادام سالدىرعانىن ايتتى.
«كوروناۆيرۋس ينفەكتسياسىنا قارسى ۆاكتسينالاۋ جالعاسۋدا. بۇگىندە ءبىرىنشى كومپونەنت 131 170 ادامعا ەگىلدى. 22 اقپاننان باستاپ ەكىنشى كومپونەنتتى ەگۋ باستالدى, 32 482 ادام ەگىلدى, جاعىمسىز رەاكتسيا تىركەلگەن جوق», دەدى مينيستر.
قازىر وڭىرلەرگە كۆي-گە قارسى ۆاكتسينالاۋ 150 مىڭ دوزاسى جەتكىزىلىپ جاتىر.
«بۇدان باسقا, ساۋىردە ءتۇرلى وندىرۋشىلەردەن قوسىمشا 2,5 ملن دوزا ۆاكتسينا جەتكىزۋ جوسپارلانىپ وتىر. ۆاكتسينانىڭ بۇل كولەمى كۆي-گە قارسى ۆاكتسينالاۋعا جاتاتىن كونتينگەنتتى جانە ۆاكتسينا سالدىرعىسى كەلەتىن ادامدارعا ەكپەنىڭ قولجەتىمدىلىگىن بارىنشا كەڭەيتۋگە مۇمكىندىك بەرەدى. ۆاكتسينالاۋ ۆيرۋستىڭ تارالۋىن ازايتۋدىڭ جالعىز جولى ەكەنىن ەسكە سالامىز. وسىعان بايلانىستى قارسى كورسەتكىشتەر بولماسا, قازاقستاندىقتاردى ەكپە سالدىرۋعا شاقىرامىن», دەدى ا.تسوي.
دەنساۋلىق ساقتاۋ مينيسترلىگىنىڭ كەشەگى كۇنگى تاراتقان مالىمەتى بويىنشا 24 180 ادام كوروناۆيرۋس ينفەكتسياسىنان ەمدەلۋدە, ولاردىڭ ىشىندە 8 130 پاتسيەنت ستاتسيوناردا, 16 050 ناۋقاس امبۋلاتوريالىق دەڭگەيدە ەم قابىلداۋدا. ىندەتكە شالدىققانداردىڭ اراسىندا 364 ادامنىڭ جاعدايى اۋىر, 76 پاتسيەنتتىڭ جاعدايى وتە اۋىر, 46 ناۋقاس ءوجج اپپاراتىندا جاتىر.
ءسوز سوڭىندا ا.تسوي كارانتين شەكتەۋلەرىن ءجيى بۇزاتىن وڭىرلەردى دە تىلگە تيەك ەتتى.
«حالىق اراسىندا ۆيرۋستىڭ قاۋىپتىلىگىنە سەنبەيتىن ادامدار بار, ولار ۇيلەنۋ تويلارىن, بانكەتتەردى جەكە ۇيلەر مەن كوتتەدجدەردە وتكىزۋدى جالعاستىرىپ كەلەدى. مونيتورينگ توپتارىنىڭ ەنگىزىلگەن شەكتەۋ شارالارى مەن ەسكەرتۋلەرىنە قاراماستان, سانيتارلىق-ەپيدەميالىق تالاپتاردى ساقتاماي جۇمىس ىستەپ تۇرعان نىسانداردى انىقتاۋ جالعاسۋدا», دەدى مينيستر.
ونىڭ ايتۋىنشا, ناۋرىزدا شەكتەۋ ءىس-شارالارىن, كارانتين تالاپتارىنىڭ ساقتالۋىن باقىلاۋ ماقساتىندا 16 030 رەيد جۇرگىزىلدى.
«وسى ورايدا 102 966 نىسان تەكسەرىلدى, ونىڭ ىشىندە 2864 نىسان اكىمشىلىك شارالارعا قاراماستان, بەلگىلەنگەن شەكتەۋ تالاپتارىن, جۇمىس رەجىمىن بۇزۋدى جالعاستىرىپ كەلەدى, ياعني بۇقارالىق ءىس-شارالار وتكىزىپ جاتىر. 3021 اكىمشىلىك ءىس قوزعالدى», دەدى ا.تسوي.
ونىڭ سوزىنە قاراعاندا, مۇنداي نىساندار شىعىس قازاقستان وبلىسىندا, الماتى جانە شىمكەنت قالالارىندا ءجيى تىركەلەدى.
«بۇگىنگى تاڭدا ەلىمىزدە كارانتيندىك شارالاردى قاساقانا بۇزعان 512 ادام انىقتالدى. وڭىرلەر بويىنشا شىمكەنت, نۇر-سۇلتان, الماتى قالالارى, جامبىل, قوستاناي, پاۆلودار وبلىستارى كوش باستاپ تۇر. 512 قۇقىق بۇزۋشىنىڭ اراسىندا 486-سى شاعىن بيزنەس وكىلى, تورتەۋى ورتا كاسىپكەرلىك نىسانى جانە 22 جەكە تۇلعا بار», دەپ ناقتىلادى ول.