ىرگەمىزگە ءىز سالعان ىندەتتىڭ اسقىنباسا ازاياتىن ءتۇرى جوق. جۇقتىرعان جۇرتتىڭ دا قاتارى قالىڭداپ جاتقانى بەلگىلى. ءدۇيىم دۇنيەنى دۇرلىكتىرگەن دەرت دابىل قاعىپ, دابىرا قىلعاننان كەتپەيتىنىن كورسەتتى. كەرىسىنشە, سالعىرتتىققا سالىنباي ساۋلىقتى ويلاعانداردىڭ سىرقاتتى جۇقتىرمايتىنىن اڭعارتتى.
دەنساۋلىق ساقتاۋ مينيسترلىگىنىڭ كەشەگى كۇنگى تاراتقان مالىمەتى بويىنشا 23 310 ادام كوروناۆيرۋس ينفەكتسياسىنان ەمدەلۋدە, ولاردىڭ ىشىندە 7 811 پاتسيەنت ستاتسيوناردا, 15 499 ناۋقاس امبۋلاتوريالىق دەڭگەيدە ەم قابىلداۋدا. 348 ادامنىڭ جاعدايى اۋىر, 81 پاتسيەنتتىڭ جاعدايى وتە اۋىر, 52 ناۋقاس ءوجت اپپاراتىندا جاتىر.
قازىرگى ۋاقىتتا نۇر-سۇلتان قالاسىندا ينفەكتسيالىق ستاتسيونارلاردا COVID-19 جۇقتىرعان 489 پاتسيەنت ەمدەلىپ جاتىر. بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ مالىمدەدى. ول ەلوردادا رەانيماتسيا بولىمىندە ەم قابىلداپ جاتقان ناۋقاستار سانى ارتقانىن, قازىرگى ۋاقىتتا 55 ادام جانساقتاۋ بولىمىندە جاتقانىن جەتكىزدى.
«COVID-19 ينفەكتسياسىن جۇقتىرعان پاتسيەنتتەر سانى ناۋرىز ايىنداعى مەيرامداردان كەيىن كۇرت ارتقانى بايقالىپ وتىر.
بۇل سانيتارلىق نورمالاردى ساقتاماي, جۇرتتىڭ جاپپاي جينالاتىن ورىندارعا بارۋى جانە كارانتين رەجىمىن ساقتاماۋى سەبەپتى بولىپ وتىر.
ەلوردالىق دارىگەرلەر مەن مەديتسينالىق قىزمەتكەرلەردىڭ ءبارى ەكى ەسە جۇكتەمەمەن جۇمىس ىستەپ ءجۇر. بۇگىنگى تاڭدا ينفەكتسيامەن كۇرەسكە 3 700-دەن استام مەديتسينا قىزمەتكەرى تارتىلدى. قاجەت بولعان جاعدايدا جۇمىلدىرىلاتىن قوسىمشا كادرلىق رەزەرۆ بار», دەدى ت.مۇراتوۆ.
بۇگىنگى تاڭدا ەلوردادا 11 اۋرۋحانا, ونىڭ ىشىندە 10 ينفەكتسيالىق, ءبىر كارانتيندىك «رامادا پلازا قوناقۇيى», ءۇش مەديتسينالىق ۇيىم بازاسىندا قوسىمشا 300 ينفەكتسيالىق توسەكتىك ورىن بار.
«كۆي-مەن كۇرەسۋ ءۇشىن اتالعان ستاتسيونارلار باسقا اۋرۋلارمەن اۋىراتىن ناۋقاستاردى بۇرىنعىداي جوسپارلى دا, شۇعىل دا تارتىپپەن ەمدەي الاتىن بولادى», دەپ اتاپ ءوتتى قالالىق قوعامدىق دەنساۋلىق ساقتاۋ باسقارماسىنىڭ باسشىسى.
قالانىڭ باس مەملەكەتتىك سانيتارلىق دارىگەرى سارحات بەيسەنوۆا نۇر-سۇلتان قالاسى ەپيدەميالىق جاعدايدى باعالاۋ ماتريتساسى بويىنشا 17 كۇننەن بەرى «قىزىل ايماقتا» تۇرعانىن, كۇنىنە 150-دەن 280-گە دەيىن جاعداي تىركەلەتىنىن مالىمدەدى.
«قالا 17 كۇننەن بەرى ەپيدەميالىق جاعدايدى باعالاۋ ماتريتساسى بويىنشا «قىزىل ايماقتا» ورنالاسقان. كۇنىنە 150-دەن 280-گە دەيىن جاعداي تىركەلەدى. سوڭعى اپتادا سىرقاتتانۋشىلىق دەڭگەيى الدىڭعى اپتادان 21%-عا جوعارى, 100 مىڭ تۇرعىنعا شاققانداعى قارقىندى كورسەتكىش – 129,6 قۇرادى. رەپرودۋكتيۆتى سانى – 0,99», دەدى س.بەيسەنوۆا.
سانيتارلىق دارىگەردىڭ مالىمەتىنشە, 2021 جىلدىڭ باسىنان بەرى قالا بويىنشا سىرقاتتانعاندار سانى 10 مىڭنان استى, پاندەميا باستالعالى 28 756 جاعداي تىركەلدى (ونىڭ ىشىندە 18 285 – سيمپتوماتيكالىق جانە 10471 – سيمپتومسىز). اقپان ايىندا سىرقاتتانۋشىلىق ديناميكاسى قاڭتارمەن سالىستىرعاندا 25%-عا تومەندەگەنى بايقالدى. الايدا سوڭعى التى ايداعى ەڭ جوعارى كورسەتكىش – قاڭتار ايىندا ورىن العان جوعارى دەڭگەيدىڭ قايتالانىپ وتىرعانى بايقالادى.
«وسى مەرەكەلىك اپتادا ناۋقاستارمەن بايلانىستا بولعاندار سانى 10%-عا ءوستى, ياعني 500-دەن 735 ادامعا دەيىن, بۇل قالا تۇرعىندارىنىڭ كارانتيندىك شارالاردى, ونىڭ ىشىندە ءۇي كارانتين رەجىمىن ساقتاماعانىن كورسەتەدى. سونىمەن قاتار وتكەن اپتامەن سالىستىرعاندا بالالار اراسىندا اۋرۋدىڭ 5%-عا, ياعني 210-نان 339-عا دەيىن ءوسۋى بايقالادى», دەپ اتاپ ءوتتى ەلوردانىڭ باس سانيتارلىق دارىگەرى.
قازىرگى ۋاقىتتا بەلسەندى وشاقتار سانى – 1 512, ونىڭ ىشىندە: ءۇي – 976, ۇيىمداستىرىلعان – 536, وندا 3361 بايلانىستا بولعان ادام مەديتسينالىق باقىلاۋدا. سونىمەن قاتار قالا تۇرعىندارى مەن قوناقتارىنا, سول سياقتى كاسىپكەرلىك سۋبەكتىلەرىنە كارانتين رەجىمىنىڭ تالاپتارىن قاتاڭ ورىنداۋ مىندەتتەلەدى. ەلوردانىڭ باس سانيتارلىق دارىگەرى س.بەيسەنوۆانىڭ ايتۋىنشا, ءاربىر اۋدان اكىمدىگىندە 8 مونيتورينگتىك توپ قۇرىلعان.
«2021 جىلعى 19-24 ناۋرىز ارالىعىندا مونيتورينگتىك توپتار 198 رەيد جۇرگىزدى, ونىڭ بارىسىندا 756 نىسان تەكسەرىلىپ, شەكتەۋ جانە كارانتين تالاپتارىن ساقتامايتىن 40 نىسان انىقتالدى. 2021 جىلعى 1 قاڭتاردان 19 ناۋرىزعا دەيىن اۋداندىق پوليتسيا باسقارمالارىنان 319 ماتەريال كەلىپ ءتۇستى, ونىڭ ىشىندە 21 172 830 تەڭگە سوماسىنا 95 اكىمشىلىك ايىپپۇل قارالدى جانە سالىندى, 12 276 370 تەڭگە سوماسىنا 72 ايىپپۇل قىسقارتىلعان تارتىپپەن تولەندى, 59-ى قاراۋسىز قالدىرىلدى (فوتو, بەينە ماتەريال جوق), 19-ى نازارعا الىندى, 21-ىندە بۇزۋشىلىق فاكتىسى راستالمادى, 2 ماتەريال بويىنشا جازاعا تارتۋ مەرزىمى (2020 جىلعى قازان, قاراشا) اياقتالدى», دەدى س.بەيسەنوۆا.
مامانداندىرىلعان اۋدانارالىق اكىمشىلىك سوتقا كارانتين تالاپتارىن ورىندامايتىن 47 «قاساقانا بۇزۋشىعا» قاتىستى 54 ماتەريال جىبەرىلدى. قازىرگى ۋاقىتتا ەلوردانىڭ 13 كاسىپكەرلىك نىسانىنىڭ قىزمەتى توقتاتىلدى, ولاردىڭ ىشىندە: تekuila كاراوكە-بارى, ZOLOTO مەيرامحاناسى, Stories لاۋندج بارى (قازىرگى ۋاقىتتا «دۆا گرۋزينا»), «Abba» لاۋندج بارى, الانيا» تۇنگى كلۋبى, Echo لاۋندج بارى, «جانىم سول» كاراوكە-بارى, Kango باتۋت ورتالىعى, Ginza كاراوكە-مەيرامحاناسى, Alanya كاراوكە-مەيرامحاناسى, Nirvana بارى, «لوتو-كلۋبى» بار.
«ايتا كەتۋ كەرەك, قازاقستان زاڭناماسىنىڭ تالاپتارىن قاساقانا ەلەمەۋ جانە كاسىپكەرلىك سۋبەكتىلەرىنىڭ قىزمەتىن ۋاقىتشا توقتاتۋ بولىگىندە سوت جانە سوت ورىنداۋشىلارىنىڭ قاۋلىلارىن ورىنداماۋ فاكتىلەرى بار. بۇگىنگى تاڭدا كوروناۆيرۋس ينفەكتسياسى بويىنشا ەپيدەميالىق جاعداي تۇراقسىز, ەلوردا ءالى دە «قىزىل ايماقتا» تۇر, قالا تۇرعىندارى اراسىندا كوروناۆيرۋس ينفەكتسياسى جاعدايلارىنىڭ ءوسۋى بايقالادى. الايدا بۇعان قاراماستان جەكە تۇلعالار مەن كاسىپكەرلىك سۋبەكتىلەرى قازاقستان رەسپۋبليكاسى مەن نۇر-سۇلتان قالاسىنىڭ باس مەملەكەتتىك دارىگەرىنىڭ بۇقارالىق ءىس-شارالاردى وتكىزۋگە تىيىم سالۋ تۋرالى قاۋلىسىنىڭ تالاپتارىن ساقتامايدى», دەپ تۇيىندەدى ەلوردانىڭ سانيتارلىق دارىگەرى.