توكيو وليمپيادا ويىندارىنىڭ ۇيىمداستىرۋ كوميتەتى جازعى ويىندار پاندەمياعا بايلانىستى شەتەلدىك كورەرمەنسىز وتەتىنىن رەسمي مالىمدەدى. جاپونيانىڭ ۇيىمداستىرۋ كوميتەتىنىڭ پرەزيدەنتى سەيكو حاشيموتو ءباسپاسوز ءماسليحاتىندا الەمدەگى قازىرگى جاعداي مەن ەلدىڭ مەديتسينالىق جۇيەسىنە اۋىرتپالىق تۇسىرمەس ءۇشىن وسىنداي شەشىم قابىلدانعانىن حابارلادى.
كوميتەت جاپونيادان تىس ساتىپ الىنعان 600 مىڭعا جۋىق وليمپيادا جانە 30 مىڭ پاراليمپيادا بيلەتتەرىن قايتارىپ بەرەدى. ال كوپتەن كۇتكەن ويىندى ستاديوندا تاماشالاي المايتىن كورەرمەن ءۇشىن ەستەن كەتپەس قارالىمدى ونلاين ۇيىمداستىرۋعا قولدان كەلگەننىڭ بارلىعى جاسالاتىنى ايتىلدى.
جاپونيادا تىركەلگەن ىندەت جۇقتىرعان ناۋقاستاردىڭ سانى وزگە ەلدەرمەن سالىستىرعاندا الدەقايدا از بولعانىمەن, كوپ ادام وليمپيادا مەن پاراليمپيادا ويىندارى كەزىندە ۇيىمداستىرۋشىلار ۆيرۋستىڭ تارالۋىنا جول بەرمەيدى دەگەنگە كۇمانمەن قارايدى. الەمنىڭ 15 مىڭعا جۋىق سپورتشىسى قاتىساتىن شارانىڭ قاۋپى جوعارى. سونىمەن قاتار جارىستار وتەتىن ستاديونداردىڭ تەك 50 پايىزىن تولتىرۋ كوزدەلىپ وتىر. ساۋىردە ويىندى كورۋگە مۇمكىندىك الاتىن شەنەۋنىكتەر, رەپورتەرلەر مەن سپورتشىلارعا كومەكتەسەتىن قىزمەتكەرلەر سانى انىقتالاتىن بولادى.