الەمدە از ۋاقىت ىشىندە دامىپ, وزىق ەلدەر قاتارىنا قوسىلعان مەملەكەتتەردىڭ مىسالى كوپكە ۇلگى بولا الادى. دۇنيە ءجۇزى عالىمدارى مەن ساراپشىلارى وڭتۇستىك-شىعىس ازيا ەلدەرىنىڭ دامۋ ستراتەگياسى مەن ەكونوميكالىق جەتىستىگىنە باسا نازار اۋدارىپ كەلەدى. سولاردىڭ ءبىرى سينگاپۋردىڭ وزىندىك مودەلىن ەرەكشە دەۋگە تولىق نەگىز بار.
1960-جىلداردىڭ اياعى مەن 1970-جىلدار ارالىعىندا ەلدە جۇمىسسىزدىق پەن تۇرعىن ءۇي داعدارىسى بەلەڭ العان. ءدال وسى كەزدە سينگاپۋر مەملەكەتتى تۇبەگەيلى جاڭعىرتۋ باعدارلاماسىنا بەلسەندى كىرىسكەن-ءدى. ەلدەگى ونەركاسىپ سالاسىن اياققا تۇرعىزىپ, ءىرى مەملەكەتتىك تۇرعىن ءۇي كەشەندەرى دامي باستادى. ودان بولەك, ءبىلىم بەرۋ مەن ينفراقۇرىلىمدى دامىتۋعا قىرۋار ينۆەستيتسيا تارتىلعان. ناتيجەسىندە, 90-جىلدارعا قاراي سينگاپۋر نارىقتىق ەكونوميكاسى دامىعان, حالىقارالىق ساۋدا بايلانىسى ورنىققان تابىستى ەلدەردىڭ بىرىنە اينالدى. قازىر ول ازياداعى جان باسىنا شاققانداعى ەڭ جوعارى ىشكى جالپى ونىمگە يە ەلدەردىڭ ءبىرى جانە بۇۇ-نىڭ ادام الەۋەتىنىڭ دامۋ يندەكسى (HDI) بويىنشا 11-ورىنعا جايعاسقان. سينگاپۋر – ترانسۇلتتىق كورپوراتسيالار ءۇشىن دە قولايلى ەلدەردىڭ بىرىنە اينالدى. بۇعان ەلدەگى سىبايلاس جەمقورلىقپەن كۇرەستىڭ جاقسى ناتيجەلەرى سەبەپ بولعان.
كوپتەگەن ماماندى ەلدەگى ەركىن نارىق پەن سوتسياليستىك پرينتسيپتەردىڭ ۇيلەسىم تاپقانى تاڭعالدىرادى. ەڭبەك نارىعىندا يمميگرانتتاردى قۇشاق جايا قارسى العان. سول شەتتەن كەلگەن جۇمىسشىلاردىڭ ەڭبەگى ەلەۋلى ەكەنى ايتىلعان. ەلدەگى سالىق دەڭگەيى دە تومەن. ناتيجەسىندە, حالىقتىڭ جالاقىسى جوعارى, ال ۇكىمەت جاناما سالىقتاردان جەتكىلىكتى تابىس تابادى. سينگاپۋر ەكونوميكاسىنىڭ ءبىر بولىگى سوتسياليستىك پرينتسيپتەرگە نەگىزدەلىپ, ول بويىنشا مەملەكەتتىك تۇرعىن ءۇي جوبالارى وتە تابىستى جۇزەگە اسقان. حالىقتىڭ 90 پايىزىنىڭ ءوز باسپاناسى بار. بۇل ۇيلەر ۇكىمەتتىڭ ارنايى باعدارلاماسىمەن بەرىلگەن. كوپ ساراپشىلاردى ساۋداعا كاپيتاليستىك كوزقاراس قالىپتاستىرعان ەلدە تۇرعىن ۇيگە كەلگەندە مۇلدەم باسقا سوتسياليستىك پىكىردىڭ بەلەڭ الۋى تاڭعالدىرادى. سينگاپۋردىڭ تۇرعىن ءۇي سالاسىن الەمدە ەڭ تابىستى شەشىلگەن جۇيە دەۋگە بارلىق نەگىز بار. ەلدەگى دەنساۋلىق ساقتاۋ جۇيەسى دە باسپانا ماسەلەسى سەكىلدى مەملەكەتتەن قىرۋار قارجى الادى. تۇرعىندار مەن جۇمىس بەرۋشىلەر ارنايى مەديتسينالىق ساقتاندىرۋ جۇيەسىنە تابىسىنىڭ ءبىر بولىگىن اۋدارىپ تۇرادى. ال سالانىڭ بارلىق شىعىنىن ۇكىمەت تولىعىمەن ءوز قالتاسىنان جابادى. وسىلايشا, اقش پەن رەسەيدىڭ ۇستانعان باعىتىنىڭ قوسىندىسى سينگاپۋردا ۇيلەسىم تاۋىپ, ەلدى وركەنيەت بيىگىنە كوتەردى.