الشاڭداپ باسقان, ارشىنداپ شاپقان الاش بالاسىنىڭ باسىنان تالاي عاسىر اۋناسا دا كومەيىنەن شىققان كۇمبىر ۋاقىت قۇلاعىندا ماڭگى قالدى. قۇزعىن جىلدار تۇياققا باسقانىمەن قازاقتىڭ قوڭىراۋ ءۇنى قۇمىعىپ شىققان ەمەس. ۇلى دالانىڭ ۋىسىندا ەركىن كوسىلدى, ەركىندىكتى ەنشىلەدى. تاريح تاقتاسىنا جازىلعان جاقۇت جازبالار بابا رۋحىنىڭ اسقاقتىعىن ايعاقتادى. ۇلىستى ۇرپاق سوعان قاراپ ۇرداجىق ءداۋىردى كەسكىندەدى. بولاشاق قولىنداعى قالام تەربەلدى, قىلقالام سويلەدى. بۇل سۋرەت – سونىڭ ءبىرى.
تاۋەلسىزدىكتى موينىنا تۇمار قىلىپ تاققان قازاق بالاسىنىڭ قيالىنا قانات بىتىرگەن, قادامىنا قۇت دارىتقان ءبىر قۇدىرەت بولسا, ول – ءباھادۇر بابالارىمىزدىڭ داڭقتى جولى. سول جولمەن قايتا ءجۇرۋ مۇمكىن بولماسا دا, ءداۋىر بەت-بەينەسىن زامان ىڭعايىنا سۇيەنىپ, اركىم ءارتۇرلى وي كەڭىستىگىندە بەينەلەيدى. مۇنداعى «عاسىرلار ءۇنى» كارتيناسى ءبىزدىڭ سول پىكىرىمىزدى ۇستەپ تۇرعانداي. اۆتورى – سۋرەتشىلەر وداعىنىڭ مۇشەسى, قازاق كسر-ءىنىڭ ش.ءۋاليحانوۆ اتىنداعى مەملەكەتتىك سىيلىقتىڭ لاۋرەاتى ءباتيما زاۋىربەكوۆا. سۋرەتشى وقىرمانعا ءداۋىر داۋىسىن جەتكىزۋگە وقتالعان.
ونىڭ قولىنان قازاقستاندىق, شەتەلدىك مۋزەيلەر مەن جەكە كوللەكتسيالاردا ساقتاۋلى تۇرعان گوبەلەن, كەسكىندەمە جانە گرافيكالىق (پورترەت, پەيزاج, ناتيۋرمورت, ابستراكتىلى كومپوزيتسيالار) جانرداعى 300-دەن استام تۋىندى شىقتى. بۇلاردىڭ ءبارى ۇلتىمىزدىڭ رۋحانياتىنا قۇيىلعان جاۋھار جادىگەرلەر. ءبىز وسى رەتتە وقىرمان نازارىنا تاريحقا استار بولعان تاماشا تۋىندىسىن ۇسىنىپ وتىرمىز.
قىلقالام شەبەرى «عاسىرلار ءۇنى» شىعارماسىندا قولا داۋىرىندەگى اتاقتى تامعالى پەتروگليفتەرىندەگى كونە بەينەلەر سيمۆولىن ۇتىمدى پايدالانعان. مۇندا قازاقستان اۋماعىن مەكەن ەتكەن حالىقتارمەن بايلانىس انىق بايقالادى. ءبىز كەنەپ بەتىندە تۇستەر مەن پىشىندەردىڭ ويناتىلۋىنان تۋعان ايەل, كۇنباستى قۇداي, بالبالداردىڭ پىشىندەرى ارقىلى ەجەلگى ءداۋىردىڭ داۋىسىن ەستيمىز.
تۋىندى ارا-اراسىندا ىرعاقتى اشەكەيگە اۋىساتىن جوعارىدان تومەن تۇسكەن ساۋلەدەي سىزىقتاردىڭ مايلى بوياۋ گامماسىمەن ورىندالعان. كارتينانىڭ كەڭىستىگى تۇستىك نازىك گراداتسيالارمەن اۋىستىرىلادى. فوندىق تىك سىزىقتار كومپوزيتسياداعى باستى بەينەلەردىڭ نوبايىن جاساۋدا ەرەكشە ءرول اتقارىپ تۇر.
كارتينا سيمۆوليزم ستيلىندە جازىلعان. سۋرەتشى جاسىرىن ۇندەۋدى, اللەگوريانى, ءتىپتى تەرەڭ فيلوسوفيالىق نەمەسە ميستيكالىق ءماندى شيفرلاردى قولدانعان. ولار كورەرمەندى تەرەڭ ويلانۋعا, سيۋجەتتى جەڭىل قابىلداۋدان باس تارتىپ جانە اۆتور ويىنىڭ ناعىز ءتۇيىنىن تابۋعا يتەرمەلەيدى.
قازاق حالقىنىڭ مادەني بۇلاقتارىنان سۋسىنداعان ب.زاۋىربەكوۆانىڭ شىعارماشىلىعى ءبىزدىڭ حالقىمىزدىڭ اسەم دۇنيەتانىمىمەن تانىستىرىپ, ۇلتتىق سانا-سەزىمدى ساقتاۋعا كومەكتەسەدى.