كەشە گەرمانيانىڭ كەلن قالاسىندا بوكسشىلاردىڭ حالىقارالىق ءتۋرنيرى ءوز مارەسىنە جەتتى. فينالدا قازاقستاننىڭ التى بوكسشىسى ونەر كورسەتكەنىمەن, ولاردىڭ ەكەۋىنە عانا باس جۇلدە بۇيىردى, دەپ حابارلايدى Egemen.kz
91 كيلو سالماقتا ونەر كورسەتكەن ايبەك ورالباي كوماندا قورجىنىنا العاشقى التىندى سالسا, +91 كيلو سالماق دارەجەسىندە كۇش سىناسقان قامشىبەك قونقاباەۆ تا قارسىلاس شاق كەلتىرگەن جوق. وسىلايشا, الىپتارمەن ايقاسىن جۇرگەن نار تۇلعالى قوس ساڭلاق نەمىس جەرىندە قازاق ەلىنىڭ ءانۇرانىن شىرقاتتى. جارىس جەڭىمپازى اتانعان قوس قانداسىمىزدىڭ ونەرى الەمنىڭ ءار قيىرىنان جينالعان مايتالمان ماماندار مەن جەرگىلىكتى جانكۇيەرلەر تاراپىنان وتە جوعارى باعالاندى.
ءدال سونداي قۇرمەتكە بولەنۋگە ساكەن بيبوسىنوۆ (52 كيلو), ورازبەك اسىلقۇلوۆ (57 كيلو), ەرتۋعان زەينۋلينوۆ (63 كيلو) جانە نۇربەك ورالبايدىڭ دا (81 كيلو) تاماشا مۇمكىندىگى بولدى. الايدا ايتۋلى بىلعارى قولعاپ شەبەرلەرى اقتىق سىنعا دەيىن القىنباي جەتكەندەرىمەن, شەشۋشى تۇستا ۇتىلىپ, كۇمىس مەدالدى قاناعات تۇتتى.
كەلندەگى ءداستۇرلى حالىقارالىق ءتۋرنيردىڭ قورىتىندىسى بويىنشا قازاقستاننىڭ ۇلتتىق قۇراماسى جالپى كوماندالىق ەسەپتە ءبىرىنشى ورىندى يەلەندى.