تالدىقورعان اكىمدىگى جۇماتاي جاقىپباەۆ پەن عالي ورمانوۆتى اجىراتا الماي ما؟

«ەگەمەن قازاقستان» گازەتىنىڭ №25 (30004) سانىندا «اقىندى ەلى ەلەمەسە, سول قايعى...» اتتى ماقالا جاريالانىپ, جىر جۇلدىزى جۇماتاي جاقىپباەۆقا ءوزى تۋىپ-وسكەن تالدىقورعان قالاسىنان كوشە جانە كىتاپحانانىڭ اتىن بەرۋ جايلى ماسەلە قوزعاعان بولاتىنبىز. ناتيجەسىندە, تالدىقورعان قالاسى اكىمىنىڭ ورىنباسارى س.ارزانبەكوۆا الماتى وبلىستىق تىلدەردى دامىتۋ جونىندەگى باسقارماسىنىڭ باسشىسى ب.كەرىمبەككە اقىنعا كوشە بەرۋ تۋرالى جۇمىستار جۇرگىزىپ جاتقانىن حابارلاعان. ول حاتتى وقىپ, كوڭىلىمىزدە كوپتەن جۇرگەن تۇيتكىلدىڭ شەشىمى تابىلعانىنا قۋانعانبىز. ايتسە دە, تالدىقورعان قالاسى اكىمدىگىنىڭ رەسمي ينستاگرام پاراقشاسىندا (taldykorganakimat) جۇماتاي جاقىپباەۆتىڭ سۋرەتىن سالىپ, ماقالامىزعا جاۋاپ رەتىندە قازاقتىڭ اياۋلى اقىنى عالي ورمانوۆقا كوشە بەرۋ تۋرالى ۇسىنىس حات تۇسپەگەنى ايتىلعان. ياكي, قالا اكىمدىگى جۇماتاي جاقىپباەۆ پەن عالي ورمانوۆتى اجىراتا الماي وتىر. ماتىندە بىلاي دەلىنگەن:

«تالدىقورعان قالاسىنىڭ اكىمدىگى «ەگەمەن قازاقستان» گازەتىندەگى «اقىندى ەلى ەلەمەسە, سول قايعى...» اتتى باسىلىمعا جاۋاپ رەتىندە كەلەسىنى حابارلايدى.تالدىقورعان قالاسىنىڭ اكىمدىگى بۇگىنگى كۇنگە دەيىن «تالدىقورعان قالاسىنداعى №4 ورتا مەكتەپكە بەلگىلى اقىن عالي ورمانوۆتىڭ ەسىمىن بەرۋ تۋرالى» رەسمي ۇسىنىس حاتى تۇسپەگەنىن جانە ۇسىنىس تۇسكەن جاعدايدا قولدانىستاعى زاڭناما تالاپتارىنا ساي ءتيىستى وناماستيكا كوميسسياسىنىڭ قاراۋىنا جولداناتىندىعىن حابارلايدى».

تالدىقورعان قالاسىنىڭ اكىمدىگى وبلىس باسشىسى اماندىق باتالوۆتىڭ تاپسىرماسىن ءالى دە تولىق تۇسىنبەگەن سىڭايلى. قازاق ادەبيەتىنىڭ الىپ تۇلعالارى عالي ورمانوۆ پەن جۇماتاي جاقىپباەۆتىڭ كىم ەكەنىن بىلمەيتىن قالا اكىمدىگى وسىلاي ۇياتقا قالىپ وتىر. سوندا تالدىقورعان قالا اكىمى ورىنباسارىنىڭ ءسوزى جالعان بولعانى ما؟

ال الماتى وبلىستىق مادەنيەت, ارحيۆتەر جانە قۇجاتتاما باسقارماسى ۆ.ماياكوۆسكي اتىنداعى قالالىق ورتالىق كىتاپحاناسىنا قازاقتىڭ ايتوبەل اقىنى جۇماتاي جاقىپباەۆتىڭ ەسىمى بەرىلسە دەگەن اقىن-جازۋشىلاردىڭ ۇسىنىسىنا ءالى رەسمي جاۋاپ قاتقان جوق.