شىمكەنتتە ءىز-ءتۇسسىز جوعالىپ كەتكەن وقۋشى قىز امان-ەسەن تابىلدى, دەپ حابارلايدى Egemen.kz Polisia.kz سايتىنا سىلتەمە جاساپ.
2021 جىلدىڭ 3 ناۋرىزىندا شىمكەنت قالاسى پوليتسيا دەپارتامەنتى ەڭبەكشى اۋدانى پوليتسيا باسقارماسىنا جەرگىلىكتى تۇرعىن ءوزىنىڭ كامەلەت جاسىنا تولماعان قىزى مەكتەپكە كەتىپ, قايتا ورالماعانى تۋرالى حابارلايدى.
اناسى قىزىن وزدەرى جان-جاقتى ىزدەپ تاپپاعاننان كەيىن پوليتسەيلەردىڭ كومەگىنە جۇگىنگەن. شىمكەنت قالاسى پوليتسيا دەپارتامەنتى ەڭبەكشى اۋدانى پوليتسيا باسقارماسىنىڭ قىزمەتكەرلەرىمەن جەدەل ىزدەستىرۋ ءىس-شارالارى جۇرگىزىلگەن.
ءتارتىپ ساقشىلارى مەن ۋچاسكەلىك پوليتسيا ينسپەكتورلارى سول ماڭداعى بارلىق كوشەلەر مەن اۋلالاردى مۇقيات قاراپ شىعىپ, ءوتىپ بارا جاتقان تۇرعىنداردان سۇراستىرۋ جۇمىستارىن جۇرگىزگەن. ناتيجەسىندە جوعالعان قىز امان-ەسەن تابىلىپ, وتباسىمەن قاۋىشتى.