2021 جىلى “بيولوگيالىق قاۋىپسىزدىك تۋرالى” زاڭ ازىرلەنەدى, - دەدى دەنساۋلىق ساقتاۋ ءمينيسترى الەكسەي تسوي قر پرەمەر-ءمينيسترىنىڭ ورىنباسارى ەرالى توعجانوۆتىڭ قاتىسۋىمەن وتكەن ۆەدومستۆونىڭ كەڭەيتىلگەن القا وتىرىسىندا.
«توتەنشە جاعداي كەزىندە زاماناۋي قورعانىس قۇرالدارىن ەنگىزۋ جانە ولاردىڭ تەرروريزمگە قارسى تۇراقتىلىعىن ارتتىرۋ ارقىلى بيولوگيالىق قورعايتىن جۇيەلەردى جەتىلدىرۋ قاجەت بولدى. وسىعان بايلانىستى, 2021 جىلى «بيولوگيالىق قاۋىپسىزدىك تۋرالى» زاڭ ازىرلەۋىمىز كەرەك», - دەدى دەنساۋلىق ساقتاۋ ءمينيسترى.
قر دەنساۋلىق ساقتاۋ ءمينيسترى الەكسەي تسوي ە.توعجانوۆقا 2020 جىلى سانيتارلىق-ەپيدەميولوگيالىق قىزمەتتى كۇشەيتۋ ءۇشىن سانيتارلىق-ەپيدەميولوگيالىق باقىلاۋ كوميتەتى قۇرىلعانىن, سونداي-اق قر باس مەملەكەتتىك سانيتارلىق دارىگەرىنىڭ مارتەبەسى مەن وكىلەتتىگى ارتقانىن حابارلادى.
بۇدان باسقا, قىزمەت ينفراقۇرىلىمىن جاڭعىرتۋ جانە ەلدىڭ بيوقاۋىپسىزدىگىن قامتاماسىز ەتۋ ءۇشىن جالپى سوماسى 55 ملرد.تەڭگەگە 2022–2025 جىلدارعا ارنالعان قوسىمشا قاجەتتىلىك ەسەبى جۇرگىزىلدى. قىزمەتتى تسيفرلاندىرۋ تۇجىرىمداماسى ازىرلەندى, ونى 2025 جىلعا دەيىن اياقتاۋ جوسپارلانىپ وتىر.
وسى زاڭدى ىسكە اسىرۋ شەڭبەرىندە باقىلاۋ جۇيەسىن جەتىلدىرۋ ءۇشىن حالىق دەنساۋلىعىن باعالاۋ, تالداۋ جانە بولجاۋ جۇيەسىن دامىتۋ, سونداي-اق قاتەرلەر مەن تاۋەكەلدەرگە دەن قويۋ ءۇشىن 38 نقا-عا تۇزەتۋلەر ەنگىزۋ كوزدەلىپ وتىر.
سانيتارلىق-ەپيدەميولوگيالىق قىزمەتتىڭ ينفراقۇرىلىمىن جاڭعىرتۋ ءۇشىن 2,9 ملرد.تەڭگە سوماسىنا 459 بىرلىك زەرتحانالىق جابدىق جانە كۆي مەن اسا قاۋىپتى ينفەكتسيالاردى دياگنوستيكالاۋ ءۇشىن 12 بىرلىك ءموبيلدى كەشەن ساتىپ الىندى.
2022-2024 جىلدارى كوميتەتتىڭ ايماقتىق بولىمشەلەرىنىڭ 54 عيماراتىنا جوندەۋ جۇرگىزىلەدى. 3 جاڭا زەرتحانا عيماراتىن سالۋ جانە ۇلتتىق ساراپتاما ورتالىعىنىڭ 27 عيماراتىن جوندەۋ جوسپارلانعان. كوميتەتتىڭ اۋماقتىق بولىمشەلەرىنە 64 بىرلىك اۆتوكولىك ساتىپ الىنادى.