تۇركىستان وبلىسىندا اۋا-رايىنىڭ كۇرت وزگەرۋىنە بايلانىستى كح-2 «ۇلانبەل-سوزاق-ەكپىندى» تاسجولى جابىلعان. دەگەنمەن جولعا شىققان شىمكەنت – ستەپنوي باعىتىنداعى اۆتوبۋس جانە باسقا دا اۆتوكولىكتەر قار قۇرساۋىندا قالعان.
شايان – شولاققورعان اراسىندا تاسكومىرساي اۋىلىنان شامامەن 15 شاقىرىم قاشىقتىقتا قار قۇرساۋىندا قالعان جولاۋشىلارعا كومەك كورسەتىلدى. وقيعا ورنىنا تۇركىستان وبلىسى توتەنشە جاعدايلار دەپارتامەنتىنەن 6 قىزمەتكەر, 2 تەحنيكا جۇمىلدىرىلعان. دەپارتامەنت ماماندارىنىڭ مالىمەتىنشە, 5 جەڭىل اۆتوكولىك جانە اۆتوبۋستا 50 جولاۋشى, ونىڭ ىشىندە 3 بالا بولعان. قار قۇرساۋىندا قالعان جولاۋشىلارعا كومەك كورسەتىلىپ, شولاققورعان اۋىلىنا جەتكىزىلدى.