قازاق مادەنيەتى مەن ونەرى اۋىر قازاعا دۋشار بولدى.
2013 جىلدىڭ 27 جەلتوقسانىندا 86 جاسقا قاراعان شاعىندا كسرو حالىق ءارتىسى, كۇلاش بايسەيىتوۆا اتىنداعى قازكسر مەملەكەتتىك سىيلىعىنىڭ جانە «تارلان» تاۋەلسىز سىيلىعىنىڭ لاۋرەاتى, كورنەكتى وپەرا ءانشىسى روزا ۇمبەتقىزى جامانوۆا دۇنيەدەن وزدى.
قازاق مادەنيەتى مەن ونەرى اۋىر قازاعا دۋشار بولدى.
2013 جىلدىڭ 27 جەلتوقسانىندا 86 جاسقا قاراعان شاعىندا كسرو حالىق ءارتىسى, كۇلاش بايسەيىتوۆا اتىنداعى قازكسر مەملەكەتتىك سىيلىعىنىڭ جانە «تارلان» تاۋەلسىز سىيلىعىنىڭ لاۋرەاتى, كورنەكتى وپەرا ءانشىسى روزا ۇمبەتقىزى جامانوۆا دۇنيەدەن وزدى.
روزا جامانوۆا مەملەكەتتىك ونەر ينستيتۋتىنىڭ ستۋدەنتى بولا ءجۇرىپ 1953 جىلى اباي اتىنداعى قازاق وپەرا جانە بالەت تەاترىنىڭ ساحناسىندا وپەرا ءانشىسى رەتىندە ونەر كورسەتتى. ونىڭ وزىندىك داۋىسى, سومداعان وبرازدارىنىڭ تەرەڭدىگى, جوعارى انشىلىك مادەنيەتى كورەرمەندەر مەن ءباسپاسوز نازارىن اۋدارىپ, جاس ءانشىنىڭ تەاتردىڭ جەتەكشى سوليستەرىنىڭ ءبىرى بولۋىنا, قازاق كسر-ءىنىڭ ەڭبەك سىڭىرگەن ءارتىسى (1957) جانە كسرو حالىق ءارتىسى (1959) قۇرمەتتى اتاقتارىن الۋىنا جول اشتى.
روزا ۇمبەتقىزى تەاتردىڭ وپەرالىق سپەكتاكلدەرىندە بارلىق دەرلىك باستى ايەل پارتيالارىن: دجۋزەپپە ۆەرديدىڭ «ايداسىندا» ايدانى, «بال-ماسكارادىندا» امەليانى, «تراۆياتاسىندا» ۆيولەتتانى, «دون كارلوسىندا» ەليزاۆەتانى جانە «ترۋبادۋرىندا» لەونورانى, دجاكومو ءپۋچچينيدىڭ «توسكاسىندا» فلوريانى, «بوگەماسىندا» ءميميدى, «چيو-چيو-سانداعى» مادام باتتەرفليايدى, شارل فرانسۋا گۋنونىڭ «فاۋستىندا» مارگاريتانى, جيۋل ماسسنەنىڭ «مانونىندا» مانوندى, پەتر چايكوۆسكيدىڭ «يولانتاسىندا» يولانتانى جانە «ەۆگەني ونەگينىندە» تاتيانانى ورىندادى. ول احمەت جۇبانوۆ پەن لاتيف ءحاميديدىڭ «اباي», مۇقان تولەباەۆتىڭ «ءبىرجان-سارا», ەۆگەني برۋسيلوۆسكيدىڭ «قىز جىبەك» پەن «ەر تارعىن», سىدىق مۇحامەدجانوۆتىڭ «ايسۇلۋ», ەركەعالي راحماديەۆتىڭ «قامار سۇلۋ» مەن «الپامىس», قۇددىس قوجامياروۆتىڭ «نازۋگۋم», عازيزا جۇبانوۆانىڭ «جيىرما سەگىز» بەن «ەڭلىك-كەبەك» سياقتى 20-دان استام قازاقستاندىق كومپوزيتورلاردىڭ وپەرالارىندا باستى پارتيالاردى شەبەرلىكپەن شىرقادى.
روزا جامانوۆا شەتەلدەردە گاسترولدىك ساپارلاردا بولىپ, كونتسەرت ءانشىسى رەتىندە كوپشىلىك ىقىلاسىنا بولەندى.
قۇرمانعازى اتىنداعى ۇلتتىق كونسەرۆاتورياسىنىڭ پروفەسسورى روزا ۇمبەتقىزى جاس ورىنداۋشىلاردى دايارلاۋعا, وقۋ-ادىستەمەلىك ادەبيەتتەرىن جاساۋعا سۇبەلى ۇلەس قوستى. ول 20 جىلداي قازاق تەاتر قوعامىنا باسشىلىق ەتتى جانە حالىقارالىق تەاتر ينستيتۋتىنىڭ ۆيتسە-پرەزيدەنتى قىزمەتىن ويداعىداي اتقاردى.
روزا جامانوۆا لەنين, ەڭبەك قىزىل تۋ, حالىقتار دوستىعى, «پاراسات» وردەندەرىمەن ماراپاتتالعان. كسرو جانە قازاق كسر جوعارعى كەڭەسىنىڭ دەپۋتاتى بولىپ سايلاندى. تاۋەلسىزدىك جىلدارى وعان جىل سايىن شىعارماشىلىق زيالى قاۋىمعا ارنالعان پرەزيدەنتتىك ستيپەنديا تاعايىندالدى.
قازاقستان وپەرا ونەرىنىڭ ماقتانىشى, ءوز ەلىنىڭ لايىقتى قىزى, كورنەكتى مادەنيەت قايراتكەرى حالىقتىڭ جادىندا ءاردايىم ساقتالادى.
قازاقستان رەسپۋبليكاسىنىڭ مادەنيەت جانە اقپارات مينيسترلىگى,
قازاقستان رەسپۋبليكاسىنىڭ ءبىلىم جانە عىلىم مينيسترلىگى,
قازاقستان تەاتر قايراتكەرلەرى وداعى,
قازاقستان كومپوزيتورلارى وداعى,
مۋزىكا قايراتكەرلەرى وداعى.
ونەرى حالقىمەن بىرگە جاسايدى
قازاق ونەرىنە توتەننەن كەلىپ جاتقان سوڭعى اۋىر سوققىلار قابىرعامىزدى قايىستىرىپ, جانىمىزدى كۇيزەلتۋدە. قاراشا ايىندا عانا ەرەكەڭدى – ارداقتى ەرمەك سەركەباەۆتى جەرلەپ ەدىك. وسى ونەر تارلانىنىڭ قىرقىن وتكىزە سالا, مىنە, اياۋلى قۇربىم روزا جامانوۆانىڭ سۋىق حابارىن ەستىپ وتىرمىن. ۇلتىمىزدىڭ مادەنيەت سالاسى ءۇشىن اۋىر شىعىن, حالقىمىز ءۇشىن قيىن قايعى. جاقسىلىق تىلەر جاڭا جىلدىڭ الدىندا وسىنداي ايماڭداي ونەر يەلەرىن جوعالتۋىمىز, البەتتە, ۇلكەن وكىنىش.
ءبىز كونسەرۆاتوريادا بىرگە وقىدىق. ستۋدەنت كەزىمىزدەن انشىلىك جولىندا قول ۇستاسىپ بىرگە جۇردىك. تەاتردا بىرگە جۇمىس ىستەدىك. روزا قۇربىم ونەر جولىندا باقىتتى بولدى. تەاتردىڭ بوساعاسىن بەرىك ۇستاپ تۇرعان ۇستىنىنداي ەدى دەسەم, قاتەلەسپەيمىن. ەرمەك ەكەۋمىز كوبىنە گاسترولدەرگە كەتكەندە نەگىزگى پارتيالاردى تۇگەلدەي روزا ورىنداپ, بۇكىل اۋىرتپالىق جۇگىن ءوزى كوتەرۋشى ەدى. سوندا قىڭق ەتپەيتىن, ەشبىر رەنىش بىلدىرمەيتىن. قازىرگى كەزدە وپەرادا جاستار كوپ قوي. ءبىزدىڭ كەزىمىزدە ساناۋلى, ەكەۋ-ۇشەۋ عانا ەدىك.
روزانىڭ جانسەبىلدىگى عوي, تەاتردان باسقانى بىلمەيتىن. ءان ونەرىن وركەندەتۋ ءۇشىن كوپ قوعامدىق جۇمىستاردى دا مويىماي موينىنا الاتىن. دەپۋتات تا بولدى. ءبىراز جىلدار تەاتر قوعامىن باسقاردى. كونسەرۆاتوريادا ۇستازدىق تا ەتتى. بار عۇمىرىن وپەراعا ارناعان قازاقتىڭ ءبىر ءانشىسى بولسا, سول روزا ۇمبەتقىزى. ءبىرىنشى ويناعان وپەراسى مۇقان تولەباەۆتىڭ «ءبىرجان-ساراسى» بولاتىن. «چيو-چيو-سانداعى» مادام باتتەرفلياي, ءوزىمىزدىڭ «ابايداعى» اجار. قاتىسقان سپەكتاكلدەرى كوپ. 50 شاقتى بولىپ قالار. اسىرەسە, كۇردەلى پارتيالاردىڭ ءبارىن روزا ايتاتىن. «ەۆگەني ونەگيندەگى» تاتيانا, ت.ت. ونىڭ داۋسىن سوپرانو دەيمىز. مۇنداي داۋىس بىرەۋ-اق بولاتىن. مەنىڭشە, ول كۇيىپ كەتتى, كۇيەۋى كوپ جىلدان بەرى توسەك تارتىپ اۋىرىپ جاتىر عوي. جۇرەگى نازىك, مەيىرىمدى ادام وسىعان قاتتى قايعىرۋشى ەدى. باقىتسىز ءومىر سۇرە المايمىن دەپ وتىراتىن. ەندى باقىتتىڭ الدىندا, مىنە, اياق استىنان ءوزى كەتىپ قالدى.
ءومىر قانداي قىسقا دەسەڭشى. قانداي قىزىق داۋرەندەر ءوتتى باسىمىزدان. ابىرويعا دا كەنەلدىك. مارتەبە-ماراپاتتاردى قاتار يەلەندىك. باقىتتى شاقتاردى باستان كەشتىك. ماسكەۋگە دە تالاي بىرگە باردىق. كونكۋرستاردا بىرگە تورەلىك ەتتىك. انا جىلى ۆەنەتسياعا بىرگە بارىپ سايرانداپ قايتىپ ەدىك. سونىڭ ءبارى كوزدى اشىپ-جۇمعانشا ءوتتى دە كەتتى. ءبىر عانا داتكە قۋات, روزا جامانوۆا سياقتى دارىننىڭ ءوزى ولسە دە, ونەرى حالقىمەن بىرگە جاسايدى. توپىراعى تورقا بولىپ, نۇرى پەيىشتە شالقىسىن.
بيبىگۇل تولەگەنوۆا,
كسرو حالىق ءارتىسى.
وپەرانىڭ راۋشان گ ۇلى ءۇزىلدى
ونەر كوگىنەن ومىرىڭە وشپەستەي ساۋلە قۇيىپ, ىزگىلىگى مەن ءىلتيپاتىن اياماعان, ءوزىڭ ەرەكشە قادىر تۇتاتىن ءازىز ءبىر جاندى سۇم اجال اراڭنان اياۋسىز ج ۇلىپ اكەتكەندە, جۇرەگىڭنىڭ تۇبىندەگى ەڭ اياۋلى گ ۇلىڭدى ىزعارلى داۋىل تۇبىنەن قوپارا سۋىرىپ العانداي الاي-دۇلەي كۇي كەشەسىڭ.
وپەرا ورداسىنىڭ اسقارالى شىڭى – ەرمەك سەركەباەۆ اعامىزدى جوقتاعان كوڭىلدەگى دالانىڭ مۇڭلى سازى ءالى تولىق اياقتالماي جاتىپ, سول قايعىنىڭ سوڭىنان جانى جايساڭ روزا اپامىزدىڭ قازاسىن ەستۋ كىم-كىمگە دە تىم اۋىر سوعار حابار ەدى. وسىدان ءبىر اي بۇرىن اۋرۋحانادا سىرقاتتانىپ جاتقاندا ۇلاعاتتى ۇستازدىڭ كوڭىلىن سۇراي بارىپ, ەكەۋارا ەمەن-جارقىن اڭگىمە-دۇكەن قۇرعانبىز. جۇزىنەن سىرقاتتىڭ قىلاۋداي بەلگىسىن كورسەتپەي, اقجارقىن قالپىندا قالا بەرگەن جاننىڭ اۋرۋىنان ايىعىپ كەتۋىنە ەش ءشۇبا كەلتىرمەي رياسىز قۋانىپ, ۇستاز مەيىرىمىنە مولىنان مالىنىپ قايتقان جايىم بار ەدى. جاراتقاننىڭ ولشەپ بەرگەن عۇمىرىنا ەشكىمنىڭ قارسى تۇرار قايراتى جوق. قايتەمىز, قابىرعامىز قاقىراي سوگىلىپ, قالىڭ ەلى جوقتاعان قازالى ۇنگە قوسىلا تولقىپ ەگىلەرمىز. سوڭىندا قالعان عاجايىپ كوركەم بەينەلەرىن قاز-قاتار ءتىزىپ, قاداۋ-قاداۋ مۇراسىنىڭ مۇراتقا اينالارىن اعىل-تەگىل كۇڭىرەنگەن كۇپتى كوڭىلگە مەدەت ەتىپ, جۇبانارمىز. قازاق ۇلتتىق وپەرا ونەرىنىڭ اسقارالى اسۋىنا ايشۋاق ءىز بولىپ قوسىلعان تولايىم ەڭبەگىنىڭ كەيىنگى ۇرپاققا تاۋسىلماس ازىققا اينالارىن, تاريحتا اتى ماڭگى ساقتالىپ قالا بەرمەگىن داتكە قۋات ەتەرمىز. ونەردىڭ بالاۋسا توپىراعىنا ءوزى شانشىعان كوكورىم شىبىقتار قاناتىن جايىپ, ءالى-اق الىپ بايتەرەكتەي سايالى, ساليقالى ساڭلاقتارعا قوسىلادى دەپ ۇمىتتەنەمىز. ولاردىڭ اراسىندا الدى قازىردىڭ وزىندە ەلىمىزگە بەلگىلى, ساحنالىق قولتاڭباسى قالىپتاسقان بالاپان جۇباەۆا, يننا تاراسوۆا, دينا ءدۇتماعانبەتوۆا, رۋزيا رامازانوۆا سياقتى شاكىرتتەرى بار.
اباي اتىنداعى مەملەكەتتىك اكادەميالىق قازاق وپەرا جانە بالەت تەاترىندا روزا ۇمبەتقىزىمەن بىرگە ونەر كورسەتە ءجۇرىپ, مەن ول كىسىدەن كوپ نارسە ۇيرەندىم. كونسەرۆاتوريادا بەكەن جىلىسباەۆتىڭ كلاسىن ءبىتىرىپ, انشىلىك داۋىستىڭ قىر-سىرىن مەڭگەرسەم, ال تەاترداعى كاسىبي ونەردىڭ قاتپارلارىنا تەرەڭ باتىرىپ, تۇبىنەن ءىنجۋ-مارجان تەرگىزگەن, ساحنا ءارتىسىنەن تالاپ ەتىلەتىن بارلىق شەبەرلىكتى ساناما توقىتقان العاشقى ۇستازىم وسى كىسى. «ەر تارعىن» وپەراسىندا ول اقجۇنىستى, ال مەن دانانىڭ ءرولىن سومدادىم. تانىمال تۇلعالارعا سىرتتاي تابىنۋ ءبىر باسقا دا, ونەر جۇلدىزىمەن قاتار ويناۋدىڭ باقىتى ءوز الدىنا بولەك سەزىمگە بولەيتىن شىڭ. سونداعى اقجۇنىستىڭ بەينەسىن سومداۋداعى ەرەكشە ەڭبەكقورلىعى مەنى قاتتى تامساندىردى. جاراتىلىسىندا جانى وتە نازىك, جۇمساق بولىپ كورىنەتىن ادامنىڭ سول بولمىسقا مۇلدە قايشى, باتىل دا قايسار كەيىپكەردى ءدال بەرە ءبىلۋ تالانتى ءسۇيسىنتتى. رولگە, وزىڭە بەرىلگەن بەينەنىڭ ۇستىنەن وڭاشادا قالاي جۇمىس ىستەۋ كەرەكتىگىن العاش مەن روزا اپايدان ۇيرەندىم دەسەم, قاتە ايتپايمىن. روزا جامانوۆا سومداعان مادام باتتەرفلياي («چيو-چيو-سان»), جىبەك پەن اقجۇنىس («قىز جىبەك», «ەر تارعىن»), سارا («ءبىرجان-سارا»), اجار («اباي»), تاتيانا مەن يولانتا («ەۆگەني ونەگين», «يولانتا»), امەليا («بال-ماسكاراد») قاشاندا شوقتىعى بيىك بولىپ قالاتىن ماڭگىلىك بەينەلەر. ونىڭ كۇمىس قوڭىراۋداي قۇلاققا جاعىمدى ەستىلەتىن ليريكو-درامالىق سوپرانا داۋىسى جوعارى ۆوكالدىق مادەنيەتتىڭ ۇمىتىلماس سارىنى رەتىندە سانامىزدا ۇدايى جاڭعىرىپ تۇرا بەرەتىنى تاعى ايان.
وسى ءبىر اياۋلى ۇستازبەن قوشتاسار ساتتە ءبارىمىزدىڭ كوڭىلىمىز قاندايلىق اۋىر كۇي كەشسە, ۇنەمى ءىشى-باۋىرىما كىرىپ, اعىنان جارىلا سويلەيتىن ۇستازبەن ەندى شۇرقىراسا تابىسا المايتىنىم مەنىڭ دە جانىمدى سونشالىق قايعىرتادى. ونىمەن بىرگە قازاق ۇلتتىق وپەرا ونەرىنىڭ تۇتاس ءبىر جارقىن ءداۋىرى توبەمىزدەن كوشىپ بارا جاتقانداي قينايدى. ونەردىڭ ءۇلبىرەگەن نازىك ءبىر گ ۇلى جەلتوقساننىڭ جەلىمەن ءۇزىلىپ كەتە باردى. قوش بول, ۇلاعاتتى ۇستاز!
نۇرجامال ۇسەنباەۆا,
قازاقستاننىڭ حالىق ءارتىسى.
ۇلكەن جۇرەكتى ءانشى ەدى
روزا ۇمبەتقىزىنىڭ قازاقتىڭ كلاسسيكالىق وپەرا ونەرىندەگى بولمىسى بولەك, ورنى ەرەكشە ەدى. ءبىزدىڭ ۇلى انشىلەرىمىز كۇلاش بايسەيىتوۆا, شابال بەيسەكوۆا سىندى اسىل اپالارىمىزدان كەيىنگى تولقىننىڭ توپ جارعانى وسى كىسى. اباي اتىنداعى وپەرا جانە بالەت تەاترىندا حالقىمىزدىڭ كلاسسيكالىق اندەرىن, ەۋروپالىق جانە ورىس وپەرالارىنداعى سوپرانو داۋىستى پارتيالاردى ورىنداۋدا ەڭ الدىڭعى شەپتەن كورىنگەن ۇلى ءانشىمىز دەپ تە باتىل ايتا الامىن. روزا ۇمبەتقىزى تەاتردا قىرىق جىل بويى ۇزدىكسىز ەڭبەك ەتتى. قازاق انشىلەرىنىڭ ىشىندە بۇكىل الەمگە بيىك دەڭگەيىمەن تانىلعان, انشىلىك ونەردىڭ شىڭىنا شىققان تالانت يەسى ەدى.
روزا اپاي وتىز جىل بويى قۇرمانعازى اتىنداعى كونسەرۆاتوريانىڭ پروفەسسورى بولىپ ۇستازدىق ەتىپ, جاستارعا ءدارىس بەرگەن كەزىندە تىعىز بايلانىستا, ءبىر شاڭىراقتا جۇمىس ىستەدىك. مىنەزگە باي, بايسالدى دا مەيىرىمدى, اقىلدى كىسى بولاتىن. جۇرەگى تازا, تۋعان ەلى مەن حالقىن سۇيەتىن ابزال جان ەدى. مەن ول كەزدە كونسەرۆاتوريادا فاكۋلتەت دەكانى, ودان كەيىنگى جىلدارى كافەدرا مەڭگەرۋشىسى ەدىم. وسى جىلداردا وتىز شاقتى دارىندى شاكىرتتەردى باۋلىپ تاربيەلەگەنىنە كۋامىن. ولاردىڭ ىشىندە دينا دۇتماعانبەتوۆا, بالاپان جۇباەۆالار گلينكا اتىنداعى كونكۋرس لاۋرەاتتارى اتاندى, قازاقستاننىڭ ەڭبەك سىڭىرگەن قايراتكەرى دەگەن مارتەبەلى اتاق الدى. اباي اتىنداعى وپەرا جانە بالەت تەاترىنىڭ تانىمال سوليستەرىنە اينالدى. وسىنىڭ بارىندە روزا ۇمبەتقىزىنىڭ كوپتەن-كوپ ۇستازدىق ۇلەسى بار ەكەنى ءسوزسىز.
روزا اپاي بىرقاتار حالىقارالىق ءان كونكۋرستارىنىڭ جيۋري مۇشەسى, كۇلاش بايسەيىتوۆا اتىنداعى انشىلەر كونكۋرسىنىڭ ءتورايىمى بولدى. وپەرا ونەرىندەگى مۇنداي ۇلكەن تۇلعانىڭ ورنى اركەز ويسىراپ تۇرارى انىق. بىراق قازاق حالقى تۇرعاندا قازاق ونەرىنىڭ باعىنا تۋىپ مەرەيىن اسىرعان روزا ۇمبەتقىزى اپايىمىزدىڭ ەسىمى ەشقاشان ۇمىتىلماق ەمەس. كونسەرۆاتوريا مەن وپەرا تەاترىنىڭ التىن كىتابىندا, جارقىن شەجىرەسىندە وسىناۋ ۇلى دارىننىڭ سومداعان رولدەرى, ايتقان پارتيالارى ارقاشان ءبىزدىڭ جاس انشىلەرىمىزگە ۇلگى بولا بەرمەك.
شاحماردان ءابىلوۆ,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى.
ورنى ويسىراپ قالدى
حح عاسىرداعى قازاق وپەرا ونەرىنىڭ كورنەكتى وكىلى, كسرو حالىق ءارتىسى, پروفەسسور, ءبىر تۇلعاسىنا ءانشى مەن اكتريسا وبرازىن سىيدىرعان روزا جامانوۆا بويىنداعى قايتالانباس تەرەڭدىگىمەن, سەزىمتالدىعىمەن, ماقساتتى مويىنداتۋعا دەگەن تالپىنىسىمەن دارالانىپ تۇرۋشى ەدى. ونىڭ قازاق ءان ونەرىندەگى ورنى بولەك.
قۇرمانعازى اتىنداعى الماتى مەملەكەتتىك كونسەرۆاتورياسىنىڭ تۇلەگى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ساحناسىندا باتىس ەۋروپانىڭ جانە ورىستىڭ كلاسسيكالىق وپەرالارىنىڭ شىعارمالارىنداعى ايەل پارتيالارىن, اتاپ ايتقاندا, ايدانى («ايدا»), دج.ۆەرديدىڭ ۆيولەتتاسىن («تراۆياتا»), ج.ماسسنەنىڭ مانونىن («مانون»), پ.چايكوۆسكيدىڭ تاتياناسىن («ەۆگەني ونەگين») جانە ت.ب. ورىندادى. بىراق, ونىڭ ەڭ سۇيىكتى كەيىپكەرى – دج.ءپۋچچينيدىڭ «چيو-چيو-سان» وپەراسىنداعى مادام باتتەرفلياي بولعانىن ايتۋىمىز كەرەك. بۇل بەينەنى سومداۋدا ءارتىس تالانتىنىڭ جان-جاقتىلىعى مەن ۆوكالدىق مادەنيەتىنىڭ جوعارى دەڭگەيى جارقىراي كورىنەدى.
روزا جامانوۆانىڭ رەپەرتۋارىندا 20-دان استام قازاقستان كومپوزيتورلارى وپەرالارىنداعى جەتەكشى پارتيالار دا بولدى. ول ق.قوجامياروۆتىڭ «نازۋگۋم» شىعارماسىنداعى نازۋگۋم پارتياسىنىڭ ءبىرىنشى ورىنداۋشىسى. سونداي-اق, اتاقتى ءانشى ە.راحماديەۆتىڭ «قامار سۇلۋىنداعى» قامار سۇلۋ, جىبەك پەن اقجۇنىستىڭ (ە.برۋسيلوۆسكيدىڭ «قىز جىبەك» جانە «ەر تارعىن»), اجاردىڭ (ا.جۇبانوۆ پەن ل.حاميديدىڭ «ابايى»), سارانىڭ (م.تولەباەۆتىڭ «ءبىرجان مەن ساراسى»), ەڭلىكتىڭ (ع.جۇبانوۆانىڭ «ەڭلىك-كەبەگى») جانە ت.ب. جارقىن دا قايتالانباس بەينەلەرىن سومدادى.
ر.جامانوۆا تەاترداعى ەڭبەگىن قۇرمانعازى اتىنداعى قازاق ۇلتتىق كونسەرۆاتورياسى قابىرعاسىنداعى پەداگوگيكالىق قىزمەتكە ۇشتاستىردى. ودان ءتالىم العان 40-تان استام شاكىرتتەرى قازىرگى ۋاقىتتا, رەسەي, گرەكيا, قىتاي, موڭعوليا, قازاقستاندا تابىستى ەڭبەك ەتىپ ءجۇر. 20-دان استام شاكىرتتەرى حالىقارالىق جانە رەسپۋبليكالىق بايقاۋلاردىڭ جۇلدەگەرلەرى مەن لاۋرەاتتارى. روزا ۇمبەتقىزى 2003 جىلدان وسى ۋاقىتقا دەيىن قۇرمانعازى اتىنداعى قازاق ۇلتتىق كونسەرۆاتورياسىندا ۆوكال كافەدراسىنىڭ كەڭەسشىسى بولىپ كەلدى.
روزا ۇمبەتقىزىنان ايىرىلعان قازاق وپەرا ونەرى جەتىمسىرەپ قالدى. بۇل ەلىمىز ءۇشىن دە اۋىر قايعى.
ءجانيا اۋباكىروۆا,
قازاقتىڭ قۇرمانعازى اتىنداعى ۇلتتىق
كونسەرۆاتورياسىنىڭ رەكتورى.