كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا قاراعاندى وبلىسىنىڭ جەزقازعان, ساتباەۆ قالالارى مەن ۇلىتاۋ اۋدانىن الەۋمەتتىك-ەكونوميكالىق دامىتۋدىڭ كەشەندى جوسپارى بەكىتىلدى.
كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا قاراعاندى وبلىسىنىڭ جەزقازعان, ساتباەۆ قالالارى مەن ۇلىتاۋ اۋدانىن الەۋمەتتىك-ەكونوميكالىق دامىتۋدىڭ كەشەندى جوسپارى بەكىتىلدى.
پرەمەر-مينيستر مينەرالدىق-شيكىزات رەسۋرستارىنا باي ايماق ءۇشىن بۇل قۇجاتتىڭ ماڭىزدى ەكەنىن اتاپ ءوتتى. «مەملەكەت باسشىسىنىڭ تاپسىرماسى بويىنشا جاسالعان بۇل كەشەندى جوسپار ەكونوميكانى ارتاراپتاندىرۋعا عانا ەمەس, سونىمەن قاتار, جۇمىس ىستەپ تۇرعان ونەركاسىپتەردى, الدىمەن «قازاقمىس» كورپوراتسياسى كاسىپورىندارىن ناقتى جاڭعىرتۋعا باعىتتالعان», دەدى سەرىك احمەتوۆ.
«كەشەندى جوسپاردا قوسىمشا مينەرالدىق شيكىزاتتاردى ىزدەپ-بارلاۋعا بايلانىستى ماسەلەلەر باستى نازارعا الىنعانىن ايتقان سەرىك احمەتوۆ يندۋستريا جانە جاڭا تەحنولوگيالار مينيسترلىگىنە «قازاقمىس» كورپوراتسياسىمەن بىرلەسىپ, ايماقتىڭ كەن-بارلاۋ بازاسىن كەڭەيتۋ بويىنشا جۇمىستاردى كۇشەيتۋدى تاپسىردى.
ۇكىمەت باسشىسى جەزقازعان ايماعىن دامىتۋدىڭ زور قارقىنى بيزنەستى, مونوقالالاردى, جۇمىسپەن قامتۋدى دامىتۋ مەملەكەتتىك باعدارلامالارىن جۇزەگە اسىرۋمەن تىكەلەي بايلانىستى ەكەندىگىنە دە توقتالدى. «وسى باعدارلامالار ارقىلى شاعىن قالالاردىڭ ەكونوميكاسىن ءارتاراپتاندىرۋ, شاعىن جانە ورتا بيزنەسكە قولداۋ كورسەتۋ قاجەت», دەدى ۇكىمەت باسشىسى.
پرەمەر-ءمينيستردىڭ ايتۋىنشا, قازىرگى كەزدە توسەلىپ جاتقان «جەزقازعان–بەينەۋ», «جەزقازعان–ارقالىق» جولدارى بويىنداعى سالىنىپ وتىرعان ينفراقۇرىلىمدار ءوڭىردىڭ ەكىنشى تىنىسى اشىلۋىنا, ءوز الەۋەتىن كورسەتۋىنە مۇمكىندىك بەرەدى. «مەملەكەت باسشىسىنىڭ وسى جونىندەگى تاپسىرماسى بۇلجىتپاي ورىندالۋى ءتيىس», دەدى ۇكىمەت باسشىسى.
كەشەندى جوسپارعا ەنگىزىلگەن وزگەرىستەر تۋرالى جيىندا وڭىرلىك دامۋ ءمينيسترى بولات جامىشەۆ باياندادى. ءمينيستردىڭ ايتۋىنشا, وسى شارالاردىڭ ناتيجەسىندە 2020 جىلعا قاراي وڭىردە سالىق ءتۇسىمى كولەمى قوسىمشا 323 ملرد. تەڭگەنى قۇرايدى, ونەركاسىپ ءونىمى كولەمى 32 پايىزعا ارتادى, شاعىن جانە ورتا بيزنەس ەسەبىنەن ءوندىرىس كولەمى قوسىمشا 9 پايىزعا ۇلعايادى. ال «قازاقمىستىڭ» وسىنداعى كاسىپورنىنىڭ 22 مىڭ جۇمىسكەرىنىڭ ورتاشا جالاقىسى 14 پايىزعا وسەدى دەپ كۇتىلۋدە. كەشەندى جوسپار وڭىردەگى بارلىق ماسەلەلەردى شەشە وتىرىپ, جەزقازعان ايماعىنىڭ ەلىمىزدە ونەركاسىپ ونىمدەرىن وندىرۋدەگى بۇرىنعى الدىڭعى قاتارداعى ورنىن ساقتاپ قالۋدى كوزدەيدى.
وتىرىستا, سونداي-اق, قاراعاندى وبلىسىنىڭ اكىمى ب.ابدىشەۆ, «قازاقمىس» كورپوراتسياسىنىڭ باسقارما توراعاسى ە.وگاي سويلەدى. بايانداماشىلار كەشەندى جوسپاردى ءوڭىردىڭ دامۋى, ونىڭ وندىرىستىك الەۋەتىن نىعايتۋ, وبلىستىڭ ودان ءارى الەۋمەتتىك-ەكونوميكالىق ءوسۋى ءۇشىن اسا ماڭىزدى دەپ باعالادى.
دينارا بىتىكوۆا,
«ەگەمەن قازاقستان».