ءورت – ءتىلسىز جاۋ. اتىراۋ قالاسىندا كوتتەدج ورتەنىپ, ءبىر وتباسى باسپاناسىز قالدى. وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءورت كەشە, 23 اقپاندا كەشكى ساعات 20:16-دا بولعان, دەپ حابارلايدى Egemen.kz
«دەپارتامەنتتتىڭ ديسپەتچەرلىك پۋلتىنە اتىراۋ قالاسىنداعى د.سۇيەسىنوۆ كوشەسىندە كوتتەدجدىڭ ورتەنىپ جاتقانى تۋرالى حابار ءتۇستى. ءورت سوندىرۋشىلەر وقيعا ورنىنا جەتكەن كەزدە 2 قاباتتى تۇرعىن ءۇي جانىپ جاتتى. تۇرعىن ءۇيدىڭ ورتكە ورانۋىنا جىلىتۋ قۇرالىن پايدالانۋ كەزىندە ءورت قاۋىپسىزدىگى قاعيدالارىن بۇزۋ, ياعني تۇرعىنداردىڭ جىلىتۋ قۇرالىن گاز باللونىنا جالعاپ, پايدالانعانى سەبەپ بولعان. سونىڭ ناتيجەسىندە جارىلىس بولىپ, جالپى اۋدانى 150 شارشى مەترلىك كوتتەدج تولىقتاي ورتەنىپ كەتتى», دەپ حابارلادى دەپارتامەنتتىڭ ءباسپاسوز قىزمەتىنەن.
جالىندى سوندىرۋگە جەكە قۇرامنىڭ 24 قىزمەتكەرى مەن 5 ارنايى تەحنيكا جۇمىلدىرىلدى. ءورت ساعات 21:08-دە وقشاۋلانىپ, ساعات 22:25-تە تولىقتاي جويىلدى.