«ازاماتتارعا ارنالعان ۇكىمەت» QR-كود ارقىلى باج سالىعىن تولەۋگە بولاتىن مەملەكەتتىك قىزمەتتەر قاتارىن ۇلعايتتى. ەندى قازاقستاندىقتار سمارتفوندارى ارقىلى ەلدەگى حقو-دا كەز كەلگەن مەملەكەتتىك قىزمەتتىڭ تولەمىن بىرنەشە سەكۋندتىڭ ىشىندە جولداي الادى.
QR-كود ارقىلى, مىسالى, جەر ۋچاسكەسىنە اكتىلەردى دايىنداۋ جانە بەرۋ, جىلجىمايتىن م ۇلىككە قۇقىقتاردى, بانكتىك قارىزعا الۋ شارتى بويىنشا تالاپتار قۇقىعىن بەرۋدى, كوندومينيۋم وبەكتىسىن, زاڭدى تۇلعالاردى مەملەكەتتىك تىركەۋ, سونداي-اق جەر قاتىناستارى, جىلجىمايتىن جانە جىلجىمالى م ۇلىكتەر سالاسىنداعى باسقا دا مەملەكەتتىك قىزمەتتەر ءۇشىن تولەم جاساۋعا بولادى.
«پاندەميا كەزىندە ۇزىن-سونار كەزەكتىڭ الدىن الۋ كەرەكتىگىن تۇسىنەمىز, سوندىقتان پروتسەستەردى بارىنشا اۆتوماتتاندىرىپ, قىزمەتالۋشىلارعا ىڭعايلى ەتۋگە تىرىسىپ جاتىرمىز. مەملەكەتتىك قىزمەتتەر ءۇشىن QR-تولەم جاساۋ جوباسى بىرنەشە اي بۇرىن ىسكە قوسىلدى جانە وسى ۋاقىتتىڭ ىشىندە ءبىز ءتيىستى قۇرىلعىنى بارلىق 339 حالىققا قىزمەت كورسەتۋ ورتالىعىنا ورناتتىق», - دەدى مەملەكەتتىك كورپوراتسيانىڭ باسقارما توراعاسىنىڭ ءبىرىنشى ورىنباسارى سۇيەنىش ءابدىلدين.
ازاماتتار حقو-دا مەملەكەتتىك قىزمەتتەردىڭ اقىسىن Homebank جانە Kaspi.kz قوسىمشاسىندا QR-كود ارقىلى كەزەكسىز, قاۋىپسىز جانە تەز تولەي الادى.
ەندى ازاماتتار قانداي ءبىر قىزمەتتى العان كەزدە تولەم جاساۋ ءۇشىن مەنەدجەردەن QR قۇرىپ بەرۋىن ءوتىنىپ, سوسىن ءوزىنىڭ سمارتفونى ارقىلى بىرنەشە مينۋتتىڭ ىشىندە تولەي الادى. ايتا كەتۋ كەرەك, ءار كليەنت ءۇشىن ءاربىر قىزمەت بويىنشا جەكە QR-كود جاساقتالادى.