بوكستان توكيو وليمپياداسىنا جولداما بەرەتىن سوڭعى ىرىكتەۋ كەزەڭى وتكىزىلمەيتىن بولدى. حالىقارالىق وليمپيادا كوميتەتىنىڭ مۇنداي شەشىمدى قابىلداۋىنا سپورتشىلاردىڭ دەنساۋلىعى مەن قاۋىپسىزدىگىن ساقتاۋ ماسەلەسى سەبەپ بولعان.
قازاقستاننىڭ ۇلتتىق وليمپيادا كوميتەتى مالىمدەگەندەي, حوك كوروناۆيرۋستى ينفەكتسياعا قاتىستى الەمدەگى احۋالدى ەسكەرە وتىرىپ, ايماقتىق ىرىكتەۋ تۋرنيرلەرىنەن بولەك جولدامانى رەيتينگ ارقىلى ۇلەستىرۋدى ءجون ساناعان. وسىلايشا, 2021 جىلدىڭ ماۋسىمىنا جوسپارلانعان پاريجدەگى الەمدىك ىرىكتەۋ ءتۋرنيرى وتكىزىلمەيتىن بولدى.
اتالعان جارىستا ەرلەر – 32, ايەلدەر 21 جولدامانى ساراپقا سالۋى ءتيىس بولاتىن. ەندى قالعان جولدامالار وليمپيادالىق سالماقتار بويىنشا بوكسشىلاردىڭ رەيتينگتەرىنە قاراپ ءتورت قۇرلىققا تەڭ بولىنەدى. بوكستان قازاقستان ايەلدەر كومانداسىنىڭ ەنشىسىندە ءبىر عانا جولداما بار ەكەنىن ايتا كەتەيىك.