باستى باعىت – حالىققا ساپالى قىزمەت كورسەتۋ

«مەملەكەتتىك قىزمەت كورسەتۋدى باقىلاۋ – قىزمەتتەردىڭ حالىققا قولجەتىمدىلىگى» تاقىرىبىندا وتكەن بريفينگ بارىسىندا اگەنتتىكتىڭ وتكەن جىلعى جۇمىسى قورىتىندىلانىپ, مەملەكەتتىك قىزمەت كورسەتۋدى جەتىلدىرۋ ماسەلەلەرى قارالدى. حالىققا ساپالى قىزمەت كورسەتۋ قىزمەتتىڭ باستى باعىتى بولىپ قالاتىنىن اتاپ وتكەن دەپارتامەنت ديرەكتورى سوڭعى ءۇش جىلدا ەلەكتروندى نىساندا كورسەتىلەتىن قىزمەتتەر ۇلەسىنىڭ 53-تەن 82 پايىزعا وسكەنىن جەتكىزدى.

وتكەن جىلى وسى مەكەمەنىڭ اتىنا حالىقتان 1,5 مىڭعا جۋىق ءوتىنىش كەلىپ تۇسسە, ونىڭ باسىم كوپشىلىگى جەر قاتىناستارى ماسەلەلەرىنە قاتىستى بولىپ وتىر. الەۋمەتتىك, ساۋلەت جانە قالا قۇرىلىسى سالالارىندا مەملەكەتتىك قىزمەتشىلەردىڭ ءىس-ارەكەتتەرىنە قاتىستى تۇسەتىن ارىز-شاعىمدار دا از ەمەس.

اگەنتتىك وكىلى كەلىپ تۇسكەن شاعىمداردىڭ 36 پايىزى (520 شاعىم) جەرگىلىكتى ورگاندار قىزمەتكەرلەرىنىڭ «ەنشىسىندە» ەكەنىن العا تارتتى. وسىعان وراي, جەكە جانە زاڭدى تۇلعالاردىڭ شاعىمدارى نەگىزىندە 266 جوسپاردان تىس تەكسەرۋ جۇرگىزىلىپ, قىزمەت الۋشىلاردىڭ قۇقىقتارى قالپىنا كەلتىرىلگەن.

«حالىقتان تۇسكەن شاعىمداردى قاراۋ قورىتىندىسى بويىنشا مەملەكەتتىك ورگاندار مەن ولاردىڭ ۆەدومستۆولىق باعىنىستى مەكەمەلەرىنىڭ 207 قىزمەتكەرى ءتۇرلى تارتىپتىك جاۋاپكەرشىلىككە, 33 لاۋازىمدى تۇلعا اكىمشىلىك قۇقىق بۇزۋشىلىق تۋرالى كودەكستىڭ 465-بابى بويىنشا اكىمشىلىك جاۋاپكەرشىلىككە تارتىلدى», دەپ حابارلادى ول.

ي.ۇيسىمباەۆ بارلىق مەملەكەتتىك ورگاندارعا ءتان ءارى جۇيەلى تۇردە جىبەرىلەتىن باستى كەمشىلىكتەردى اتاپ كورسەتتى. ونىڭ ەڭ باستىسى جانە ەڭ كوپ كەزدەسەتىنى – قىزمەت الۋشىلاردان ارتىق قۇجاتتاردى تالاپ ەتۋ. اگەنتتىك كەلتىرگەن ساندارعا سۇيەنسەك, وتكەن جىلى مەملەكەتتىك ورگانداردان 114 مىڭنان استام زاڭ بۇزۋشىلىق انىقتالعان.

«قۇقىق بۇزۋشىلىقتىڭ الدىن الۋدىڭ ءتيىمدى تەتىكتەرىنىڭ ءبىرى – مەملەكەتتىك ورگاندارعا ىشكى باقىلاۋ جۇرگىزۋ» دەپ اتاپ وتكەن دەپارتامەنت ديرەكتورى تەكسەرۋلەردىڭ 81 پايىزى اۋداندىق جانە اۋىلدىق وكرۋگتەردىڭ مەملەكەتتىك ورگاندارىندا جۇرگىزىلگەنىن دە جەتكىزدى.

ماسەلەن, جەر قاتىناستارى سالاسىنداعى بىرقاتار ەلەكتروندى قىزمەت قولجەتىمسىز ەكەنىن ايتقان ول اۋىل شارۋاشىلىعى مينيسترلىگىنىڭ 59% قىزمەتىن جەرگىلىكتى اتقارۋشى ورگاندار كورسەتەتىنىن, ونىڭ 97 پايىزىن ەلەكتروندى نىسانعا اۋىستىرۋ كوزدەلگەنىن دە العا تارتتى.

«ەلەكتروندى ۇكىمەت» پورتالى ەنگىزىلگەلى ءبىراز ۋاقىت وتكەنىمەن ءالى كۇنگە كەي قىزمەتتەر قاعاز كۇيىندە قالىپ قويعان. قازىرگى تاڭدا 54 قىزمەت ءالى پورتالعا ەنگىزىلمەگەن. وسىنىڭ ءوزى مەملەكەت باسشىسىنىڭ قىزمەتتەردىڭ 90 پايىزىن ەلەكتروندى نىسانعا كوشىرۋ جونىندەگى تاپسىرماسىنىڭ ساپالى ورىندالۋىنا كۇمان كەلتىرەتىنى ءسوزسىز.

مەملەكەتتىك قىزمەتتەرگە دەگەن سۇرانىس جىل سايىن ارتىپ كەلەدى. سول سەبەپتى بۇل باعىتتاعى ساپا مەن باقىلاۋعا ەرەكشە ءمان بەرىلىپ وتىر. وسىعان وراي ي.ۇيسىمباەۆ ءسوزىن: «مەملەكەتتىك قىزمەتتىڭ باستى مىندەتى – حالىققا قىزمەت ەتۋ. سوندىقتان دا قىزمەت ساپاسىن جاقسارتۋ, مەملەكەتتىك قىزمەتشىنىڭ ەتيكالىق دەڭگەيىن كوتەرۋ, باستى قاعيداتتاردىڭ ءبىرى بولىپ قالا بەرەدى», دەپ تۇيىندەدى.