ەسەپ بەرۋ كەزدەسۋىندە قالا باسشىسى باقىتجان ساعىنتاەۆ يپوتەكا بويىنشا باستاپقى جارنانىڭ ءبىر بولىگىن جابۋ ءۇشىن جانە باستاپقى تۇرعىن ءۇيدى ساتىپ الۋ كەزىندە «تۇرعىن ءۇي سەرتيفيكاتتارىنا» جەرگىلىكتى بيۋدجەتتەن قارجىلاندىرۋ ماسەلەسى قارالىپ جاتقانىن اتاپ ءوتتى, دەپ حابارلايدى Egemen.kz.
«بۇل ماسەلە ءبىزدىڭ باقىلاۋىمىزدا. ءبىز قازىردىڭ وزىندە قانشا ءۇي بەرىلەتىنىن بىلەمىز, ءاربىر الماتىلىق ءوز كەزەگىن ەلەكتروندى تۇردە باقىلاپ, كىمگە ءۇي بەرىلەتىنىن كورەدى. ەشقانداي قۇپيا جوق. كەزەكتى جەدەلدەتۋ جونىندەگى جۇمىسىمىز ونى بيىلعى جىلدىڭ بيۋدجەتىنە ەنگىزدى, ءبىز كوپ بالالى انالارعا تۇرعىن ءۇي سەرتيفيكاتىن بەرەتىن بولامىز. ەگەر ولار تۇرعىن ءۇيدى وتباسىلىق بانك ارقىلى ساتىپ الاتىن بولسا, وندا باستاپقى جارناعا 2 ميلليارد تەڭگە بولدىك. 2000 وتباسى كومەك الا الادى», - دەدى باقىتجان ساعىنتاەۆ.
بۇل تولەم كەلەسى ساناتتار ءۇشىن قاراستىرىلعان: كوپبالالى وتباسىلار, مۇگەدەك بالالارى بار نەمەسە مۇگەدەك بالالاردى تاربيەلەپ وتىرعان وتباسىلار; جەتىم بالالار, 1-2 ساناتتاعى مۇگەدەكتەر.
ەسكە سالساق, سوڭعى 3 جىلدا 10 مىڭنان استام الماتىلىق وتباسى پاتەر الدى. ونىڭ 1,3 مىڭنان استامى قالالىق تۇرعىن ءۇي قورىنان بولىنگەن جانە 8 مىڭنان استامى جەڭىلدەتىلگەن يپوتەكا بويىنشا بولىنگەن. تۇرعىن ءۇي العانداردىڭ 40%-عا جۋىعى الەۋمەتتىك جاعىنان وسال توپتار: 2,3 مىڭنان استامى – كوپ بالالى جانە تولىق ەمەس وتباسىلار, 600-گە جۋىعى-مۇمكىندىگى شەكتەۋلى ادامدار, 300-دەن استامى-جەتىم بالالار.
سونىمەن قاتار, «باقىتتى وتباسى» باعدارلاماسى اياسىندا تۇرعىن ۇيگە جىلدىق 2%-بەن جەڭىلدىكپەن نەسيە بەرۋ قاراستىرىلعان. بۇل رەتتە تۇرعىن ءۇي قۇرىلىس وتباسى بانكىندەگى تولەم قابىلەتتىلىگىن باعالاۋ جەڭىلدەتىلگەن تارتىپپەن جۇرگىزىلۋدە. باعدارلاماعا قاتىسۋشى قارىز بويىنشا اي سايىنعى تولەمدى تولەۋ ءۇشىن كىرىستەردى جانە ءبىر ەرەسەك ادامعا 5 اەك مولشەرىندە تۇرۋ ءۇشىن ەڭ تومەنگى سومانى راستاۋى قاجەت. تولەم قابىلەتتىلىگىن باعالاۋ كەزىندە بالالارعا ارنالعان شىعىستار ەسكەرىلمەيدى.