اۋستراليا اشىق چەمپيوناتىنداعى ساتسىزدىگىنەن كەيىن مەلبۋرندەگى WTA 250 Phillip Island جارىسىنا قاتىسقان زارينا دياس اتالعان دودانىڭ ءۇشىنشى اينالىمىندا ءسۇرىندى. ال يتالياداعى دودانى دميتري پوپكو ءساتتى باستادى.
زارينا دياس اۋستراليانىڭ مەلبۋرن قالاسىندا ءوتىپ جاتقان ءتۋرنيردىڭ ءۇشىنشى كەزەڭىندە توقتادى. العاشقى اينالىمدا دۇنيەجۇزىلىك رەيتينگتە وزىنەن ءبىر ساتى تومەن تۇرعان (82-ورىن) امەريكالىق كريستينا ماكحەيلدى ءۇش سەتتە 3:6, 6:3, 6:1 ناتيجەسىمەن جەڭسە, ەكىنشى كەزەڭدە الەمنىڭ 96-راكەتكاسى رۋمىنيالىق انا بوگداندى ءۇش سەتتە 6:4, 5:7, 6:2 ەسەبىمەن قاپى قالدىردى. وكىنىشكە قاراي, ءۇشىنشى كەزەڭدە الەمنىڭ 20-راكەتكاسى, 2019 جىلعى اقش اشىق چەمپيوناتىنىڭ جەڭىمپازى كانادالىق بيانكا اندرەەسكۋدەن ايلاسىن اسىرا المادى. ءبىرىنشى پارتيادا 1:6 ەسەبىمەن ۇتىلعان دياس جارىستى ءارى قاراي جالعاستىرۋدان باس تارتتى.
ال يتالياداعى بەللا چەللەندجەر تۋرنيرىنە قاتىسىپ جاتقان دميتري پوپكو (170) العاشقى اينالىمدا الەمنىڭ 88-ءشى, وسى دودانىڭ 2-راكەتكاسى امەريكالىق سەباستيان كوردامەن كۇش سىناستى. 1 ساعات 10 مينۋتقا سوزىلعان باسەكەدە جەرلەسىمىز 6:4, 6:3 ەسەبىمەن ەكى پارتيادا جەڭىسكە جەتتى. ەندى د.پوپكو شيرەك فينالعا شىعۋ ءۇشىن الەمنىڭ 187-راكەتكاسى لاتۆيالىق ەرنەست گۋلبيس نەمەسە رەيتينگتە 373-ساتىداعى يتاليالىق راۋل برانكاچچيو جۇبىنىڭ جەڭىمپازىمەن كەزدەسەدى. يتالياداعى دودا 21 اقپاندا اياقتالادى.