سوڭعى ون جىلدىڭ ىشىندە ءاسيا يمانتاەۆا باسشىلىق ەتكەن ورتا مەكتەپتەن 300-دەن استام گرانت يەگەرى شىقسا, ولاردىڭ 13-ءى «التىن بەلگى», ال 15-ءى «ۇزدىك اتتەستات» يەسى
سوڭعى ون جىلدىڭ ىشىندە ءاسيا يمانتاەۆا باسشىلىق ەتكەن ورتا مەكتەپتەن 300-دەن استام گرانت يەگەرى شىقسا, ولاردىڭ 13-ءى «التىن بەلگى», ال 15-ءى «ۇزدىك اتتەستات» يەسى
ۇستاز دەگەن ۇلى ۇعىمعا سيپاتتاما بەرگەن ۇلىلارىمىزدىڭ ۇلاعاتىنا كوز جۇگىرتكەن سايىن الەم جۇرتشىلىعىنىڭ ەكىنشى ۇستازى اتانعان ءال-فارابي بابامىزدىڭ مىنا ءبىر ءتۇيىنى ويىما ورالا بەرەدى. دارا تۇلعامىز «ۇستاز جاراتىلىسىنان وزىنە ايتىلعاننىڭ ءبارىن جەتە تۇسىنگەن, كورگەن, ەستىگەن جانە اڭعارعان نارسەلەردىڭ ءبارىن جادىندا جاقسى ساقتايتىن, ەشنارسەنى ۇمىتپايتىن العىر دا اڭعارىمپاز اقىل يەسى. مەيلىنشە شەشەن, ونەر-بىلىمگە قۇشتار, اسا قاناعاتشىل, جانى اسقاق جانە ار-نامىسىن ارداقتايتىن, جاقىندارىنا دا, جات ادامدارىنا دا ءادىل, جۇرتتىڭ بارىنە جاقسىلىق پەن ىزگىلىك كورسەتىپ, قورقىنىش پەن جاسقانۋ دەگەندى بىلمەيتىن باتىل, ەرجۇرەك بولۋى كەرەك» دەگەن ەكەن. مىنەكي, ۇستاز بولۋدىڭ جاۋاپكەرشىلىگى وتە جوعارى ەكەنىن وسىدان-اق اڭعارا بەرىڭىز.
دانا بابامىز دالمە-ءدال سيپاتتاپ بەرگەن ۇستاز بولمىسىنا لايىقتى بولۋ كەز كەلگەننىڭ قولىنان كەلە بەرمەيدى. سەبەبى, ول ءۇشىن جوعارىدا ايتىلعان قاسيەتتەر تۇلا-بويىندا تۇنىپ تۇرۋى كەرەك. ءبىزدىڭ بۇگىنگى كەيىپكەرىمىز وسىنداي جان دەسەك قاتەلەسپەيمىز. بۇكىل سانالى عۇمىرىن ءبىلىم بەرۋ سالاسىنا ارناعان, سول جولدا جەمىستى ەڭبەك ەتە بىلگەن, بويىنداعى ءبىلىمى مەن بىلىكتىلىگىن ناقتى ىستەرىمەن دالەلدەپ, ەل-جۇرتتىڭ ەرەكشە ىقىلاسىنا بولەنگەن ءاسيا يمانتاەۆا ۇستازدىق جولعا تۇسكەلى 35 جىل ءوتىپتى. جۋىردا عانا قۇرمەتتى دەمالىسقا شىققان ول 1954 جىلى وڭتۇستىك قازاقستان وبلىسىنىڭ سول كەزدەگى كيروۆ اۋدانىندا پەداگوگ وتباسىندا دۇنيەگە كەلگەن. اتالمىش اۋدانداعى ورتا مەكتەپتى «التىن مەدالمەن» تامامداعان سوڭ, شىمكەنت پەداگوگيكالىق ينستيتۋتىنا وقۋعا ءتۇسىپ, ونى 1974 جىلى «فيزيكا ءپانىنىڭ مۇعالىمى» ماماندىعى بويىنشا قىزىل ديپلوممەن ءبىتىرىپ شىققان. العاشقى ەڭبەك جولىن وسى جىلى باستاعان ءاسيا پەردەبايقىزى اكە جولىنا ءتۇسىپ, مەكتەپ باسشىسى قىزمەتىنە دەيىن كوتەرىلدى. 1994 جىلى №31 يابەك ەسەنبەكوۆ اتىنداعى ورتا مەكتەپتىڭ ديرەكتورى بولىپ تاعايىندالعان.
بىلىكتى مامان باسشىلىق قىزمەتتە ءبىرتالاي بەلەستەردى باعىندىرا ءبىلدى. اسىرەسە, وقۋ وشاعىنىڭ كورسەتكىشى ۇلتتىق بىرىڭعاي تەستىلەۋدىڭ ناتيجەسىمەن ولشەنىپ كەلە جاتقان سوڭعى ون جىلدىڭ ىشىندە اۋىز تولتىرىپ ايتارلىقتاي جەتىستىكتەرگە قول جەتكىزدى. ماسەلەن, اتالعان ۋاقىت ارالىعىندا 800-گە جەتەر-جەتپەس وقۋشىسى بار بۇل مەكتەپتەن 300-دەن استام تۇلەك گرانت يەگەرى اتانسا, ولاردىڭ 13-ءى «التىن بەلگى», ال 15-ءى «ۇزدىك اتتەستات» الدى. مۇنداي كورسەتكىشكە ەلىمىزدەگى ءبىلىم بەرۋ بازاسى ەڭ ۇزدىك سانالاتىن ءبىلىم وشاقتارىنىڭ وزدەرى قول جەتكىزە الماي كەلە جاتقانى ايدان-انىق.
ەلىمىزگە ۇلتتىق بىرىڭعاي تەستىلەۋ جۇيەسى العاش ەنگىزىلگەن جىلى ءاسيا يمانتاەۆا مەكتەپ مۇعالىمدەرىنە ءوز پاندەرى بويىنشا وقۋشىلاردىڭ ءبىلىمىن ساباقتان تىس ۋاقىتتا قوسىمشا جەتىلدىرۋ كەرەكتىگىن ايتادى. وسىدان كەيىن ۇستازدار قاۋىمى اتا-انالارمەن كەلىسە وتىرىپ, ءار بالامەن جەكە-جەكە جۇمىس ىستەۋدى قولعا الادى. ولاردىڭ بۇل ۇمتىلىسى العاشقى جىلى-اق ءوز ناتيجەسىن بەردى. ءسويتىپ, مەكتەپ بىتىرگەن تۇلەكتەردىڭ 20-دان استامى گرانت يەگەرى اتاندى. ال, كەيىنگى جىلدارى كورسەتكىش ءتىپتى جاقسارعان. جىل سايىن گرانت يەگەرلەرى 30-دان كەم بولمايتىنداي دەڭگەيگە جەتكەن. ارينە, الگىندەي ءادىستى قولدانعان مۇعالىمدەردىڭ بارلىعىنىڭ «ايى وڭىنان تۋدى» دەپ ايتا المايمىز. بالا بويىنا ءبىلىم ءنارىن شىنايى سىڭىرە بىلگەن بىلىكتى ۇستازداردىڭ عانا شوقتىعى بيىك بولعان. ءبىر قىزىعى, بۇل مەكتەپتىڭ ۇبت-داعى جەتىستىگىن ەستىپ-ءبىلىپ جۇرگەن اتا-انالار ءوز بالالارىن وسىندا وقىتۋعا ىقىلاس تانىتا باستاعان. وسىلايشا, ماقتاارال اۋدانىنداعى كىپ-كىشكەنتاي مەكتەپ پەن ونداعى ۇستازدار قاۋىمىنىڭ ابىرويى اسقاقتاپ شىعا كەلىپتى. ەتكەن ەڭبەك پەن توگىلگەن ماڭداي تەردىڭ جەمىسى دەگەن وسى شىعار.
ءاسيا پەردەبايقىزى ورتا مەكتەپتە باسشىلىق جاساپ جۇرگەن كەزىندە ءبىلىم بەرۋ جۇيەسىنە «جەدەلدەتىپ وقىتۋ» ءادىسىن دە ەنگىزدى. بۇل ءادىس بويىنشا 9-سىنىپتى اياقتاعان وقۋشى كەيىنگى ەكى سىنىپتى ءبىر جىلدا ءتامامداپ شىعادى. بۇگىنگى تاڭعا دەيىن وسى جۇيەمەن 24 وقۋشى مەكتەپتى بىتىرگەن ەكەن. ولاردىڭ ۇبت-داعى كورسەتكىشتەرى دە كوڭىل كونشىتەرلىكتەي. وسى ورايدا ايتا كەتەر جايت, ءبىز ءسوز ەتكەن ءبىلىم وشاعى بيىلعى ۇلتتىق بىرىڭعاي تەستىلەۋ جۇيەسىنىڭ ناتيجەسىندە دە جوعارى كورسەتكىشتى باعىندىرىپ وتىر. دالىرەك ايتساق, گرانت يەگەرلەرىنىڭ, ونىڭ ىشىندە «التىن بەلگى» مەن «ۇزدىك اتتەستاتقا» قول جەتكىزگەندەردىڭ سانى جاعىنان اۋدانداعى 122 مەكتەپتىڭ اراسىندا الدىڭعى ۇشتىككە ەنگەن.
ۇلاعاتتى ۇستازدىڭ ءبىلىم بەرۋ سالاسىندا سىڭىرگەن ەڭبەگى مەملەكەتىمىز تاراپىنان ەلەۋسىز قالعان جوق. اتاپ ايتار بولساق, باسشىلىق جاساۋ جانە ءبىلىم بەرۋدە جەتكەن جەتىستىكتەرى ءۇشىن 1999 جىلى «ءبىلىم بەرۋ ءىسىنىڭ ۇزدىگى» توسبەلگىسىمەن, ال 2006 جىلى ى.التىنسارين اتىنداعى توسبەلگىمەن, سونداي-اق, 2010 جىلى «قازاقستان رەسپۋبليكاسىنىڭ تاۋەلسىزدىگىنە 10 جىل تولۋىنا وراي» مەرەكەلىك مەدالىمەن ماراپاتتالعان.
ەرلىباي وزبەكباي ۇلى.
وڭتۇستىك قازاقستان وبلىسى.
سۋرەتتە: ءاسيا يمانتاەۆا (ورتادا) ۇجىمىمەن بىرگە.