جامبىل وبلىسىنداعى قازاق-قىرعىز مەملەكەتتىك شەكارا شەبىندە قر ۇقك شەكارا قىزمەتى «وڭتۇستىك» وڭىرلىك باسقارماسى قورداي شەكارا وتريادىندا «سورتوبە» شەكارا بەكەتىنىڭ سالتاناتتى اشىلۋ ءراسىمى ءوتتى.
جامبىل وبلىسىنداعى قازاق-قىرعىز مەملەكەتتىك شەكارا شەبىندە قر ۇقك شەكارا قىزمەتى «وڭتۇستىك» وڭىرلىك باسقارماسى قورداي شەكارا وتريادىندا «سورتوبە» شەكارا بەكەتىنىڭ سالتاناتتى اشىلۋ ءراسىمى ءوتتى.
قازاقستان رەسپۋبليكاسىنىڭ مەملەكەتتىك شەكاراسىن جايلاستىرۋ جونىندەگى مەملەكەتتىك باعدارلاما اياسىندا ەلىمىزدىڭ وڭتۇستىك جانە شىعىس وڭىرلەرىندە بيىلعى جىلى 20 بولىمشە ىسكە قوسىلدى.
قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ «سورتوبە» بەكەتىن اشا وتىرىپ, بولىمشە باستىعىنا رامىزدىك كىلتتى تاپسىردى. سونىمەن بىرگە, ول مەملەكەتتىك شەكارانى جايلاستىرۋ اۋقىمدى مەملەكەتتىك باعدارلاماسىن جۇزەگە اسىرۋدا كەزەكتى قادام جاسالعاندىعىن, تەك 2013 جىلى جاڭا تالاپتارعا ساي 20 شەكارا بەكەتىنىڭ ىسكە قوسىلعاندىعىن اتاپ ءوتتى.
– ەلىمىزدىڭ ىرگەسىن بەكەمدەۋ ماقساتىندا سالىنعان بۇل «سورتوبە» شەكارا بەكەتى زامان تالابىنا ساي سوڭعى ۇلگىدەگى تەحنيكالارمەن جابدىقتالعان. راديولوكاتسيالىق, بەينەباقىلاۋ اپپاراتتارى, ءبىر ءوزى بىرنەشە فۋنكتسيانى اتقاراتىن قوندىرعىلار, اۋا رايى مەن تابيعي جاعدايدىڭ بارلىق وزگەرىسىنە ىڭعايلاندىرىلعان ءموبيلدى تەحنيكا جانە قوزعالىس قۇرالدارىنىڭ قاجەتتى تۇرلەرىمەن قامتاماسىز ەتىلىپ وتىر. مەملەكەتىمىزدىڭ تاۋەلسىزدىگى مەن تۇتاستىعىن ساقتاۋ ءۇشىن ەل شەكاراسىن بەكەمدەۋ كەرەك. ۇلتتىق قاۋىپسىزدىك ماسەلەسىنە ەلباسى نۇرسۇلتان نازارباەۆ ەرەكشە ءمان بەرىپ, بارىنشا كوڭىل بولۋدە, – دەدى نۇرتاي ابىقاي ۇلى.
كوميتەت باسشىسىنىڭ قولىنان بەكەت شەكاراشىلارى جاڭا پاتەرلەردىڭ كىلتتەرىن الدى. پارلامەنت سەناتىنىڭ دەپۋتاتتارى, جامبىل وبلىسىنىڭ اكىمى جانە باسقا دا شاقىرىلعان قوناقتار شەكارا قالاشىعىنىڭ ينفراقۇرىلىمىمەن, سونداي-اق, اۆتوكولىك جانە شەكارالىق قىزمەتكە قولدانىلاتىن ارنايى تەحنيكالارمەن تانىستى.
ولارعا كەزەكشى بولىمىنەن باستاپ وفيتسەرلەر تۇراتىن ۇيلەرگە دەيىن كورسەتىلىپ, شەكارا ساقشىلارى بيىلعى جىلى الىنعان اۆتوموبيلدەر مەن ارناۋلى تەحنيكالاردىڭ قالاي جۇمىس ىستەيتىندىگىن ءىس جۇزىندە كورسەتتى.
«سورتوبە» شەكارا بەكەتىندە ءتيىستى ايماقتى الىستان باقىلاۋ كورپۋسى مەن سپورت زالى, تىكۇشاق قوناتىن الاڭ, قىزمەتكەرلەردىڭ دەمالاتىن ورنى جانە شەكارالىق قىزمەتتىڭ اتتارى مەن يتتەرىن باعاتىن شاعىن قورا-جايى دا بار.
تولىقتاي جابدىقتالعان مۇنداي بەكەتتەر ەلدىڭ ەكونوميكالىق احۋالىن دا تانىتادى. سونىمەن قاتار, بىلتىر عانا قابىلداعان شەكارا تۋرالى زاڭ دا مەملەكەتتىڭ تۇتاستىعى مەن ەل تىنىشتىعىن ساقتاۋ مىندەتىنە قىزمەت ەتەدى. ايتا كەتۋ كەرەك, سوڭعى 2-3 جىلدىڭ كولەمىندە جامبىل وبلىسىندا 12 شەكارا بەكەتى پايدالانۋعا بەرىلىپ وتىر. ءبىر عانا قورداي اۋدانىنىڭ وزىندە 5 بەكەت سالىنۋدا. شەكارا قىزمەتى ءۇشىن بوي كوتەرگەن بەكەتتەر مەملەكەت تەرريتورياسىنىڭ تۇتاستىعىن ساقتاۋمەن قاتار, سول وڭىردەگى كىشىگىرىم اۋىلدار مەن ەلدى مەكەندەردىڭ جاعدايىنا دا جاعىمدى اسەر ەتۋدە. جاڭا مەكتەپ, بالاباقشا مەن ەمحانا سالىنىپ, تاقتايداي تاس جول تۇسۋدە. «سورتوبە» شەكارا بەكەتىن «پرومحيممونتاج» اق 11 ايدا سوعىپ, بەلگىلەنگەن مەرزىمدە تاپسىرىپ وتىر.
دەپۋتاتتار قازاقستان شەكاراشىلارىنىڭ حالىق پەن ەلدىڭ مۇددەسىنە رياسىز قىزمەت ەتەتىندىگىنە, اسكەري انتقا جانە قىزمەتتىك پارىزعا ادال بولاتىندىعىنا سەنىم ءبىلدىردى.
قانات ەسكەندىر,
«ەگەمەن قازاقستان».
الماتى.