جەلتوقساننىڭ 23-ءسى كۇنى 95-كە قاراعان شاعىندا اتى الەمگە تانىمال اۆتورماتتى اتۋ قارۋىنىڭ داڭقتى كونسترۋكتورى ميحايل كالاشنيكوۆ قايتىس بولدى. بۇل تۋرالى يتار-تاسس حابارلادى.
م.كالاشنيكوۆ ۇستىمىزدەگى جىلعى 17 قاراشادا اسقازانىنان قان اعىپ, اۋرۋحاناعا جاتقىزىلدى. سوندا ونىڭ ۇلى ۆيكتور كالاشنيكوۆ جۋرناليستەرگە اكەسىنىڭ 10 قاراشادا وتباسى شەڭبەرىندە تۋعان كۇنىن اتاپ وتكەننەن كەيىن الدىن الۋ ماقساتىندا اۋرۋحاناعا جاتىپ الماقشى بولعانىن ايتىپ ەدى.
كالاشنيكوۆ بۇكىل الەمدە جارتى عاسىردان بەرى وزىنە تەڭ كەلەتىن تەك تاپپاي كەلە جاتقان اۆتوماتتى اتۋ قارۋى جۇيەسىنىڭ اۆتورى بولىپ تابىلادى. «مەن مەنىكىنەن ارتىق اۆتومات جاساعان ادامنىڭ قولىن ءوزىم ءبىرىنشى بولىپ الامىن» دەدى وسىدان 30 جىل بۇرىن ميحايل كالاشنيكوۆ. كونسترۋكتوردىڭ وسى ايتقانى كەيىن قاناتتى سوزگە اينالىپ كەتتى.
ال اتاقتى ونەر تاپقىش ءوزىنىڭ اتىشۋلى اۆتوماتىن 1947 جىلى ويلاپ تاپتى. وسى جاڭالىققا قول جەتكىزگەندە ول بار-جوعى 9 سىنىپتى عانا بىتىرگەن سەرجانت شەنىندەگى جاۋىنگەر ەكەنى. سودان بەرى بۇل اۆتوماتتىڭ ءارتۇرلى موديفيكاتسياسى بويىنشا 70 ملن. داناسى شىعارىلىپتى. بۇگىندە اك (اۆتومات كالاشنيكوۆا) اۆتوماتىن الەمنىڭ 100-دەن استام ەلىندەگى قارۋلى كۇشتەر قولدانادى جانە XX عاسىردىڭ ەڭ تاڭعاجايىپ جاڭالىقتارىنىڭ ءبىرى بولىپ تابىلادى.
ميحايل كالاشنيكوۆ ءومىرىنىڭ كوپ بولىگىن ۋدمۋرتيانىڭ استاناسى – يجەۆسك قالاسىندا وتكىزدى. مۇنداعى ول ۇزاق جىلدار جۇمىس ىستەگەن كونتسەرنگە دە كەيىن ءوزىنىڭ فاميلياسى بەرىلگەن. ول «يجماش» جانە «يجەۆسك مەحانيكالىق زاۋىتى» دەپ اتالاتىن قۇرىلىمداردىڭ باسىن بىرىكتىردى.
ميحايل كالاشنيكوۆ بىرنەشە ومىرباياندىق كىتىپ جازىپ ۇلگەردى. ول كۇنى كەشەگە دەيىن زاۋىتتا باس كونسترۋكتور بولىپ ىستەپ كەلدى. كالاشنيكوۆ كەڭەس وداعىنىڭ باتىرى اتاعى مەن ەكى مارتە سوتسياليستىك ەڭبەك ەرى اتاعىن العان, ياعني سوعىستىڭ دا, بەيبىت ەڭبەكتىڭ دە قاتار قاھارمانى بولعان جالعىز تۇلعا ەدى.
ساكەن مايلىباي.
دەرەككوز: يتار-تاسس.