فۋتبولدان قازاقستان جاسوسپىرىمدەر قۇراماسى مينسكىدە (بەلارۋس) ۇيىمداستىرىلعان حالىقارالىق «دامۋ كۋبوگى» تۋرنيرىنە قاتىسىپ, جۇلدەلى ەكىنشى ورىنعا يە بولدى.
جارىستىڭ تۇساۋكەسەر كەزدەسۋىندە تاجىكستان قۇراماسىنان 7:1 ەسەبىمەن وڭباي جەڭىلگەن جەرلەستەرىمىز كەيىنگى ەكى ويىندا جەڭىسكە جەتىپ, جانكۇيەرلەرىن قۋانتتى. ەكىنشى تۋردا ءبىزدىڭ جىگىتتەر جارىس قوجايىندارى – بەلارۋس قۇراماسىن 4:2 ناتيجەسىمەن تىزە بۇكتىرسە, سوڭعى تۋردا مولدوۆالىق قۇرداستارىنىڭ قاقپاسىنا جاۋاپسىز 5 گول سوقتى.
جارىس قورىتىندىسى بويىنشا ەكى ويىندا جەڭىسكە جەتىپ, ءبىر ويىندا جەڭىلگەن قازاقستان جاسوسپىرىمدەر قۇراماسى حالىقارالىق ءتۋرنيردىڭ كۇمىس جۇلدەسىنە يە بولدى. ال بىردە-ءبىر ويىندا جەڭىلمەگەن تاجىكستان فۋتبولشىلارى «دامۋ كۋبوگىنىڭ» باس جۇلدەسىن قانجىعاسىنا بايلادى.