ۆاكتسينانى العاننان كەيىن ونىڭ سالدارى بولعان جاعدايدا پروتسەستىڭ بارلىق قاتىسۋشىلارى جاۋاپ بەرەدى: وندىرۋشىدەن باستاپ مەديتسينالىق مەكەمەلەرگە دەيىن. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە باس مەملەكەتتىك سانيتارلىق دارىگەر حابارلادى.
بۇدان باسقا, ەرلان قياسوۆتىڭ ايتۋىنشا, وڭىرلەردەگى قوعامدىق دەنساۋلىق ساقتاۋ باسقارمالارىنىڭ جانىنان بەيىندى ماماندار قاتارىنان ساراپتامالىق توپتار قۇرىلدى. تەرىس رەاكتسيا بولعان جاعدايدا كوميسسيا تەرگەۋ جۇرگىزەدى جانە ءتيىستى شارالار قابىلدايدى.
«بۇگىنگى تاڭدا ۆاكتسيناتسيامەن بارىنشا كوپ ادامدى قامتۋ ماڭىزدى. بۇل كۆي بويىنشا جاعدايدى جەڭۋگە جانە كارانتينسىز قالىپتى ءومىر سالتىنا ورالۋعا, ەكونوميكانى تۇراقتاندىرۋعا, بالالاردى بالاباقشالار مەن مەكتەپتەرگە, ستۋدەنتتەردى ءدارىس زالدارىنا قايتارۋعا جانە جالپى العاندا, تۋىستارىمىزبەن جانە جاقىندارىمىزبەن, ارىپتەستەرىمىزبەن جانە دوستارىمىزبەن قاۋىپسىز قارىم-قاتىناس قۇرۋعا ورالۋعا مۇمكىندىك بەرەدى. قازىرگى ۋاقىتتا باق پەن الەۋمەتتىك جەلىلەردە ۆاكتسيناتسيانىڭ زيانى تۋرالى جالعان حابارلامالار ءجيى تارالادى. سىزدەردى تەك رەسمي دەرەككوزدەردىڭ اقپاراتىنا عانا سەنۋگە, مەديتسينا قىزمەتكەرلەرىنىڭ ۇسىنىستارىنا قۇلاق اسۋعا جانە پسەۆدوساراپشىلار مەن ارانداتۋشىلاردىڭ ارباۋىنا كونبەۋگە شاقىرامىن. ۆاكتسيناتسيا ينفەكتسيالارمەن كۇرەستە ءوزىنىڭ تيىمدىلىگىن بىرنەشە رەت دالەلدەدى, اۋرۋلاردىڭ تىركەلۋ دەڭگەيىن نولگە دەيىن ازايتتى. بۇگىنگى تاڭدا بۇل يممۋنوپروفيلاكتيكامەن باسقارىلاتىن ينفەكتسيالاردان قورعاۋدىڭ ەڭ ءتيىمدى شاراسى, سونداي-اق كارانتين مەن ءوزىن-ءوزى وقشاۋلاۋدىڭ جالعىز بالاماسى», - دەپ ءتۇسىندىردى ەلدىڭ باس سانيتارلىق دارىگەرى.
الدىن الا بولجام بويىنشا جانە شەتەلدىك عالىمداردىڭ جاريالانىمدارىنا سايكەس, كۆي اۋرۋىن ازايتۋعا مۇمكىندىك بەرەتىن ۇجىمدىق يممۋنيتەت قالىپتاستىرۋ ءۇشىن ەرەسەكتەردىڭ 60% ۆاكتسيناتسيالاۋ قاجەت.
حالىقتى دۇرلىكتىرگەن ۆاكتسيناتسيانىڭ ەلەكتروندىق پاسپورتىن ەنگىزۋ تۋرالى ايتا كەتەيىك, بۇل بۇرىننان بار كوپ جىلدىق تاجىريبەنىڭ تسيفرلىق انالوگى. بۇل قاعازداعى «ەگۋ پاسپورتىنىڭ» تسيفرلىق نۇسقاسى.