جاقىندا الماتى وبلىسى, ۇيعىر اۋدانىنىڭ ۇلكەن ديقان اۋىلىندا تۇراتىن تانىسىم ءارى قۇرداسىم حابارلاستى. از-كەم حال-جاعداي سۇراسقان سوڭ:
– ءبىزدىڭ ءبىر ءوتىنىشىمىز بار ەدى, – دەدى ول. – سونى «ەگەمەن قازاقستان» گازەتى ارقىلى پارلامەنت دەپۋتاتتارىنا قۇلاققاعىس رەتىندە جەتكىزۋگە كومەكتەسسەڭ...
– ول قانداي ءوتىنىش؟
جاقىندا الماتى وبلىسى, ۇيعىر اۋدانىنىڭ ۇلكەن ديقان اۋىلىندا تۇراتىن تانىسىم ءارى قۇرداسىم حابارلاستى. از-كەم حال-جاعداي سۇراسقان سوڭ:
– ءبىزدىڭ ءبىر ءوتىنىشىمىز بار ەدى, – دەدى ول. – سونى «ەگەمەن قازاقستان» گازەتى ارقىلى پارلامەنت دەپۋتاتتارىنا قۇلاققاعىس رەتىندە جەتكىزۋگە كومەكتەسسەڭ...
– ول قانداي ءوتىنىش؟
– دەپۋتاتتار شالعايداعى اۋىلدارعا نەگە كەلمەيدى؟ – دەدى قۇرداسىم بىردەن. – ولار ونداعى تۇرعىندارمەن كەزدەسىپ, الىستاعى اۋىل-سەلولاردىڭ جاعدايىمەن تانىسسا, ەل-جۇرت ءبىر سەرپىلىپ قالار ەدى.
– قازىر پارلامەنت دەپۋتاتتارى ەلىمىزدىڭ ايماقتارىن ارالاپ ءجۇر عوي. بارىپ تا قالار, – دەدىم ۇمىتتەندىرگەندەي سىڭاي تانىتىپ (بۇل ۋاقىتتا, ياعني 28 قاراشا – 7 قاڭتار ارالىعىندا دەپۋتاتتار ەلىمىزدىڭ اۋىل, قالالارىندا سايلاۋشىلارمەن كەزدەسۋلەر وتكىزىپ جۇرگەن بولاتىن – ءا.ق.).
– ءاي, قايدام, – دەدى ول سەنىمسىزدىكپەن. – بۇل ومىردەن دەپۋتات كورمەي-اق ءوتىپ كەتەمىز بە دەپ قورقامىن...
اۋىلداستىڭ ءوتىنىش رەتىندە ايتقاندارىن وي ەلەگىنەن وتكىزىپ, زەردەلەپ كورسەك, بۇل جىلى جاۋىپ قويا سالاتىن ماسەلە ەمەس ەكەندىگىنە كوز جەتكىزگەندەي بولدىق. ويتكەنى, التايدان اتىراۋعا دەيىنگى ارالىقتى الىپ جاتقان كەڭ بايتاق جەرىمىزدە وبلىستار مەن اۋداندار ورتالىقتارىنان شالعايدا ورنالاسقان ۇلكەن ديقان سياقتى ەلدى مەكەندەر دە بارشىلىق. سول ەلدى مەكەندەردە شەشىمىن كۇتكەن پروبلەمالار دا جوق ەمەس. مىنە, سولاردى حالىق قالاۋلىلارى – دەپۋتاتتار كەلىپ كورسە, تۇرعىندارمەن كەزدەسىپ, ماسەلەلەردىڭ وڭ شەشىمىن تابۋىنا ىقپال ەتسە, قانداي عانيبەت!
پارلامەنت دەپۋتاتتارى ەل ايماقتارىنا ءجيى شىعىپ, سايلاۋشىلارمەن كەزدەسۋ وتكىزىپ تۇرادى. بۇل جاعىنان دەپۋتاتتارىمىز ەسە جىبەرىپ جاتقان جوق. بىراق, ءبىر بايقاعانىمىز – حالىق قالاۋلىلارى ەل ايماقتارىن ارالاعان كەزدەرىندە, كوبىنە وبلىستار ورتالىقتارى سانالاتىن قالالار مەن سولارعا جاقىن ورنالاسقان اۋداندارعا عانا بارىپ قايتادى ەكەن. ال الىستاعى اۋىل-سەلولارعا ءاتىزىن وتە سيرەك سالاتىن كورىنەدى.
مىسال كەلتىرەيىك. الماتى وبلىسىنا حالىقپەن, سايلاۋشىلارمەن كەزدەسۋگە كەلگەن دەپۋتاتتار نەگىزىنەن الماتى قالاسىنىڭ ماڭىنداعى قاسكەلەڭ, جامبىل, تالعار, ەڭبەكشىقازاق, ىلە, سونداي-اق, تالدىقورعان قالاسى مەن وعان جاقىن ورنالاسقان اۋدانداردان اينالشىقتاپ شىقپايدى. دەپۋتاتتار وبلىس ورتالىعىنان 350-450 شاقىرىمداي قاشىقتا جاتقان رايىمبەك جانە ۇيعىر اۋداندارىنىڭ ەلدى مەكەندەرىندەگى سايلاۋشىلاردى, كوپشىلىك تۇرعىنداردى ۇمىت قالدىرعان دەسە دە بولادى.
مەملەكەتتىك شەكارامىزدىڭ شەبىندە ورنالاسقان وسى ەكى اۋداندا قوردالانعان پروبلەمالار وتە كوپ. سايلاۋشىلار دەپۋتاتتارعا سولاردى ايتقىسى, جەتكىزگىسى كەلەدى. ولار دا تازا سۋ ءىشىپ, بالالارىن جايلى مەكتەپ پەن بالاباقشالاردا وقىتقىسى, تاربيەلەگىسى كەلەدى. ولار دا جاقسى جابدىقتالعان مەديتسينالىق مەكەمەلەردە ەمدەلىپ, وي-شۇقىرسىز تەگىس جولمەن جۇرگىسى كەلەدى.
الىس اۋىلداعى قۇرداسىمنىڭ «ءتىرى» دەپۋتاتتى كورگىسى كەلەتىن ءوتىنىشىن پارلامەنت دەپۋتاتتارىنا وسىلايشا جەتكىزۋدى ءجون كوردىك. بۇل ءوتىنىشتىڭ ۇلكەنديقاندىقتارعا عانا ەمەس, ەلىمىزدىڭ شالعايدا جاتقان وزگە دە ەلدى مەكەندەر تۇرعىندارىنا قاتىسى بار ەكەندىگىنە ءشۇبا كەلتىرمەيمىز.
ءاليسۇلتان قۇلانباي,
«ەگەمەن قازاقستان».