2025-2030 جىلدار ىشىندە تاعى 31 سۋ قويماسى سالىناتىن بولادى. بۇل تۋرالى قر ۇكىمەتىنىڭ وتىرىسىندا ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ حابارلادى.
ەكولوگيا, گەولوگيا جانە تابيعي رەسۋرستار مينيسترلىگى سۋ رەسۋرستارىن باسقارۋ جونىندەگى مەملەكەتتىك باعدارلامانىڭ جوباسىن ازىرلەدى. بۇگىندە اتالعان مەملەكەتتىك باعدارلامانى ۇلتتىق جوباعا اينالدىرۋ جۇمىستارى جۇرگىزىلۋدە.
التى نەگىزگى باعىت انىقتالدى.
ءبىرىنشى. سۋ ديپلوماتياسىن نىعايتۋ ءۇشىن مەملەكەتارالىق سۋ قاتىناستارىن جەتىلدىرۋ.
ەكىنشى. سۋ رەسۋرستارىن تسيفرلاندىرۋ, ەسەپكە الۋ جانە مونيتورينگىلەۋ. ناتيجەسىندە 119 سۋ ارناسىندا تسيفرلاندىرۋ جۇمىستارى جۇرگىزىلەدى. سونىمەن قاتار, وزەن اعىنىنىڭ رەسۋرستارىن ايقىنداۋدىڭ اقپاراتتىق جۇيەسى قۇرىلادى جانە ت. ب.
ءۇشىنشى. سۋدى ۇنەمدەۋ. ناتيجەسىندە زاماناۋي سۋ ۇنەمدەگىش تەحنولوگيالار قولدانىلاتىن سۋارمالى جەردىڭ كولەمى 221 مىڭ گەكتاردان 420 گەكتارعا دەيىن ۇلعايادى.
ءتورتىنشى. يرريگاتسيالىق جۇيەلەر مەن قۇرىلىستاردى قالپىنا كەلتىرۋ, جاڭا سۋ قويمالارىن سالۋ.
«ناتيجەسىندە شامامەن 2 مىڭ شاقىرىم ماگيسترالدىق ارنا رەكونسترۋكتسيالانادى. ودان بولەك, جالپى كولەمى 885 ملن م3 بولاتىن جامبىل (3), باتىس-قازاقستان (2), تۇركىستان (1), الماتى (1) جانە قىزىلوردا وبلىستارىندا 8 جاڭا سۋ قويماسى سالىنادى. ال 2025-2030 جىلدار ىشىندە تاعى 31 سۋ قويماسى سالىناتىن بولادى», — دەدى م. مىرزاعاليەۆ.
بەسىنشى. قۇقىقتىق بازانى جاڭارتۋ. وسى جۇمىستىڭ اياسىندا جاڭا رەداكتسياداعى سۋ كودەكسى ازىرلەنەدى.
التىنشى. سۋ سالاسىنىڭ ماماندارىن قازىرگى زامانعى داعدىلارمەن دايارلاۋ جانە عىلىمي قامتاماسىز ەتۋ.
«جاسىل قازاقستان» ۇلتتىق جوباسى 7 نەگىزگى بولىمنەن تۇرادى: سۋ نىساندارىن ساۋىقتىرۋ, اۋانىڭ لاستانۋ دەڭگەيىن تومەندەتۋ, قالدىقتاردى باسقارۋ, بيوالۋانتۇرلىلىكتى ساقتاۋ, ەلدى كوگالداندىرۋ, ەنەرگيا تيىمدىلىگى, ەكولوگيالىق ءبىلىم جانە ەكولوگيالىق مادەنيەتتى ارتتىرۋ.
بۇل اۋانىڭ لاستانۋ دەڭگەيى جوعارى 10 قالا - تەمىرتاۋ, نۇر-سۇلتان, الماتى, اقتوبە, اتىراۋ, وسكەمەن, قاراعاندى, بالقاش, جەزقازعان, شىمكەنت قالالارىنداعى جاعدايدى جاقسارتۋعا مۇمكىندىك بەرەدى.
«بۇدان باسقا, 2025 جىلعا قاراي سارقىندى سۋلاردى اعىزۋ كولەمىن تومەندەتۋگە قول جەتكىزۋدى, قالدىقتاردى قايتا وڭدەۋ ۇلەسىن اعىمداعى 18%-دان 35% دەيىن ارتتىرۋدى, سونداي-اق ەلدىڭ ءجىو-ءنىڭ ەنەرگيا سىيىمدىلىعىن ازايتۋدى جوسپارلاپ وتىرمىز. ەكى ۇلتتىق جوبانى ازىرلەۋ جانە بەكىتۋ جۇمىستارى اعىمداعى جىلدىڭ 1 شىلدەسىنە قاراي اياقتالادى», — دەدى ەكولوگيا, گەولوگيا جانە تابيعي رەسۋرستار ءمينيسترى.
ورمان قورىندا 2 ملرد اعاش وتىرعىزۋ بويىنشا جۇرگىزىلەتىن جۇمىستاردىڭ تيىمدىلىگى بارىسىنا قوعامدىق مونيتورينگتى جۇزەگە اسىرۋ ماقساتىندا, ەكولوگيا مينيسترلىگىنىڭ قولدانىستاعى گەوپورتالىنىڭ نەگىزىندە ينتەراكتيۆتى كارتا قۇرۋ ۇسىنىلادى. قازىر وسى گەوپورتالدا ورمان ورتتەرى مەن زاڭسىز اعاش كەسۋ مونيتورينگى ونلاين رەجيمدە جۇزەگە اسىرىلۋدا. گەوپورتال «عارىش ساپارى» كومپانياسىمەن بىرلەسىپ پىسىقتالاتىن بولادى. كارتادا جىلدار بويىنشا ءوڭىر-وڭىرگە بولىنگەن اعاش وتىرعىزۋ جوسپارلارى كورسەتىلەدى.
ءمينيستردىڭ ايتۋىنشا, جەرگىلىكتى اتقارۋشى ورگاندار بەكىتىلگەن كەشەندى جوسپارلاردىڭ شەڭبەرىندە ورمانداردى مولىقتىرۋ جانە ورمان ءوسىرۋ جونىندەگى جۇمىستاردى ۋاقتىلى جۇزەگە اسىرۋى قاجەت.