قازاقستان قارۋلى كۇشتەرىندە جاۋىنگەرلىك دايارلىق جوسپارى بويىنشا ءىس-شارالار جالعاسۋدا. ونىڭ ءبارى ەلدەگى سانيتارلىق-ەپيدەميالىق احۋالدى ەسكەرە وتىرىپ, بارىنشا ۇرىس جاعدايىنا جاقىنداتىلىپ جۇرگىزىلۋدە.
سونىمەن قاتار COVID-19 ىندەتىنىڭ ءارى قاراي تارالۋىن جويۋ جونىندە شارالار قابىلدانۋدا. قارۋلى كۇشتەردە سىرقاتتانۋدىڭ ءوسۋى تومەندەگەنى بايقالادى. قورعانىس ءمينيسترى, گەنەرال-لەيتەنانت نۇرلان ەرمەكباەۆ قورعانىس ۆەدومستۆوسىندا وتكەن اپپارات كەڭەسىندە قارۋلى كۇشتەردەگى ەپيدەمياعا قارسى احۋال تۋرالى باس اسكەري-مەديتسينالىق باسقارمانىڭ اقپاراتىن تىڭدادى.
سوڭعى جەتى تاۋلىكتە اسكەري قىزمەتشىلەر اراسىندا COVID-19 ۆيرۋسىن جۇقتىرۋ جاعدايى وتكەن اپتاعا قاراعاندا 16%-عا تومەندەدى. قارۋلى كۇشتەردىڭ ەكى پتر-زەرتحاناسى بازاسىندا 800-دەن استام دياگنوستيكالىق زەرتتەۋ جۇرگىزىلدى. اقتاۋ مەن سەمەيدە تاعى ەكى جاڭا مەديتسينالىق زەرتحانا كەشەنىن ورىستەتۋ بويىنشا شارالار قابىلداندى, ولاردى پايدالانۋعا بەرۋ ءۇشىن قاجەتتى قۇجاتتار رەسىمدەلەدى. «قىزىل ايماقتاعى» جەكە قۇرامنىڭ كەمىندە 80 پايىزى قاشىقتىقتان جۇمىس ىستەۋ تۇرىنە اۋىستىرىلاتىن بولادى, بۇقارالىق ءىس-شارالار مەن توپتىق ساباقتار وتكىزۋگە تىيىم سالىنادى. كەلىسىمشارت قىزمەتىنىڭ اسكەري قىزمەتشىلەرى ءۇشىن ماماندىق بويىنشا وقىتۋ باعدارلامالارى جانە ءۇي جاعدايىندا ورىنداۋعا ارنالعان دەنە جاتتىعۋلارىنىڭ كەشەنى ازىرلەندى. كارانتيننەن شىعۋ بويىنشا اسكەري قىزمەتشىلەردىڭ دەنە دايارلىعى دەڭگەيىن جانە وقۋ ماتەريالىن مەڭگەرۋ ساپاسىن تەكسەرۋ ۇيىمداستىرىلادى.
قورعانىس ۆەدومستۆوسىنىڭ باسشىسى قارۋلى كۇشتەر مەن اسكەري بولىمشەلەردىڭ باسشىلىعىنا كارانتين رەجىمىن ساقتاۋ ماسەلەلەرىن ەرەكشە باقىلاۋدا ۇستاۋدى, سونداي-اق تاياۋداعى توقسان ىشىندە ەلدەگى ەپيدەميالىق احۋالدىڭ كۇرت شيەلەنىسۋىنە جەدەل جانە بارابار دەن قويۋدى تاپسىردى.
قورعانىس مينيسترلىگىندە وتكەن اپپاراتتىق كەڭەسىندە قىسقى جاعداي مەن كوروناۆيرۋستىڭ تارالۋى جاۋىنگەرلىك دايارلىقتىڭ جوسپارلانعان ءىس-شارالارىن ىسكە اسىرۋ قاجەتتىلىگىن جويمايتىنىن, سونىمەن قاتار ونىڭ بارىسى ۇدايى نازارعا الىناتىنىن اتاپ ءوتتى. قازىرگى ۋاقىتتا بازالىق اسكەري بۋىن – بولىمشەلەردى دايارلاۋ ناقتى اتىس مىندەتتەرىن شەشۋ مەن ءارتۇرلى ۇرىس تۇرلەرىندەگى ءىس-قيمىلدار كەزىندە ءوزارا ءىس-قيمىلدىڭ ۇيلەسىمدىلىگىن جەتىلدىرۋگە, بولىمشەلەر كومانديرلەرىن ءوز باعىنىستىلارىن باسقارۋعا ۇيرەتۋگە, جەكە قۇرامنىڭ دالالىق داعدىسىن جەتىلدىرۋگە باعىتتالعان.
اسكەري اتىس الاڭدارى مەن وقۋ-تاكتيكالىق پوليگونداردا اعىمداعى دايىندىقتىڭ سوڭعى كەزەڭىندە ءداستۇر بويىنشا وقىتۋدا پايدالانىلاتىن قارۋ-جاراقتىڭ بارلىق تۇرلەرىنەن جاۋىنگەرلىك اتىس وتەدى. بۇل رەتتە اتىستاردىڭ كەم دەگەندە 30%-ىن وتكىزۋ تاۋلىكتىڭ تۇنگى ۋاقىتىندا جوسپارلانعان.
قۇبىلمالى اسكەري-تاكتيكالىق جاعدايلاردى ەسكەرە وتىرىپ, قورعانىس ءمينيسترى فورتيفيكاتسيالىق قۇرىلىستار مەن ينجەنەرلىك پوزيتسيالاردى جابدىقتاۋ, ۇشقىشسىز ۇشۋ اپپاراتتارىنا قارسى ءىس-قيمىل ەلەمەنتتەرى بويىنشا ساباقتار وتكىزۋ قاجەتتىگىن اتاپ ءوتتى. بۇل رەتتە نۇرلان ەرمەكباەۆ بارلىق دەڭگەيدەگى كوماندالىق قۇرامنىڭ نازارىن جاتتىعۋلار وتكىزۋ كەزىندە قاۋىپسىزدىك شارالارىن ساقتاۋعا اۋداردى. «دالا ساباقتارىندا جەكە قۇرامنىڭ سۋىق تيگىزىپ الۋى مەن ۇسىك شالۋ وقيعالارىن بولدىرماۋ جايلى شارالار قابىلداۋ قاجەت. جىلىنۋ پۋنكتتەرىن اشىپ, اسكەري قىزمەتشىلەردى جىلى كيىم-كەشەكپەن جانە ىستىق تاماقپەن قامتاماسىز ەتۋ كەرەك», دەدى ول.