بۇگىن شىمكەنت قالاسىنىڭ اكىمى مۇرات ايتەنوۆتىڭ قاتىسۋىمەن ءال-فارابي اۋدانى اكىمىنىڭ 2020 جىلدا اتقارىلعان جۇمىستار بويىنشا حالىققا ەسەپ بەرۋ كەزدەسۋى ءوتتى, دەپ حابارلايدى Egemen.kz
كەزدەسۋدە تۇرعىندار ءوز ساۋالدارىن تىكەلەي ەفير كەزىندە ونلاين الەۋمەتتىك جەلىلەر مەن بايلانىس تەلەفوندارى ارقىلى جولدادى. جالپى تۇرعىندار مەن باق وكىلدەرى تاراپىنان 30-عا جۋىق سۇراق قويىلدى. باسىم بولىگى ينفراقۇرىلىم, زاڭسىز قۇرىلىس, يرريگاتسيا ماسەلەلەرى بولدى.
كەلىپ تۇسكەن سۇراقتارعا اۋدان اكىمىمەن قاتار قالا اكىمى مۇرات ايتەنوۆ تە تۇسىندىرمە جاۋاپتار بەرىپ, قالا كولەمىندەگى باستى ماسەلەلەر جونىندە ءسوز قوزعادى.
سولاردىڭ ءبىرى – زاڭسىز قۇرىلىس نىساندارى. مۇرات ايتەنوۆ قالادا زاڭسىز قۇرىلىسقا جول بەرىلمەيتىندىگىن باسا ايتتى.
– زاڭسىز قۇرىلىس مەنىڭ ءجىتى باقىلاۋىمدا تۇرعان ماسەلەلەردىڭ ءبىرى. اسىرەسە تۇرعىن ۇيلەردىڭ جانىنان سالىنعان زاڭسىز نىساندار تۇرعىندار قاۋىپسىزدىگىنە زيان كەلتىرەدى. كەيبىرى ءتىپتى كوممۋنالدىق جۇيەنىڭ بۇزىلۋىنا الىپ كەلۋدە. تۇرعىندار قاۋىپسىزدىگى – جاۋاپتى ءىس. بارلىعى زاڭ شەڭبەرىندە ورىندالۋى ءتيىس. ماسەلەن, نۇرسات اللەياسىنداعى, شىمسيتي, 8 مەكتەپ ماڭىنداعى زاڭسىز قۇرىلىستار توقتاتىلىپ, ايىپپۇل سالىندى. وسىنداي زاڭسىزدىقتارعا جول بەرمەۋ ءۇشىن جەكە كاسىپكەرلەرگە ۇنەمى ءتۇسىندىرۋ جۇمىستارى جۇرگىزىلىپ جاتىر. قالاداعى بارلىق قۇرىلىس باس جوسپارعا سايكەس جۇرگىزىلەتىنىن ۇمىتپاۋ قاجەت, – دەدى شاھار باسشىسى.
زاڭسىز قويىلعان ساۋدا ورىندارى دا قوعامدىق كەڭىستىكتى جاۋىپ, تۇرعىنداردىڭ ءجۇرىپ-تۇرۋىنا كەدەرگى كەلتىرەتىنىن ايتتى. مەردىگەرلەرگە قۇرىلىس مادەنيەتىن ءتۇسىندىرۋ باعىتىندا وتكەن جىلى اتقارىلعان جۇمىستارعا دا توقتالدى.