«Kazenergy» قاۋىمداستىعى ۇيىم كەڭەسىنىڭ 27-ءشى وتىرىسىن ونلاين فورماتىندا وتكىزدى. جيىنعا قاتىسۋشىلار 2020 جىلدى قورىتىندىلاپ, وسى جىلعى جوسپارلارىمەن ءبولىستى. قاۋىمداستىقتىڭ جىل سايىنعى شاراسىنا قر ەنەرگەتيكا ءمينيسترى نۇرلان نوعاەۆ, قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, پارلامەنت دەپۋتاتتارى, ءىرى حالىقارالىق مۇناي-گاز كومپانيالارىنىڭ وكىلدەرى مەن قاۋىمداستىق مۇشەلەرى قاتىستى.
جيىننىڭ اشىلۋىندا ءسوز العان «KAZENERGY» قاۋىمداستىعىنىڭ توراعاسى تيمۋر ق ۇلىباەۆ كوروناۆيرۋس پاندەمياسى, ەنەرگورەسۋرستارعا دەگەن سۇرانىستىڭ تومەندەۋى جانە ءوندىرۋ دەڭگەيىنىڭ شەكتەلۋى سياقتى سۇراقتار بارلىق مۇناي-گاز ءوندىرۋشى وتاندىق جانە الەمدىك ەنەرگەتيكالىق كومپانيالار تاپ بولعان, شەشىلۋى ءتيىس وزەكتى ماسەلەلەردىڭ تەك ءبىر بولىگى عانا ەكەنىن اتاپ ءوتتى.
قازاقستان ۇكىمەتى الەۋمەتتىك سەكتور مەن ۇلتتىق ەكونوميكانىڭ سۇرانىستارىنا وڭتايلى تۇردە سايكەس كەلەتىن داعدارىسقا قارسى شارالاردى قابىلداپ, ءالى دە ولاردى قاراستىرۋدا. «KAZENERGY» قاۋىمداستىعى قازاقستان ۇكىمەتى, پارلامەنتى, مۇناي-گاز جانە ەنەرگەتيكا سالاسىندا جۇمىس ىستەپ جاتقان كومپانيالار اراسىنداعى ءىرى پىكىرتالاس الاڭى رەتىندە بۇل ىسكە بەلسەندى قاتىسىپ جاتىر.
وتىرىس بارىسىندا قر ەنەرگەتيكا ءمينيسترى نۇرلان نوعاەۆ 2020 جىلى كوپتەگەن ەلدەردە كارانتيننىڭ ەنگىزىلۋى سالدارىنان مۇناي-گاز ءوندىرۋ سەكتورى سۇرانىستىڭ كۇرت تومەندەۋىنە تاپ بولىپ, الەمدىك سۇرانىستان ۇسىنىستاردىڭ تىم ارتىق بولۋى بايقالاتىنىن ايتتى.
وسى ورايدا وپەك+ قاتىسۋشىلارى بۇرىن سوڭدى بولماعان شاراعا بارىپ, مۇناي ءوندىرۋدى 23% قىسقارتتى. وسى شارالار ءوزىنىڭ وڭ اسەرىن بەرىپ, نارىقتا سۇرانىس پەن ۇسىنىس بىرتىندەپ تەڭەسە باستادى. ءبىر باررەلدىڭ باعاسى 18 دوللاردان 55-كە ءوستى.
مينيستر «Kazenergy» قاۋىمداستىعىمەن بىرلەسكەن جۇمىستى جوعارى باعالادى. قاۋىمداستىق الاڭىنداعى جان-جاقتى پىكىرتالاستىڭ ارقاسىندا اكىمشىلىك پروتسەدۋرالار مەن فيسكالدى رەجيم تۇرعىسىندا ەنەرگەتيكالىق سەكتور كومپانيالارىنىڭ قىزمەتىن قولداۋ مەن ىنتالاندىرۋعا باعىتتالعان بىرقاتار شارا قابىلدانعانىن ەرەكشە اتاپ ءوتتى.
ال ەكولوگيا ءمينيسترى ماعزۇم مىرزاعاليەۆ بىلتىر قابىلدانعان جاڭا ەكولوگيالىق كودەكس قورشاعان ورتاعا زيان كەلتىرۋدىڭ الدىن الۋ شارالارىن قابىلداۋعا سەپتىگىن تيگىزەتىنىن ايتتى. بيىل ەلەكتروەنەرگەتيكا, تاۋ-كەن ونەركاسىبى, مەتاللۋرگيا, مۇناي وڭدەۋ, حيميا جانە تسەمەنت سالاسىنداعى ءىرى كاسىپورىندارعا ارنالعان جەتى مەيلىنشە قولجەتىمدى تەحنولوگيانى جاساۋ كوزدەلىپ وتىر.
ەلىمىزدە 97 كاسىپورىنعا كەشەندى تەحنولوگيالىق اۋديت جاساۋ جۇمىسى جالعاسىپ جاتىر. ونىڭ ىشىندە 23 كاسىپورىن ەنەرگەتيكا, ال 21-ءى مۇناي-گاز سەكتورىندا جۇمىس ىستەيدى.
«قازمۇنايگاز» ۇلتتىق كومپانياسى» اق باسقارما توراعاسى اليك ايدارباەۆ مەملەكەتتىك ورگاندار مەن سالانىڭ ەڭ ءىرى وكىلدەرى اراسىنداعى تىعىز قارىم-قاتىناستى قاجەت ەتەتىن بىرنەشە ماسەلەنى كوتەردى. اتاپ ايتساق, مۇناي-گاز-حيميا سالاسىن دامىتۋ, تەڭىز جوبالارىن ىسكە اسىرۋدىڭ جاڭا شارتتارى مەن وعان قاتىستى سالىق زاڭنامالارىن جەتىلدىرۋ ماسەلەلەرى.
جيىندا «شەلل» كونتسەرنىنىڭ توراعاسى وليۆە لازار ءسوز الىپ, مۇناي-گاز سەكتورىن كەم دەگەندە الداعى بىرنەشە ونجىلدىق ىشىندە ەكونوميكانىڭ ماڭىزدى سالاسى رەتىندە قولداۋ كەرەكتىگىن ايتتى.
ونىڭ پىكىرىنشە ەنەرگەتيكا سالاسىندا فيسكالدى تالاپتاردى ارى قاراي جاقسارتۋ, قازاقستاندا جوبالاردىڭ قۇنىن تومەندەتۋ, گاز رەسۋرستارىن يگەرۋگە مۇمكىندىك بەرۋ جانە اكىمشىلىك پروتسەدۋرالاردى جەڭىلدەتۋ قاجەت. وسىلاردىڭ ارقاسىندا قازاقستاننىڭ مۇناي-گاز سالاسىنا تارتىلاتىن ينۆەستيتسيالاردىڭ اناعۇرلىم تومەندەۋىنە جول بەرمەۋگە بولادى.
وتىرىستى قورىتىندىلاعان تيمۋر ق ۇلىباەۆ «Kazenergy» قاۋىمداستىعىنا گەولوگيالىق بارلاۋ, ينۆەستورلاردى فيسكالدى جانە رەتتەۋ شارالارى ارقىلى ىنتالاندىرۋ, قايتا قالپىنا كەلەتىن ەنەرگيا كوزدەرىن ءوندىرۋدى دامىتۋ, ەلىمىزدىڭ مۇناي جانە ەنەرگەتيكا مارتەبەسىن نىعايتۋ ماقساتىندا حالىقارالىق ەنەرگەتيكالىق ۇيىمدارمەن بايلانىسقا باسىمدىق بەرە وتىرىپ, مۇناي-گاز سالاسىنداعى ينۆەستيتسيالىق كليماتتى جەتىلدىرۋ بويىنشا جۇمىستارعا نازار اۋدار كەرەكتىگىن ايتتى.