سوڭعى 15 جىلدا قازاقستاندا 40 303 اۆتوكولىك ۇرلانعان, دەپ حابارلايدى Egemen.kz «حابار 24-كە» سىلتەمە جاساپ.
ولاردىڭ تەك 66-سى عانا ءوز يەلەرىنە قايتارىلدى. بۇل تۋرالى بۇگىن پارلامەنت ءماجىلىسىنىڭ توراعاسى نۇرلان نىعماتۋلين پالاتانىڭ جالپى وتىرىسىندا حابارلادى.
ىشكى ىستەر ءمينيسترى ەرلان تۇرعىمباەۆ ۇرلانعان تەمىر تۇلپارلاردىڭ باسىم بولىگى كورشىلەس ەلدەرگە جونەلتىلەتىنىن ايتتى. ول جەردە كولىكتەردىڭ ۆينكودتارى وزگەرتىلىپ, قايتا ساتىلادى.
سونداي-اق الاياقتار قازاقستان اۋماعىندا سول ۆينكودتاردى ساتىپ الىپ, ۇرلانعان تەحنيكانى قايتا تىركەيتىن كورىنەدى.
ءماجىلىس توراعاسىنىڭ مالىمدەۋىنشە, مۇنداي قىلمىستاردى ىشكى ىستەر ورگاندارى قىزمەتكەرلەرىنىڭ قاتىسۋىنسىز جاساۋ مۇمكىن ەمەس. وسى ورايدا نۇرلان نىعماتۋلين ءتارتىپ ساقشىلارى اراسىندا ازاماتتاردىڭ جەكە اقپاراتىن تاراتۋعا جول بەرمەۋدى تاپسىردى. ەل شەكارالارىندا ۇرلانعان كولىكتەردى انىقتاۋ جۇيەسىن جەتىلدىرۋ قاجەتتىلىگى دە ءسوز بولدى.
جيىن قورىتىندىسى بويىنشا دەپۋتاتتار تمد ەلدەرى اراسىندا وسى ماسەلەنى شەشۋ ءۇشىن ىنتىماقتاستىق ورناتۋ تۋرالى زاڭ جوباسىن قولدادى.