الەمدە ءوزىنىڭ ازاتتىعى ءۇشىن عاسىرلار بويى كۇرەسىن ۇزبەي جالعاستىرعان جانە تۇبىندە قولىن جەتكىزگەن ۇلتتاردىڭ ءبىرى – قازاقتار. سوندىقتان حالقىمىز ءۇشىن تاۋەلسىزدىك – كيەلى, قاستەرلى ۇعىم! ءبىز ونىڭ قادىرى مەن كيەسىن تۇسىنگەن ەلمىز.
پرەزيدەنت ق.توقاەۆتىڭ «تاۋەلسىزدىك بارىنەن قىمبات» اتتى ماقالاسىندا بيىلعى جىلدىڭ قايتا جاڭعىرعان قازاق مەملەكەتتىگىنىڭ, اتا-بابالارىمىز اڭساعان ازاتتىقتىڭ تۇعىرى نىعايا تۇسكەنىن ايگىلەيتىن ماڭىزدى بەلەس ەكەندىگىنە باسا ەكپىن تۇسىرىلگەن.
تاۋەلسىز مەملەكەت رەتىندە جاھاندىق كوشكە ىلەسكەن جاڭا قازاقستان ىرگەتاسىنىڭ قالانۋى, ازاتتىعىمىزدى نىقتاۋ, كەرەگەمىزدى كەڭەيتۋ جانە مەرەيلى ەلگە اينالۋدىڭ وڭاي سوقپاعانى بارىمىزگە ءمالىم. پرەزيدەنتىمىز اتالعان ماقالاسىندا ەگەمەندىكتىڭ وتىز جىلدىق عۇمىرىنا تالداۋ جاساي كەلە, ونى ءۇش ونجىلدىققا ءبولىپ, ەڭسەرگەن بەلەستەرىمىزدى, باعىندىرعان بيىكتەرىمىزدى, قول جەتكىزگەن تابىستارىمىزدى تارقاتا بايانداعان. تاريح تامىرىنا تەرەڭدەي بويلاساق, وسىناۋ سايىن دالادا كوشپەلىلەر وركەنيەتىن قالىپتاستىرعان, كىندىك قانى تامعان تۋعان جەرىن جانە ەركىندىگىن قاسىق قاندارى قالعانشا قورعاعان اتا-بابالارىمىز تاعدىردىڭ تالاي تارشىلىعىن, قيىن-قىستاۋ كەزەڭدى, ناۋبەتتى جىلداردى وتكەردى. ونىڭ بەر جاعىندا كەڭەستىك ءداۋىردىڭ زۇلماتتارىن دا باستان كەشىردىك. بىراق مويىمادىق, تاباندىلىق تانىتتىق. ورلىگىمىز بەن رۋحتىڭ اسقاقتىعى ۇلت رەتىندە جويىلىپ كەتۋدەن ساقتادى. وسىنى تۇيسىنگەن ادامعا كەرەكتىنىڭ ءبارى اتالعان ماقالادا كورىنىس تاپقان. بۇگىندە ءبىزدىڭ كورشى ەلدەرمەن حالىقارالىق زاڭدارعا نەگىزدەلىپ, رەسمي بەكىتىلگەن شەكارامىزعا, تۇتاستىعىمىزعا كۇمانمەن, قىزعانىشپەن قاراپ, ارانداتۋشىلىققا بوي الدىرىپ جۇرگەن شەتەل ازاماتتارىنىڭ ارەكەتتەرىنە دە پرەزيدەنتىمىز ماقالاسىندا عىلىمي نەگىزدەپ تويتارىس بەرە بىلگەن.
ءار قازاقتىڭ كوكەيىندە جۇرگەن, ەلىمىزدىڭ ىشكى, سىرتقى ساياساتىنا قاتىستى جاھاندىق سۇراقتارعا جاۋاپ بولاتىنداي ماسەلەلەر قامتىلعان. كەلەشەكتە ونداي كورشى مەملەكەتتەرمەن اراداعى تاتۋلىققا سىنا قاعۋشىلىققا جول بەرمەس ءۇشىن, اتقارىلار يگى ىستەرگە جول سىلتەگەن, ياعني ء«بىزدىڭ ۇلتتىق مۇددەنى اسپەن دە, تاسپەن دە قورعاۋعا دايىن بولۋىمىز قاجەتتىگىن» باسا ايتقان. تاۋەلسىزدىكتى الۋ بار, بىراق ونى قورعاپ قالۋ, باياندى ەتۋ, كەلەشەك ۇرپاقتىڭ قولىنا اماناتتاۋ مىناداي مىڭ قۇبىلعان, الماعايىپ زاماندا وڭاي ەمەس. سوندىقتان دا پرەزيدەنتىمىز ايتقانداي, «تاۋەلسىزدىك بارىنەن قىمبات» دەگەن ءسوزى ماڭگىلىك ۇرانىمىزعا اينالۋى كەرەك!
اقىلبەك كۇرىشباەۆ,
سەنات دەپۋتاتى