مەملەكەت باسشىسى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسىندا ايتىلعان ويلار حالقىمىز ءۇشىن اسا ماڭىزدى. ءبارىمىز ءبىلىپ وتىرعانداي, كورشى ەلدەگى بىرقاتار ازاماتتار قازاقستاننىڭ تەرريتورياسىنا, جەر اۋماعىنا قاتىستى ورىنسىز پىكىر ءبىلدىرىپ, بۇرىس كوزقاراس قالىپتاستىرعان بولاتىن. ەل پرەزيدەنتى وسى ماسەلەنى جان-جاقتى شەشۋ, اق-قارانى اجىراتۋ ماقساتىندا ناقتى ساياسي ۇستانىمىن جەتكىزدى.
راسىندا, قازاقستاننىڭ اۋقىمدى تەرريتورياسى ەشكىمنەن سىي رەتىندە بەرىلگەن جوق. ياعني اتا-بابالارىمىز كەزىندە بۇل ۇلان بايتاق دالانى نايزانىڭ ۇشىمەن, بىلەكتىڭ كۇشىمەن قورعاپ, ءوز ۇرپاقتارىنا اماناتتاعان بولاتىن. بۇل اسا ماڭىزدى ماسەلە. سوندىقتان بۇل ماقالا الداعى ۋاقىتتا ەل مەن جەرىمىزگە كوز تىگەمىن دەۋشىلەردىڭ بارلىعىنا ناقتى جاۋاپ بولدى دەپ ەسەپتەيمىن. مۇنداي جايتتار قايتالانا بەرمەۋى ءتيىس. بىرلىگىمىز بەن تۇتاستىعىمىزعا, يەلىك ەتىپ وتىرعان جەرىمىزگە ەشكىمنىڭ دە كوز تىگۋىنە قاقىسى جوق.
ارينە, ءبىزدىڭ ءسوزى مەن ىسىندە, ارەكەتىندە الالىعى جوق كورشىلەرىمىز كوپ. بارىنە بىردەي توپىراق شاشقىم كەلمەيدى. الايدا كەي ەلدەردەگى نيەتى بۇرىس نەكەن-ساياق ساياساتكەرلەر مەملەكەتارالىق دوستىق پەن ىنتىماقتاستىققا نۇقسان كەلتىرىپ جاتادى. وعان وسى كۇنى كوزىمىز انىق جەتىپ وتىر. «اۋماقتىق تۇتاستىعىمىزعا كۇمان كەلتىرىپ, تاتۋ كورشىلىك قاتىناستارعا سىنا قاققىسى كەلەتىن كەيبىر شەتەل ازاماتتارىنىڭ ارانداتۋشىلىق ءىس-ارەكەتتەرىنە رەسمي جانە قوعامدىق دەڭگەيدە تويتارىس بەرە وتىرىپ, اعارتۋشىلىق جۇمىستارىن ۇستامدىلىقپەن جۇرگىزگەن ءجون. ءبىز ۇلتتىق مۇددەنى اسپەن دە, تاسپەن دە قورعاۋعا دايىن بولۋىمىز قاجەتتىگىن تاعى دا باسا ايتقىم كەلەدى», دەدى پرەزيدەنت.
ق.توقاەۆ ايتىپ وتىرعانداي, ۇلتتىق مۇددەنى قورعاۋعا حالقىمىز دايىن. وعان ەشكىم دە كۇمان كەلتىرمەيدى. مەملەكەت باسشىسىنىڭ سوزىمەن ايتاتىن بولساق, «قازىر كىم نە ايتسا دا, ءبىزدىڭ ەكىجاقتى كەلىسىمدەرمەن بەكىتىلىپ, حالىقارالىق دەڭگەيدە تانىلعان شەكارامىز بار. ەندى وعان ەشكىم داۋلاسا المايدى».
قاسىم-جومارت كەمەل ۇلى ءبىر سوزىندە مەملەكەتتىك ءتىلدىڭ الداعى ۋاقىتتا ۇلتارالىق تىلگە اينالاتىنى انىق ەكەنىن ايتقان بولاتىن. پرەزيدەنت وسى ويىن ءبىز ايتىپ وتىرعان ماقالادا تاعى دا ايقىنداپ كورسەتتى. «بۇگىندە مەملەكەتتىك ءتىلدى بىلەتىن قازاقتىڭ دا, وزگە ەتنوس وكىلدەرىنىڭ دە ۇلەسى ەداۋىر ارتتى. قازاق ءتىلىن, شىن مانىندە, بۇكىل حالقىمىزدى بىرىكتىرۋشى فاكتورعا اينالدىرۋدىڭ بارلىق قۇقىقتىق تاسىلدەرى جانە كەپىلدىكتەرى قالىپتاستى. ماسەلە – نيەتتە. نيەتتىڭ دۇرىس بولۋى قازاق ءتىلىن مەڭگەرگىسى كەلەتىن ادامدارعا دا, وسى ماقساتقا جەتۋگە جاعداي جاسايتىن ۇكىمەتكە دە بايلانىستى», دەدى مەملەكەت باسشىسى.
مەملەكەتتىك ءتىلدى ءبىلۋ ءاربىر وتانداسىمىز ءۇشىن ۇلكەن مىندەتكە, قاستەرلى پارىزعا اينالۋى ءتيىس. بۇل تۋرالى قاسىم-جومارت توقاەۆ «مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ پارىزى. مىندەتى دەپ تە ايتۋعا بولادى. وسى ورايدا مەن بارشا قازاقستاندىقتارعا, ونىڭ ىشىندە قازاق ءتىلىن ءالى جەتە مەڭگەرمەگەن وتانداستارىما ۇندەۋ تاستاعىم كەلەدى. جاستار اعىلشىن ءتىلىن نەمەسە باسقا دا تىلدەردى از عانا ۋاقىتتا مەڭگەرە الاتىنىن كورىپ وتىرمىز. تۇتاس بۋىن الماسقان وسى جىلداردا قازاق ءتىلىن ۇيرەنگىسى كەلگەن ادام ونى الدەقاشان ءبىلىپ شىعار ەدى. حالقىمىزدا «ەشتەن كەش جاقسى» دەگەن ءسوز بار. ەڭ باستىسى, ىنتا بولۋى كەرەك», دەدى.
راسىندا, ءبىزدىڭ جاستارىمىز شەت ءتىلىن ءبىر, ءبىر جارىم ايدىڭ كولەمىندە ەركىن مەڭگەرىپ كەتەدى. سونداي ۇمتىلىس, تىلەك پەن نيەت قازاق ءتىلىن ۇيرەنۋ كەزىندە دە بولۋى كەرەك. مەملەكەتتىك ءتىلىمىز حالىقتى بىرىكتىرۋشى فاكتورعا اينالاتىن كۇنگە دە بىرتە-بىرتە جاقىنداپ كەلەمىز. وسى ماقساتتا ءتۇرلى قادامدار جاسالىنىپ جاتىر. ءالى دە جاسالىناتىن بولادى.
گەننادي شيپوۆسكيح,
ءماجىلىس دەپۋتاتى