ەندى تۇلەكتەر تەك مەملەكەتتىك مەكەمەلەردە عانا ەمەس, جەكەمەنشىك ۇيىمداردا دا جۇمىس ىستەپ, گرانتتارىن وتەي الادى. باستى شارت – دايىندىق باعىتى (ماماندىعى) بويىنشا جۇمىس ىستەۋ قاجەت. جۋىردا ءبىلىم جانە عىلىم ءمينيسترى اسحات ايماعامبەتوۆ تۇلەكتەر ءجيى كوتەرەتىن ماسەلە وڭ شەشىمىن تاپقانىن ايتتى.
«زاڭعا ەنگىزىلگەن جاڭا نورما ءتۇرلى ۇيىمدارداعى كادر ماسەلەسىن شەشۋگە سەپتىگىن تيگىزەدى ءارى تۇلەكتەردىڭ جۇمىسپەن قامتىلۋ مۇمكىندىكتەرىن كەڭەيتۋگە جول اشادى. مىسالى, ستۋدەنت اۋىلدىق كۆوتا ارقىلى فارماتسەۆتيكا باعىتى بويىنشا وقۋىن اياقتادى دەلىك. كەيىن ول اۋىلعا بارىپ, ءوز ماماندىعى بويىنشا مەملەكەتتىك ۇيىمدا جۇمىس ىستەۋگە مىندەتتى بولاتىن. ال اۋىلدا مەملەكەتتىك ءدارىحانا جوق بولسا شە؟ تۇلەكتىڭ قيىن جاعدايعا تاپ بولاتىنى انىق. سوندىقتان بۇل ماسەلە دە شەشىمىن تاپتى. ەندىگى كەزەكتە گرانتپەن وقىعان تۇلەك ءوز دايىندىق باعىتى بويىنشا جەكەمەنشىك ۇيىمداردا ەش كەدەرگىسىز جۇمىس ىستەي الادى», دەدى مينيستر.
قازىرگى ۋاقىتتا مەملەكەت-جەكەمەنشىك ارىپتەستىك دامىپ كەلەدى جانە مەملەكەتتىك تاپسىرىس جەكەمەنشىك بالاباقشالاردا, مەكتەپتەر مەن اۋرۋحانالاردا ورنالاستىرىلىپ جاتقانىن دا ەسكەرۋ قاجەت.
گرانت ارقىلى وقۋىن باستاپ, كەيىن اقىلى بولىمگە اۋىساتىن ازاماتتارعا قاتىستى تاعى ءبىر نورما قابىلداندى. كەيبىر گرانت يەگەرلەرى مەملەكەت شىعىنىن جۇمىسپەن وتەۋ ءراسىمىن اينالىپ ءوتۋدىڭ امالىن تاپقان. ولار گرانت ارقىلى ءۇشىنشى كۋرسقا دەيىن تەگىن وقىپ, ءۇش جىل بويى ستيپەنديا الادى. سودان كەيىن مەملەكەتتىك گرانتتى جۇمىسپەن وتەمەۋ ءۇشىن 4-كۋرستا اقىلى بولىمگە اۋىساتىن. وسىعان بايلانىستى مەملەكەت جۇمساعان شىعىنداردى وتەۋ بويىنشا دا تالاپتار وزگەردى.
«ماسەلەن, ستۋدەنت گرانتتا ەكى جىل وقىپ, كەيىن اقىلى بولىمگە اۋىستى دەلىك. بۇل جاعدايدا ستۋدەنت قانشا جىل گرانتتا وقىسا, سونشا جىل گرانتتى جۇمىسپەن وتەۋگە مىندەتتى بولادى. ءدال وسى نورما, اقىلى بولىمنەن گرانتقا اۋىسقان ستۋدەنتتەرگە دە قاتىستى بولادى», دەپ ءتۇسىندىردى مينيستر.