ۇنەمشىلدىك – ساراڭدىق ەمەس. اسىرەسە عالامدىق جىلىنۋ ۇدەپ, جايىق وزەنىنىڭ ارناسى تارتىلىپ جاتقان تۇستا سۋدى ۇنەمدەي بىلگەننىڭ ۇتارى انىق. ونىڭ ءتيىمدى ءتاسىلىن 7-سىنىپ وقۋشىسى قاجىمۇقان مۇقانوۆ ۇسىنىپ وتىر.
– تامشىلاتىپ سۋارۋ – سۋدى, سونداي-اق وسىمدىكتەردى زيانكەستەردەن قورعايتىن اگروحيميالىق تىڭايتقىشتاردى تامىرعا تىكەلەي ءارى بىركەلكى جەتكىزۋ ءۇشىن قولدانىلاتىن وندىرىستىك ءتاسىل. قوندىرعى قاقپاقشالارىنىڭ تورىمەن قۇبىرلاردىڭ, تۇتىكتەردىڭ كومەگىمەن سۋ باياۋ تامشىلايدى, – دەيدى ونەرتاپقىش وقۋشى قاجىمۇقان مۇقانوۆ.
ول يندەر اۋدانىنداعى س.سەيفۋللين اتىنداعى مەكتەپتە وقيدى. ساباقتان تىس ۋاقىتىن وقۋشىلاردىڭ شىعارماشىلىق ورتالىعىنداعى «شەبەر» ۇيىرمەسىندە وتكىزەدى. ۇيىرمە جەتەكشىسى وتەپقالي ناسىپقاليدىڭ ايتۋىنشا, قاجىمۇقان مۇقانوۆ – ىزدەنگىش بالا.
– ءبىزدىڭ ۇيىرمەمىز وقۋشىلاردىڭ ساباقتان تىس ۋاقىتىن ءتيىمدى ۇيىمداستىرۋ ماقساتىندا قۇرىلعان بولاتىن. مۇندا وقۋشىلار ءوز قابىلەتىن شىڭداپ, ويعا العان جوبالارىن ىسكە اسىرادى. سونداي وقۋشىنىڭ قاتارىنداعى قاجىمۇقان مۇقانوۆ ۇيىرمەگە 2017 جىلدان بەرى قاتىسادى. اۋداندىق, وبلىستىق سايىستاردا باق سىناپ, ءتۇرلى جۇلدەگە يە بولىپ ءجۇر, – دەيدى ۇيىرمە جەتەكشىسى وتەپقالي ناسىپقالي.
اتىراۋ وبلىسى