مۇز ۇستىندە ءىز قالدىرۋ وڭاي ما؟ بۇل ءۇشىن كاسىبي شەبەرلىك قاجەت شىعار. دەسەك تە, جاقىندا قۇرمانعازى اۋدانىنىڭ ورتالىعىندا تۇراتىن نۇرالى بەكتەمىروۆ مۇز ۇستىندە مانەرلەپ سىرعانادى. تەڭىز جاعاسىندا قاتقان مۇزدا سىرعاناۋ كوپشىلىكتى ءتانتى ەتتى.
ونىڭ سىرعاناۋ ءساتىن اعاسى ءادي ۆيدەوعا ءتۇسىرىپ, الەۋمەتتىك جەلىدە جاريالادى. ارينە نۇرالى بەكتەمىروۆ كاسىبي سپورتشى ەمەس. قازىر اباي اتىنداعى ورتا مەكتەپتىڭ 10-سىنىبىندا وقيدى. ول تۇراتىن اۋداندا سپورتتىڭ ءدال وسى تۇرىمەن اينالىسۋعا لايىقتى نىسان جوق. سوعان قاراماستان مەكتەپ وقۋشىسىنىڭ سىرعاناۋ مانەرى كاسىبي سپورتشىلاردىڭ شەبەرلىگىنەن كەم تۇسپەيدى. ونى اۋەسقوي سىرعاناۋشى دەۋگە بولادى.
– ءۇش-ءتورت جىل بۇرىن مانەرلەپ سىرعاناۋعا قىزىعۋشىلىعىم وياندى. سودان بەرى شەبەرلىگىمدى شىڭداپ كەلەمىن. ىنتالى جانعا مانەرلەپ سىرعاناۋ قيىن ەمەس, – دەيدى نۇرالى بەكتەمىروۆ.
سپورتتىڭ وسىناۋ بەكزات ءتۇرىن دامىتۋدى ويلاعاندار نۇرالى بەكتەمىروۆتىڭ تالپىنىسىنا نازار اۋدارعانىن قالار ەدىك. بالكىم, ونىڭ باعى جانعالى تۇرعان شىعار. تەگىندە مۇز ۇستىندە دە قازاق بالاسىنىڭ ءىزى سايراپ جاتۋى كەرەك ەمەس پە؟
اتىراۋ وبلىسى