قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 2020 جىلعى الەۋمەتتىك-ەكونوميكالىق دامۋىنىڭ جانە رەسپۋبليكالىق بيۋدجەتتىڭ اتقارىلۋىنىڭ قورىتىندىلارى قارالدى.
ەكونوميكانىڭ, بانك سالاسىنىڭ جاي-كۇيى, رەسپۋبليكالىق بيۋدجەتتىڭ اتقارىلۋى, مەملەكەتتىك ساتىپ الۋداعى جەرگىلىكتى قامتۋ تۋرالى ۇلتتىق ەكونوميكا ءمينيسترى ر. دالەنوۆ, ۇلتتىق بانك توراعاسى ە. دوساەۆ, قارجى ءمينيسترى ە. جاماۋباەۆ, ونەركاسىپ پەن ەنەرگەتيكا سەكتورىنداعى احۋال تۋرالى يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ جانە ەنەرگەتيكا ءمينيسترى ن. نوعاەۆ, اگروونەركاسىپتىك كەشەندەگى جاعداي تۋرالى اۋىل شارۋاشىلىعى ءمينيسترى س. وماروۆ باياندادى.
2020 جىلى وڭدەۋ ونەركاسىبىن, قۇرىلىستى, اۋىل شارۋاشىلىعىن قوسا العاندا, ناقتى سەكتورداعى ءوسىم قازاقستاننىڭ ۇلتتىق ەكونوميكاسى تۇراقتىلىعىنىڭ نەگىزگى فاكتورىنا اينالدى. ماسەلەن, وڭدەۋ ونەركاسىبىندە 3,9%-عا, ونىڭ ىشىندە مەتاللۋرگيا وندىرىسىندە 2,6%-عا, ازىق-ت ۇلىك ونىمدەرى وندىرىسىندە 4%-عا, فارماتسەۆتيكادا 47%-عا, ماشينا جاساۋدا 16,3%-عا, ونىڭ ىشىندە اۆتوموبيل جاساۋدا 52,5%-عا, سونداي-اق جەڭىل ونەركاسىپتە 15%-عا ءوسىم قامتاماسىز ەتىلدى.
قۇرىلىس كولەمى 11,2%-عا, تۇرعىن ءۇيدى پايدالانۋعا بەرۋ 16,8%-عا نەمەسە شامامەن 15,3 ملن شارشى مەترگە ۇلعايدى. اۋىل شارۋاشىلىعىندا 5,6%-عا تۇراقتى ءوسىم قامتاماسىز ەتىلدى.
وپەك+ قول جەتكىزىلگەن ۋاعدالاستىقتاردى ورىنداۋ قاجەتتىلىگى اياسىندا تاۋ-كەن ءوندىرىسى سالاسىندا شەكتەۋلى ديناميكا بايقالادى. سالا بويىنشا نكي 12 ايدىڭ قورىتىندىسى بويىنشا -3,7%-دى قۇرادى.
قر التىن-ۆاليۋتا رەزەرۆتەرى مەن ۇلتتىق قوردىڭ اكتيۆتەرى 2020 جىلعى 31 جەلتوقساندا $94,4 ملرد قۇراپ, ءبىر جىل ىشىندە $3,6 ملرد-قا ۇلعايدى.
ەكونوميكانىڭ تۇراقتىلىعى جۇمىسسىزدىق دەڭگەيىن 5%-عا دەيىنگى دياپازوندا ۇستاپ تۇرۋعا جانە حالىقتىڭ ناقتى كىرىستەرىنىڭ ايتارلىقتاي تومەندەۋىنە جول بەرمەۋگە مۇمكىندىك بەردى.
ۇكىمەتتىڭ قازىرگى داعدارىس جاعدايىندا ەكونوميكانىڭ تۇراقتىلىعىن قامتاماسىز ەتۋ جونىندەگى شارالارىنىڭ تيىمدىلىگىن الدىڭعى قاتارلى حالىقارالىق قارجى ينستيتۋتتارى, رەيتينگتىك اگەنتتىكتەر مەن كونسالتينگتىك كومپانيالار بىرنەشە رەت اتاپ ءوتتى.
ەپيدەميولوگيالىق احۋال باقىلاۋعا الىنعان, دەگەنمەن كەيبىر وڭىرلەردە ازاماتتاردىڭ قاۋىپسىزدىگىن قامتاماسىز ەتۋ ءۇشىن بەلگىلى ءبىر شەكتەۋلەر ساقتالعان.
ەپيدەميولوگيالىق جاعدايدىڭ تۇراقتانۋى اياسىندا قىزمەت كورسەتۋ سەكتورىندا بىرتىندەپ قىزمەت قالپىنا كەلتىرىلىپ جاتىر. جەلتوقسان ايىندا قاراشامەن سالىستىرعاندا قىزمەت ساۋدا (+1,4%) جانە بايلانىس (+0,2%) سالالارىندا ودان ءارى قالپىنا كەلتىرىلدى.
اقمولا, اقتوبە, الماتى, شىعىس قازاقستان, جامبىل, قوستاناي, سولتۇستىك قازاقستان جانە تۇركىستان وبلىستارى, سونداي-اق نۇر-سۇلتان جانە شىمكەنت قالالارى نەگىزگى 7 كورسەتكىشتىڭ 5-ءى بويىنشا الەۋمەتتىك-ەكونوميكالىق دامۋ ءوسىمىن قامتاماسىز ەتتى. 4 كورسەتكىش بويىنشا قاراعاندى, ماڭعىستاۋ, پاۆلودار وبلىستارى مەن الماتى قالاسىندا وڭ ديناميكاعا قول جەتكىزىلدى.
«2020 جىل سىن-تەگەۋرىندەرگە تولى جىل بولدى. ۋاقىتىلى قابىلدانعان شارالاردىڭ ارقاسىندا ءبىز ولاردى ەڭسەرە الدىق. ەلىمىزدىڭ تۇراقتى الەۋمەتتىك-ەكونوميكالىق دامۋىن ودان ءارى قامتاماسىز ەتۋ جانە حالىقتىڭ تۇرمىس ساپاسىن ارتتىرۋ ماقساتىندا "Nur Otan" پارتياسىنىڭ سايلاۋالدى باعدارلاماسىن ءتيىمدى ىسكە اسىرۋ قاجەت», — دەدى ا. مامين.
ۇكىمەت باسشىسى قر پرەزيدەنتى قاسىم-جومارت كەمەل ۇلى توقاەۆتىڭ توراعالىعىمەن وتەتىن ۇكىمەتتىڭ كەڭەيتىلگەن وتىرىسىندا الەۋمەتتىك-ەكونوميكالىق دامۋ قورىتىندىلارى مەن الداعى كەزەڭگە ارنالعان مىندەتتەر ەگجەي-تەگجەيلى قارالاتىنىن مالىمدەدى.