مەملەكەت باسشىسى قاسىم-جومارت توقاەۆ ءباسپاسوز بريفينگىندە قاڭتاردىڭ 15-ءى كۇنى وزەكتى ماسەلە كوتەرىلەتىنى تۋرالى ايتتى, دەپ حابارلايدى Egemen.kz.
"قاڭتاردىڭ 15-ءى كۇنى پارلامەنت دەپۋتاتتارىنىڭ الدىندا ءسوز سويلەيمىن. سوندا بىرنەشە وزەكتى ماسەلە كوتەرىلمەك. ەڭ الدىمەن رەفورمالار بويىنشا ايتىلادى. رەفورمالاردى جالعاستىرۋ كەرەك.
سونداي-اق ۇلتتىق سەنىم كەڭەسىنىڭ جيىنى وتپەك. بۇل ءىس-شارادا دا ماڭىزدى رەفورمالار توپتاماسى تالقىلانادى", دەدى مەملەكەت باسشىسى.
پرەزيدەنت ءباسپاسوز بريفينگىندە اقش-تاعى احۋالعا قاتىستى دا ءوز پىكىرىن ايتتى.
- بۇكىل الەم سەكىلدى قازاقستان دا اقش-تاعى احۋالدى مۇقيات باقىلاپ وتىر. سايلانعان پرەزيدەنت دجو بايدەننىڭ شەشىمىمەن كەلىسەمىز. امەريكا دەموكراتياسىنىڭ تسيتادەلى - كاپيتوليدى باسىپ الۋ زاڭسىز, ەكسترەميزم ەكەنى ءسوزسىز. بۇعان قاتىستى ءتيىستى شارالار قابىلدانۋى كەرەك. اقش پەن قازاقستان اراسىنداعى قارىم-قاتىناس دامي تۇسەدى دەپ ۇمىتتەنەمىن. اقش 1991 جىلى رەسمي تۇردە قازاقستاننىڭ تاۋەلسىزدىگىن مويىنداعان العاشقى مەملەكەت. ءبىزدىڭ تاراپىمىزدان ەكىجاقتى قارىم-قاتىناستى نىعايتا بەرۋگە كۇش سالامىز, دەدى قاسىم-جومارت كەمەل ۇلى.