گەرمانيانىڭ «حريستيان دەموكراتيالىق وداعى» پارتياسى (CDU) 2021 جىلعى قاڭتاردا كونگرەسس وتكىزىپ, پارتيانىڭ جاڭا كوشباسشىسىن سايلايدى. سونداي-اق جاڭا باسشى كەلەر جىلى وتەتىن كانتسلەردى سايلاۋعا تۇسەدى. قىسقاسى, نەمىستەر قاڭتار ايىندا كانتسلەر انگەلا مەركەلدىڭ ءىزباسارىن انىقتايدى.
ءبىر قىزىعى, مەركەل حانىمنىڭ مەرزىمى اياقتالىپ كەلە جاتقانىمەن, گەرمانيادا ونىڭ تانىمالدىلىعى بىرنەشە ەسە ارتا ءتۇستى. ماسەلەن, وتكەن ايدا جۇرگىزىلگەن ساۋالداماعا سۇيەنسەك, ونى قولدايتىندار سانى 70 پايىزدان اسىپ ءتۇسىپتى. جاۋاپ بەرگەندەردىڭ كوپشىلىگى كانتسلەردىڭ كوروناۆيرۋسپەن كۇرەستەگى ەڭبەگىن جوعارى باعالاعان.
دەگەنمەن, 2021 جىلدىڭ قازانىندا انگەلا مەركەلدىڭ وكىلەتتىگى اياقتالادى. سودان كەيىن ەل تىزگىنىن كىم ۇستاماق؟ ونىڭ ءىزباسارى كىم بولماق؟ قازىر گەرمانيانى وسى سۇراق مازالاپ تۇر. اسىرەسە تاياۋدا تەلەارنالاردىڭ بىرىنە سۇحبات بەرگەن كانتسلەردىڭ ءسوزى پىكىرتالاستى ودان ءارى دامىتا ءتۇستى. سۇحبات بارىسىندا جۋرناليست «بالكىم, كەيدە وسى قىزمەتتە قالا بەرگەنىم دۇرىس بولار ەدى دەگەن وي كەلە مە؟» دەگەن سۇراعىنا مەركەل «جوق» دەپ قىسقا قايىرعان. وسىلايشا, ىزباسارعا قاتىستى بولجام قىزۋ تالقىعا ۇلاسىپ جاتىر.
ءاۋ باستا قازىرگى كانتسلەر ءوزىنىڭ ءىزباسارى رەتىندە قورعانىس ءمينيسترى اننەگرات كرامپ-كاررەنباۋەردى تاڭداعان ەدى. بىراق CDU پارتياسىنىڭ ىشىندە قولداۋعا يە بولماعاندىقتان, ول ۇسىنىستان باس تارتتى. نەگىزى اننەگرات حانىم 2017 جىلدان بەرى پارتيانىڭ توراعاسى قىزمەتىن اتقارىپ كەلگەن ەدى. وسىلايشا, CDU-ءدىڭ تىزگىنىن ۇستاۋعا تارتىس قىزا ءتۇستى.
قازىرگى تاڭدا مەركەلدىڭ جولىن جالعاۋدان ۇمىتكەر ۇشەۋ. ولار: گەرمانيانىڭ ەڭ حالقى كوپ ءوڭىرى – سولتۇستىك رين-ۆەستپاليا پرەمەر-ءمينيسترى ارمين لاسچەت, بۋندەستاگتىڭ سىرتقى ىستەر كوميتەتى توراعاسى نوربەرت روەتتگەن جانە زاڭگەر فريدريح مەرتس.
جالپى, «حريستيان دەموكراتيالىق وداعى» پارتياسىنىڭ كوشباسشىسىن تاڭداۋ قيىنعا سوعىپ تۇر. اننەگرات كرامپ-كاررەنباۋەر لاۋازىمىنان باس تارتقاننان كەيىن كوپ ۇزاماي كوروناۆيرۋس پاندەمياسى باستالىپ, پارتيا ىشىلىك سايلاۋ جايىنا قالدى.
جوعارىدا مەركەلدىڭ ءىزىن جالعايتىن ءۇش كانديداتتىڭ ءتىزىمىن كەلتىردىك. ءدال قازىر سولاردىڭ قايسىسى وزىپ شىعاتىنىن ءدوپ باسىپ ايتۋ قيىن. جالپى, انگەلا حانىم ارمين لاسچەتتى دۇرىس كورەدى. كوروناۆيرۋس ىندەتى جاپپاي تاراعانعا دەيىن ول تۋرالى ەل ىشىندە جىلى پىكىر قالىپتاسقان-تۇعىن.
بىراق پاندەميا ءبارىن وزگەرتىپ كەتتى. ماسەلەن, سولتۇستىك رين-ۆەستپاليا شتاتى ۆيرۋستان قاتتى زارداپ شەكتى. ايماقتا دەرتكە شالدىققاندار سانى كۇن ساناپ ارتىپ جاتقان كەزدە لاسچەت لوكداۋن ەنگىزۋگە اسىققان جوق. ونىڭ ۇستىنە, العاشقىلاردىڭ ءبىرى بولىپ كارانتيندىك شەكتەۋ شارالارىن جەڭىلدەتۋگە كىرىستى. وسىلايشا ءاپ-ساتتە تۇرعىنداردىڭ نارازىلىعىنا ۇشىرادى.
ساراپشىلاردىڭ پايىمداۋىنشا, لاسچەتتىڭ كوروناۆيرۋسقا جول بەرمەۋ جونىندەگى ارەكەتتەرى ونىڭ كوشباسشىلىق قابىلەتىنە نۇقسان كەلتىردى. ناتيجەسىندە, ونىڭ پارتيا توراعاسىنا سايلانۋ ىقتيمالدىلىعى كۇرت تومەندەگەن.
نوربەرت رەتتگەن مەن فريدريح مەرتستىڭ دە اسىعى الشىسىنان ءتۇسىپ تۇرعانى شامالى. ايتسە دە كەيىنگىسى ساۋالدامالاردا قارسىلاستارىنا قاراعاندا ءبىر ساتى جوعارى تۇر. ونىڭ ۇستىنە, مەرتس ءوزىنىنىڭ ليبەرالدى كوزقاراسىمەن بەلگىلى. بىراق پارتيانىڭ ىشىندە اسا تانىمال ەمەس.
قىسقاسى, گەرمانيانىڭ كەلەسى كانتسلەرى كىم بولاتىنى ازىرگە جۇمباق. ويتكەنى انگەلا مەركەل سەكىلدى ساياساتكەردى الماستىرۋ ەكىنىڭ ءبىرىنىڭ قولىنان كەلە بەرمەيتىنى بەلگىلى. باسقاسىن ايتپاعاندا, ءىرى حالىقارالىق جيىنداردا, جوعارى دەڭگەيدەگى كەزدەسۋلەردە ۇنەمى قىزعىلت-سارى بەشپەت, قارا شالبار كيىپ جۇرەتىن انگەلا مەركەلدى الەمدىك قوعامداستىق سالماقتى ساياساتكەر, قاجىمايتىن قايراتكەر رەتىندە جاقسى بىلەدى.
كەز كەلگەن ماسەلەدە ءوز ەلىنىڭ مۇددەسىمەن قاتار, گەرمانيا مۇشە بولىپ تابىلاتىن ەۋروپالىق وداقتىڭ دا مۇددەسىن قورعاۋدان استە شارشاعان ەمەس. سوندىقتان بولار, ونىڭ ۇسىنىسىمەن وداق قۇرامىنداعى ەلدەردىڭ باسشىلارى دا ساناسادى.
انگەلا مەركەل گەرمانيا تاريحىندا كانتسلەرلىك قىزمەتكە سايلانعان تۇڭعىش ايەل جانە ول وسى جوعارى لاۋازىمدى اتقارعانداردىڭ ىشىندەگى ەڭ جاسى. سونداي-اق ساياساتكەر گفر كانتسلەرى بولىپ ءتورت مارتە, «حريستيان-دەموكراتيالىق وداعى» پارتياسىنىڭ جەتەكشىلىگىنە قاتارىنان توعىز رەت سايلانعان تۇلعا.