جۋىردا يادرولىق قاۋىپسىزدىك جونىندەگى جاھاندىق سامميتتە ەلباسىنا بەيبىتشىلىك جانە الدىن الۋ ديپلوماتياسى سىيلىعى تابىس ەتىلدى. بۇل جاڭالىقتى مەن ەرەكشە كوڭىلمەن, ماقتانىشپەن قابىل الدىم.
“شىعىس-باتىس” ينستيتۋتىنىڭ بەيبىتشىلىك جانە الدىن الۋ ديپلوماتياسى سىيلىعى اقش-تىڭ ەڭ بەدەلدى ناگرادالارىنىڭ ءبىرى جانە ول مەملەكەتتىك باسقارۋ, قاۋىپسىز الەم قۇرۋ سالاسىنداعى ەرەكشە جەتىستىكتەرى ءۇشىن ءارتۇرلى ەلدەردىڭ ساياسي جانە مەملەكەت قايراتكەرلەرىنە بەرىلەدى. ەلباسى وسىلايشا حالىقارالىق ارەناداعى قازاقستان بەدەلىن اسقاقتاتىپ, ەلىمىزدىڭ جاسامپاز ميسسياسىن حالىقارالىق قاۋىمداستىق الدىندا تانىتتى.
امەريكا تورىندە تاپسىرىلعان بۇل سىيلىق – قازاقستان ابىرويىن جاڭا بيىكتىككە كوتەرگەن ماراپات دەپ ەسەپتەيمىز.
بۇل سىيلىق – ەلىمىزدىڭ تۇڭعىش پرەزيدەنتى ن.ءا.نازارباەۆتىڭ قازاقستاننىڭ تاۋەلسىزدىك العاننان بەرى كوپ قىرلى بەيبىتسۇيگىش سىرتقى ساياساتىنىڭ جەمىسى. 1991 جىلدىڭ 29 تامىزىندا مەملەكەت باسشىسى نۇرسۇلتان نازارباەۆ ەرەكشە باتىلدىقپەن شەشىم قابىلداي وتىرىپ, سەمەي پوليگونىن جاپتى. 1993 جىلى قازاقستان تمد-دا العاشقىلاردىڭ ءبىرى بولىپ يادرولىق قارۋلاردى تاراتپاۋ ءجونىندەگى كەلىسىم-شارتقا قوسىلدى. قازاقستان يادرولىق قارۋدان ءوز ەركىمەن باس تارتقان الەمدەگى ءبىرىنشى ەل بولىپ تابىلادى.
دۇنيەدە بەيبىت ومىردەن, مامىراجاي تىنىشتىقتان, سول تىنىشتىق ورتاسىنداعى گۇلدەنگەن الەمنەن, سول الەمنىڭ ورتاسىنداعى اتا-انا قۇشاعىنداعى ءسابيدىڭ ءتاتتى كۇلكىسىنەن ارتىق نە بار؟ وسىنىڭ ءبارى ەلىمىزدەگى تىنىشتىق پەن ەل باسشىلىعىنىڭ دۇرىس ساياسات جۇرگىزۋىنىڭ جەمىسى ەكەندىگى انىق. اقش پەن ەۋروپا وداعى باسشىلارىنىڭ ەلباسىنا دەگەن قۇرمەتى – قازاقستان مەرەيى.
الەمنىڭ قازاقستان بەدەلىن مويىنداپ, مەملەكەت باسشىسىنا وسىلايشا ايرىقشا قۇرمەت پەن سەنىم ءبىلدىرۋى قازاقستاننىڭ ءارى قاراي دامۋىنا كوپ ۇلەس قوسادى. بارلىق جەرلەستەرىمنىڭ اتىنان ەلباسىنا العىس بىلدىرە وتىرا, زور دەنساۋلىق, بەرەكە-بىرلىك تىلەيمىن.
جاسۇلان قۇداباەۆ, ۇوس ارداگەرى.
سولتۇستىك قازاقستان وبلىسى.