قورعانىس ءمينيسترى, گەنەرال-لەيتەنانت نۇرلان ەرمەكباەۆ ورتالىق كوممۋنيكاتسيالار قىزمەتىندە ءباسپاسوز كونفەرەنتسياسىن وتكىزدى. جيىندا مينيستر ەلىمىزدىڭ قارۋلى كۇشتەرىندە اسكەري قىزمەتشىلەرگە ءبىلىم بەرۋ جانە كاسىبي دامىتۋ ماسەلەلەرىنە ءبىرىنشى كەزەكتە نازار اۋدارىلعانىن اتاپ ءوتتى.
بريفينگتە بەلگىلى بولعانداي, وتكەن وقۋ جىلىندا قارۋلى كۇشتەردە 60 مىڭنان استام مامان ازىرلەندى. بۇدان وزگە, 200-دەن استام وقۋ-جاتتىعۋ, اسكەري كولىك پەن اۆتوكولىك تەحنيكالارىن جۇرگىزۋ جونىندە 16 مىڭ ساباق وتكىزىلدى, 20 مىڭ جاۋىنگەرلىك اتىس ءوتتى. ساباقتار كۇندىزگى جانە تۇنگى مەزگىلدە وتكىزىلدى. اسكەرلەر زاماناۋي قارۋ-جاراقپەن جاراقتانۋدا. مەملەكەت باسشىسىنىڭ ناقتىلاعان باسىمدىقتارى بويىنشا مينيسترلىك اۋە شابۋىلىنا قارسى قورعانىستى كۇشەيتپەك, اسكەر تۇرلەرى مەن تەكتەرىندە راديەلەكتروندىق كۇرەس ەلەمەنتتەرىن دامىتىپ, اسكەري-ترانسپورتتىق اۆياتسيا پاركى ۇلعايتىلاتىن بولادى. جاۋىنگەرلىك دايارلىققا ەڭ قاجەتتى كومپونەنتتەر, اتاپ ايتقاندا, وزىق تەحنولوگيالار مەن قۇرالدار ەنگىزىلەدى. قارۋلى كۇشتەردى جاراقتاندىرۋ ۇدەرىسى جوسپارلى تۇردە جۇرگىزىلىپ, اسكەرگە ەل قاۋىپسىزدىگىن قامتاماسىز ەتۋگە مۇمكىندىك بەرەدى.
ءمينيستردىڭ ايتۋىنشا, بيىل 370 بىرلىكتەن استام اسكەري تەحنيكا ساتىپ الىنىپ, 200 بىرلىكتەن اسا تەحنيكا كۇردەلى جوندەۋدەن وتكىزىلىپ, جاڭارتىلدى. قارۋلى كۇشتەرگە العاش رەت «بۋك» زەنيتتىك-زىمىراندىق كەشەنى اكەلىندى. بۇدان وزگە, ەلىمىزدىڭ اۋە كەڭىستىگىن باقىلاۋدى ىسكە اسىرۋ ماقساتىندا شاعىن بيىكتىكتەگى نىسانالاردى انىقتايتىن «روسا» راديولوكاتسيالىق ستانسالارى, سونداي-اق ەلىمىزدە جاسالعان «نۇر» راديولوكاتسيالىق ستانسالارى ساتىپ الىنىپ, قارۋ قۇرامى تولىقتى. ارتيللەريالىق بارلاۋدى دامىتۋ ءۇشىن قوزعالاتىن نىسانداردى جانە باتارەيالارعا قارسى كۇرەستى بارلاۋعا ارنالعان «پلاتفورما» راديولوكاتسيالىق ستانسالارى اكەلىندى. سونىمەن قاتار اسكەرلەرگە زاماناۋي سۋ-30 سم ۇشاقتارى, مي-35 تىكۇشاقتارى, ۇشقىشسىز ۇشۋ اپپاراتتارى كەلىپ ءتۇستى. اسكەري وقۋ ورىندارى روبوت تەحنيكاسى مەن راديوەلەكتروندىق كۇرەسكە باسىمدىق بەرە وتىرىپ, عىلىمي زەرتتەۋلەر جۇرگىزۋدە.
اسكەرلەردە كومانديرلەردىڭ باستاماسى دامۋدا, عىلىمي جۇمىس جۇرگىزىلۋدە. اسكەري ماماندار دروندارعا قارسى قارۋدى, ۇشقىشسىز ۇشۋ اپپاراتتارىن ازىرلەدى. عىلىمي ۆزۆودتار قۇجاتتاردى بەرۋدىڭ اۆتوماتتاندىرىلعان جۇيەسىن ازىرلەدى. بۇل مەملەكەتتىك قىزمەت كورسەتۋ كەزىندە بيۋروكراتيالىق راسىمدەردى قىسقارتادى. الەۋمەتتىك ساياساتتىڭ جاڭا پاراديگماسى اياسىندا اسكەري قىزمەتشىلەردىڭ تۇرعىن ءۇي-تۇرمىستىق جاعدايلارىن جاقسارتۋ جونىندەگى جۇمىستار جالعاسۋدا. كازارمالىق-تۇرعىن ءۇي قورىنىڭ جاڭا وبەكتىلەرى, ونىڭ ىشىندە جەڭىل مودۋلدىك قۇرىلىستار, كازارمالار, اسحانالار, قويمالار, وقۋ جانە سپورت كەشەندەرى سالىنۋدا. بيىل وسىنداي 56 عيمارات سالىندى. بۇدان بولەك, 2020 جىلى ءۇيسىز جۇمىستان شىققان اسكەري زەينەتكەرلەردى تۇرعىن ۇيمەن قامتاماسىز ەتۋ بويىنشا شارالار قابىلداندى.
بيىل اسكەري قىزمەتشىلەردى الەۋمەتتىك قامتاماسىز ەتۋگە قورعانىس مينيسترلىگىنىڭ جىلدىق بيۋدجەتىنەن 67 پايىز قاراجات جۇمسالدى. قورعانىس ۆەدومستۆوسىنىڭ بارلىق قىزمەتى بيۋدجەت ءتارتىبىن مۇلتىكسىز ساقتاۋمەن ىسكە اسىرىلادى. قاراجاتتى ءتيىمدى جۇمساۋ اياسىندا كورسەتكىشتەردى تالداۋعا, پروبلەمالار مەن تولىق ەمەس ەسەپتەر كورسەتىلگەن تالداۋ جۇرگىزۋ ارقىلى بيۋدجەتتىك باعدارلاماعا اي سايىن مونيتورينگ جۇرگىزەدى. مينيسترلىك قارجىلاندىرۋدىڭ بالاما كوزدەرىن ىزدەيدى, قارۋلى كۇشتەردىڭ قۇرىلىمىن وڭتايلاندىرۋ ارقىلى ۇنەمدەۋگە قول جەتكىزەدى. مەملەكەت-جەكەمەنشىك ارىپتەستىگى تەتىگى پىسىقتالۋدا. بيىل 9,3 ملرد تەڭگە ۇنەمدەلدى. بۇل وتكەن جىلمەن سالىستىرعاندا ءۇش ەسە جوعارى.
قورعانىس مينيسترلىگىندە «تسيفرلى ارميا» باعدارلاماسى اياسىندا حالىققا قىزمەت كورسەتەتىن 13 مەملەكەتتىك قىزمەت ەلەكتروندى فورماتقا اۋىستىرىلدى. ەندى ءتۇرلى انىقتامالاردى, تىركەۋ كۋالىكتەرى مەن اسكەري بيلەتتەردى, اسكەري ەسەپكە قويۋ مەن شىعارۋ, اسكەري-تەحنيكالىق مەكتەپتەرگە ءتۇسۋدى ەلەكتروندى ۇكىمەت پورتالى ارقىلى رەسىمدەۋگە جانە الۋعا بولادى. اۆتوماتتاندىرىلعان باسقارۋ جۇيەسىنىڭ قولدانۋ اياسى كەڭەيتىلدى.
ءسوزىنىڭ سوڭىندا قورعانىس ءمينيسترى وتانداستارىمىزعا قارۋلى كۇشتەر – ەلدىڭ ەگەمەندىگى مەن اۋماقتىق تۇتاستىعىنىڭ, ءاربىر قازاقستاندىق وتباسىنىڭ تىنىشتىعى مەن سەنىمدىلىگىنىڭ كەپىلى ەكەندىگىن ايتتى.