كوروناۆيرۋس ينفەكتسياسىنىڭ الدىن الۋ ماقساتىندا بيىل جاڭا جىل مەرەكەسىن اتاپ ءوتۋ جىلداعىدان وزگەشە بولماق. وسىعان وراي قىزىلوردا قالاسى اكىمدىگى تاراپىنان شاھاردى جاڭاجىلدىق بەزەندىرۋگە بيۋدجەتتەن ارنايى قارجى بولىنگەن جوق, دەپ حابارلايدى Egemen.kz
بۇعان قوسا, مەرەكەنىڭ باس سيمۆولى رەتىندە ورتالىق الاڭعا ورناتىلاتىن جاڭا جىلدىق شىرشا جاڭادان ساتىپ الىنبايدى. قازىر ەكى جىل بۇرىن الىنعان شىرشا قايتا جاساقتالىپ, ورناتىلۋدا. ول رەسمي تۇردە اشىلمايدى. مەرەكەلىك شارالار وتكىزىلمەيدى.
قىزىلوردا وبلىسىنىڭ باس سانيتارىنىڭ 2020 جىلعى 31 قازانداعى №25 قاۋلىسىنىڭ 1.3 تارماعىندا وتباسىلىق, سالتاناتتى, ەستەلىك ءىس-شارالاردى (بانكەتتەر, ۇيلەنۋ تويلارى, مەرەيتويلار, ەسكە الۋ), ونىڭ ىشىندە ۇيدە جانە ادامدار كوپ جينالاتىن وزگە دە ءىس-شارالاردى وتكىزۋگە تىيىم سالىنعان. قالا اكىمدىگى قىزمەتكەرلەرى وسى تىيىمدى باسا ۇستانادى.