تۇركىستان وبلىسىندا پوليتسەيلەر جول اپاتىنان كەيىن وقيعا ورنىنان قاشىپ كەتكەن جۇرگىزۋشىنى ۇستادى, دەپ حابارلايدى Egemen.kz. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارالدى.
سايرام اۋداندىق پوليتسيا ءبولىمىنىڭ كەزەكشىسىنە تۇنگى ۋاقىتتا الماتى-تاشكەنت-تەرمەز تاس جولىنىڭ 667 شاقىرىمىندا جول-كولىك وقيعاسى بولعانى تۋرالى حابارلاما كەلىپ تۇسەدى. وقيعا ورنىنا شۇعىل جەتكەن پوليتسيا قىزمەتكەرلەرى بەلگىسىز كولىكتىڭ جۇرگىزۋشىسى جولدى كەسىپ وتپەك بولعان تۇرعىندى قاعىپ, سوڭىنان قاشىپ كەتكەنىن انىقتاعان. اپات سالدارىنان جاياۋ جۇرگىنشى وقيعا ورنىندا كوز جۇمدى.
اتالعان جايت سايرام اۋداندىق پوليتسيا باسقارماسىندا قر قك-ءنىڭ 345-بابى (كولىك قۇرالدارىن جۇرگىزۋشى ادامداردىڭ جول قوزعالىسى نەمەسە كولىك قۇرالدارىن پايدالانۋ ەرەجەلەرىن بۇزۋى) جانە 347-بابى (جول-كولىك وقيعاسى بولعان جەردەن كەتىپ قالۋ) بويىنشا تىركەلدى.
جول-كولىك وقيعاسىنا قاتىسى بار جۇرگىزۋشىنى ۇستاۋ ماقساتىندا سايرام اۋداندىق پوليتسيا باسقارماسى قىزمەتكەرلەرىمەن جەدەل-ىزدەستىرۋ جۇمىسى جۇرگىزىلدى.
وقيعا ورنىنان بەلگىسىز جۇك كولىگىنىڭ سىنىق قالدىقتارى الىندى. جۇرگىزىلگەن ءىس-شارالار ناتيجەسىندە ءتارتىپ ساقشىلارى كىنالى جۇرگىزۋشىنى قولعا ءتۇسىردى. ول قاماۋعا الىندى. تەكسەرۋ بارىسىندا انىقتالعانداي تاشكەنت باعىتىنا قاراي كەتىپ بارا جاتقان «مەرسەدەس-بەنس» ماركالى جۇك كولىگىنىڭ جۇرگىزۋشىسى بەلگىلەنبەگەن جەردەن كەسىپ وتپەك بولعان الماتى قالاسىنىڭ تۇرعىنىن قاعىپ كەتكەن.
قازىرگى ۋاقىتتا وقيعا بويىنشا سوتقا دەيىنگى تەرگەۋ امالدارى جۇرگىزىلۋدە. ساراپتاما تاعايىندالدى. ءتارتىپ ساقشىلارى بولعان وقيعانىڭ بارلىق ءمان-جايلارىن انىقتاۋدا.