اتىراۋعا دەمەۋشىلەر گەرمانيادان شىرشا اكەلدى. شىرشانىڭ بيىكتىگى – 9 مەتر. قالالىق اكىمدىك ونى ماحامبەت اتىنداعى اكادەميالىق قازاق دراما تەاترىنىڭ الدىنداعى الاڭعا ورناتتى.
«شىرشانى ورناتۋعا بيۋدجەتتەن قارجى بولىنگەن جوق. ونى دەمەۋشىلەر قالاعا سىيعا تارتتى. ال اكىمدىك تاراپىنان شىرشانى ورناتۋ ءۇشىن الدىن الا ورىن دايىندالدى. كولەمى 4ح4, تەرەڭدىگى 1,5 مەتر بولاتىن شۇڭقىر قازىلدى. شىرشا ورناتىلاتىن ورىن ۆەرميكومپوستپەن جانە باسقا دا قاجەتتى ورگانيكالىق مينەرالدى تىڭايتقىشتارمەن وڭدەلدى. شىرشانى شۇڭقىرعا ورناتۋ ءۇشىن شامامەن 0,5 مەتر درەناج قاباتىنا قۇم, قيىرشىقتاس, وزگە دە قوسپا سالىندى» دەپ حابارلادى قالالىق اكىمدىكتىڭ ءباسپاسوز قىزمەتى.