تۇركىستاندا پوليتسەيلەر بىرنەشە رەت سوتتى بولعان قىزىلوردالىق ازاماتتى بەينەباقىلاۋ كامەرالارىنىڭ جازباسى ارقىلى ۇستادى, دەپ حابارلايدى Egemen.kz.
بۇل جايىندا تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى مالىمدەدى.
تۇركىستان قالالىق پوليتسيا باسقارماسىنىڭ كەزەكشى بولىمىنە جەرگىلىكتى تۇرعىن بەلگىسىز ەر ادام ۇيىنەن ۇيالى تەلەفونى مەن قۇجاتتارىن الداپ, ۇرلاپ كەتكەنى تۋرالى ارىزدانعان.
جابىرلەنۋشىنىڭ ايتۋىنشا, الاياق ولاردىڭ سەنىمىنە كىرىپ, قيىن جاعدايعا تاپ بولدىم دەگەن سىلتاۋمەن اقشا سۇراعان. سودان كەيىن ولاردىڭ بايقاماي تۇرعان ءساتىن پايدالانىپ, كۇدىكتى Samsung ماركالى ۇيالى تەلەفونى مەن ونىڭ قۇجاتتارىن ۇرلاپ, بەلگىسىز باعىتقا قاشىپ كەتكەن.
جابىرلەنۋشىلەرگە كەلتىرىلگەن شىعىننىڭ جالپى سوماسى 120 مىڭ تەڭگەدەن اسادى.
اتالعان جايت قر قك-ءنىڭ 190-بابى (الاياقتىق) بويىنشا سوتقا دەيىنگى تەرگەۋدىڭ بىرىڭعاي تىزىلىمىنە تىركەلدى. وقيعا ورنىنا بىردەن جەدەل-تەرگەۋ توبىنىڭ قىزمەتكەرلەرى مەن تۇركىستان قپب-نىڭ ۋچاسكەلىك پوليتسيا ينسپەكتورلارى جەتتى.
ءتارتىپ ساقشىلارى جاقىن ماڭداعى بارلىق اۋماقتاردى, كوشەلەر مەن ۇيلەردى ارالاپ شىقتى, بەينەباقىلاۋ كامەرالارىن تەكسەردى, كۋاگەرلەر مەن كورشىلەردەن جاۋاپ الدى. جەدەل-ىزدەستىرۋ ءىس-شارالارىنىڭ ناتيجەسىندە, سونداي-اق كۇدىكتىنى تىركەگەن بەينەكامەرالار بويىنشا ۋچاسكەلىك ينسپەكتور بىرنەشە ساعات ىشىندە الاياقتى ۇستادى.
انىقتالعانداي كۇدىكتى بۇرىن بىرنەشە رەت سوتتالعان قىزىلوردا وبلىسىنىڭ تۇرعىنى. تەرگەۋ بارىسىندا كۇدىكتىنىڭ تۇركىستان, شىمكەنت قالالارىندا جانە قىزىلوردا وبلىسىندا جاسالعان الاياقتىق پەن بوتەن م ۇلىكتى ۇرلاۋدىڭ 6 جايتىنا قاتىسى بار ەكەنى انىقتالدى.
قازىرگى ۋاقىتتا كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلۋدە. ۇستالعان ەر ازامات قاماۋدا. ايعاقتى زات رەتىندە الىنعان تەلەفون مەن قۇجاتتار زاڭدى يەلەرىنە قايتارىلدى. پوليتسەيلەر كۇدىكتىنىڭ باسقا دا وسىعان ۇقساس قىلمىستارعا قاتىسى بار-جوعىن انىقتاپ جاتىر.