سولتۇستىك قازاقستان وبلىسىنىڭ پوليتسەيلەرى ءتورت ەلىكتى زاڭسىز اتقان كۇدىكتىلەردى ۇستادى, دەپ حابارلايدى Egemen.kz Polisia.kz پورتالىنا سىلتەمە جاساپ.
سولتۇستىك قازاقستان وبلىسى تابيعاتتى قورعاۋ پوليتسەيلەرى مۇددەلى ۆەدومستۆولاردىڭ قىزمەتكەرلەرىمەن جانۋارلار دۇنيەسىن براكونەرلەردەن قورعاۋ بويىنشا تۇراقتى بىرلەسكەن رەيدتەردى وتكىزدى.
5 جەلتوقساندا كەزەكتى رەيد بارىسىندا مامليۋت اۋدانىنىڭ پوليتسيا ءبولىمى تابيعاتتى قورعاۋ پوليتسياسى قىزمەتكەرلەرى مەڭگەسەر اڭشىلىق شارۋاشىلىعى قورىقشىسىمەن كاتاناي اۋىلى ماڭىنداعى جەردە پەتروپاۆلدىڭ 37 جاستاعى تۇرعىنى باسقارعان Nissan Hilux اۆتوكولىگىن توقتاتقان.
كولىك ىشىندە تاعى ءبىر قالا تۇرعىنى پەن ەكى اۋدان تۇرعىنى بولعان.
كولىك سالونىنان قىناپقا سالىنعان تەگىس ۇڭعىلى قارۋ, 42 پاترونى بار وقشانتاي, پىشاق تابىلدى. جۇكسالعىشتا باسى كەسىلگەن, وق اتىلعان ءتورت ءسىبىر ەلىگى جاتقان.
اتالعان فاكتى قر قىلمىستىق كودەكسىنىڭ 337-بابى (زاڭسىز اڭشىلىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى.
قازىرگى ۋاقىتتا ەكى قارۋدىڭ يەسى 54 جانە 48 جاستاعى اۋىل تۇرعىنى كۇدىكتى دەپ تانىلدى. ولار ۋاقىتشا ۇستاۋ يزولياتورىنا قامالدى. جانۋارلاردىڭ دەنەسى, قارۋ مەن اۆتوكولىك تاركىلەندى, قاجەتتى ساراپتامالار تاعايىندالىپ, تەرگەۋ جۇرگىزىلىپ جاتىر.